اسكريبت بقلم منار رضا
كفاية تخليهم يتدخلوا في حياتنا بقى أنا تعبت يا يوسف!
دي أمي عارفة يعني إيه أمي
عارفة بس دا ميسمحلهاش إنها تتدخل في حياتي كدا أنا ليا خصوصيات مينفعش حد يعرفها عني أنا بيتي المفروض مملكتي مامتك بتيجي تعدل عليا في كل ركن فيه بتقولي الدولاب دا مكانه مش حلو غيريه المراية دي فلاحي أوي أنت إزاي جبتيها حتى هدومي يا يوسف بتفضل تقولي إيه القرف اللي أنت لبساه دا معرفش إزاي ابني جاب واحدة زوقها بلدي كدا وكل دا مش كفاية بجد
يا منار دي بتحبك وهي عايزة مصلحتك بس
ممكن تنصحني لكن متهاجمنيش أنا استحملت عشانك كتير فعلشاني مشيني من البيت دا
مش هقدر أسيب أمي في البيت لوحدها يا منار
وأنا مش هقدر أقعد في مكان أعصابي كل يوم بتتعب أكتر فيه
ما أنت استحملتي بقالك ٣ سنين ايشمعنى جاية تتكلمي دلوقتي!
عشان كنت فاكرة إنها غيرة عشان خدت ابنها منها زي ما كانت بتقول وإنها هتحبني مع الوقت لكن محبتنيش ودايما مستخسراك فيا وشيفاني قليلة ومستاهلكش أنا عايزة أروح عند أهلي بعد إذنك وديني عند اهلي!
دا آخر كلام عندك
آه يا يوسف
تمام حضري شنطتك وأنا هوصلك
نزلت من بيتي الساعة ٤ الفجر في عز ما الدنيا بتشتي لإني حرفيا مبقتش قادرة أستحمل مش معقول أكون داخلة أنام جنب جوزي ألاقيها بتقولي خشي نامي في الأوضة اللي ابني جايبهالك ب٥٣ ألف جنيه خسارة فيك! أنا فعلا استحملت كتير بس أعصابي تعبت أنا عمري ما
متكلمناش ولا كلمة لحد ما وصلت لبيت أهلي جيت أنزل مسك إيدي
متاكدة إنك عايزة تطلعي عند أهلك وتسبيني أنام لوحدي!
أنا تعبت يا يوسف حس بيا شوية أنا عند اهلي لحد ما تلاقي حل لحياتنا دي
سيبته وطلعت على بيت بابا جري وأنا عيوني مليانة دموع هديت مسحت عيوني وخبطت ودخلت بس محكتش حاجة زي أي ست عاقلة
دخلت قولتلهم إنهم وحشوني ويوