اسكريبت بقلم حبيبة محمود ايس كريم الهوي
_كفاية بقى كفاية أوووف
قولت كده وأنا بحدف اللي في أيدي على رخامة المطبخ بضجر بس شكلي كنت متعصبة جامد لدرجة إن التلاجة ... قصدي سيف جوزي جه وهو بيقول بنبرة خائفة
_تيسير مالك إنت كويسة
رديت عليه وأنا متنرفزة ونبرة على وشك البكاء
_عمالة أضغط على الزفتة دي ومش عارفة عايزة أطلع الجيلاتي شوفت أيدي أحمرت أزاي
قولتها وأنا بفتح كفي اوريه أيدي اللي فعلا أحمرت من المعلقة اللي بتطلع الأيس كريم
ضحك وهو بيرد عليا
_وطالما يا صغنن يا ابو كف رقيق بتمسك ليه حاجة توجعك
كمل وهو بيقول وبيمسكني من هدومي
_وبعدين يا بنت كل الخبط والرزع ده عشان تطلع الأيس كريم
بصليته بقرف فكمل وهو بيبعد عني ويمسك المعلقة وبالفعل نجح فأتكلم وهو بيطلع الأيس كريم وبيحطه في الطبق المخصص له
_بصي سهلة بس أنت اللي صغنن
أتكلمت بعصبية
_خلي بالك أنت مستفز لإن أنا أساسا بحط الايس كريم ده عشانك أنت وعايزة أريحك في أجازتك
رمش كتير وهو بيبصلي بدهشة حاسة إني زودتها شوية لإني متعودة على كده.. بس قررت الانسحاب ومشيت من قدامه وحبيت أكمل المسلسل الهندي اللي أنا عملته وقفلت الباب بقوة وأنا داخلة
قولت بعد ما دخلت الأوضة بوجع وأنا بمسك أيدي
_اااه غبية يعني لازم كنت أعمل فيها الزوجة غضبانة
في الخارج
أتكلم سيف بصدمة
_هو أنا عملت كل ده إيه عملية تصعيد الأمور دي هي ناقصة هطل .. أما ادخل أصالحها زمانها حبيبتي
مشى وبعد كده وقف وهو بيبص للآيس كريم وللماتش فأتكلم وهو بيقول
_بس بردو تيسير بتحب تاخد وقتها في المكد فأنا أسيبها تبكي براحتها واكون أنا أكلت والماتش خلص
وبعد كده أخد الآيس كريم وراح للصالة وقعد
داخل الغرفة
كنت قاعدة بغني وأنا وماسكة قلمين روج الفرق بينهم درجة حيرة .. ربنا ما يكتبها على حد وبقول
_يمه القمر على الباب
نور قناديله .. يمه
أرد الباب ولا..أناديله
أناديله ..يمه
كملت وأنا بسيب الاتنين وبحط زبدة كاكاو بالفراولة
_يمه القمر سهران
مسكين بقاله زمان
عينه على بيتنا
باين عليه عطشان
وحد من الجيران
وصفله قلتها
أسقيه ينولنا ثواب
ولا أرد الباب
وقفت غنى لما الباب أتفتح فقولت بخضة
_إيه يا عم مفيش لا إحم ولا دستور
رد عليا بخبث
_لا يا عينا اقولك على حاجة
بصيتله باهتمام فكمل وهو بيغمز بطرف عينه
_أسقيه ومترديش الباب
أتكسفت لفيت وشي الناحية التانية وأنا بقول بزعل بس مصطنع
_متهزرش معايا عشان أنا زعلانة منك .. أهي أهي
طبعاا ختمت كلامي بشوية بكى وشحتفة كدابين
_ يا سلام خلي بالك مش لايق عليك جو التمثيل
رديت عليه وأنا بقوم أقف وبعقد أيديا قدام صدري بغيظ
_ليه يا أخويا إن شاء الله مش بني آدمة وبحس ولا عايزين واحدة معدومة الكرامة
كملت وعليت صوتي وحركت أيدي في الهواء وكأني واقف
_لااا فوق يا بابا أنا مش منكسرة
قاطعني البارد .. كان عجبني الدور بصراحة فأتكلم وهو بيقول ببرود
_وإنت القادرة على التحدي والمواجهة والجامدة اللي مفيش منك
_ده غصبا عنك أساسا وبعدين تعالى هنا...
كنت ليه هكمل فقاطعني للمرة التانية وهو بيقول
_بس لون الروج ده عليك خطير دي زبدة الكاكاو اللي جبتيها من أسبوع صح ولا عيونك كلام تاني
أموت في المهتم بجد رديت عليه وأنا بقول بإبتسامة
_حلو صح حطيت أيلانير في عيوني
_بصراحة حاجة أخر حلاوة أنا كسيف .. مجيش حاجة جنب عيونك سيف قتال
أبتسمت وأنا بقوله
_سيف
أبتسم وهو بيقول
_عيونه اللي هيقفل عليك برموشه
محن أووي بس بحبه الصراحة رديت عليه وأنا بقوله بحماس
_سامحتك خلاص سامحتك
ضحك وهو بيقول
_يبقى كده زي العسل
رديت وأنا بقوله
_تمام يا عسل روح بقى أعمل لنا سينابون من إيدك اللوز يا لوز
_ده أستغلال يا سكر
هزيت رأسي بموافقة وأنا بقول
_نعم يا لوز
هز رأسه بموافقة وهو بيقول
_موافق بس إدينا واحدة فايزة أحمد
أبتسمت وأنا بقول بنغمة خفيفة
_ببص من الشباك
لمحته جي هناك
بطلعته الحلوة
نور عليا وقال
بعنيا كام موال
ياا لييل
خدت كام غنوة
لا قدرت أرد جواب
ولا أرد الباب يمه
أخد هو الراية وكمل مكاني بنغمة خفيفة وصوت جميل
_يمه القمر على الباب
خبط وقال يا أحباب
ردوا على الخطاب
معدش فيها كسوف
يمه أعملي
قومي أفتحي له الباب
ولا اناديله يمه
وبعد كده كملنا احنا الاتنين في نفس واحد بحماس
_يمه القمر على الباب
نور قناديله
يمه أرد الباب
ولا أناديله يمه
وبعد فترة كان هو قاعد بياكل الآيس كريم وبيضحك على الفيلم وأنا قاعدة باكل السينابون التحفة اللي عمله ليا قرة عيني ... ولكن أكتشفت إن المشكلة مش في المعلقة ولا المشكلة في التضحية المشكلة في اللي يمتص الغضب وده الأهم ويضيع أي وجع كمان ..ضحكت وأنا ببصله وهو بيأكل الآيس كريم وقلت في نفسي أهي دي الحياة شوية خناق وشوية دلع وشوية تمثيل مش عشان ده فراغ بس عشان نحس بشوية أهتمام أصل الحب مش محتاج معلقة كبيرة من نوع واحد .. الحب عايز أنواع كتير ومختلفة ومن كل شيء حبة صفتين قد كدة ويكون ده أحلى طعم وأحلى نكهة كمان
تمت بحمدالله
ودي حدوتة خفيفة وياريت تشكروا المعلقة بتاعت الآيس كريم لأنها بالفعل تعبتني بسبب إني بحاول اطلع الآيس كريم ودي أخرة اللي يفتح صدره بس جت سليمة
اتمنى تعجبكم الحدوتةومنتظرة تعليقاتكم العسولة ..
تنبيه ..أي حد هيسمع الاغنية لمدام فايزة الله يرحمها تكون من غير موسيقى ااه مش ناقصة هي ده انا وإسمي كاتبة حفظها من زمان أيام ما كنت بسمع موسيقى بس الحمدلله ادينا بنجاهد .. عشان بس لو شيطان وزكوا متتهزوش أثبتوا كده عشان بلاش ذنوب يستركم ربنا
وفي الأخر
قراءة لذيذة وسهرة خفيفة
لكل حكاية أثر وهذا أثري بقلمي حبيبة محمود
اسكريبت
..آيس كريم
وصح يا حبايب بما إني هعمل حدوتة طويلة سيكا... فأقترحوا عليا اسماء عشان اختار منهم يا حبايب
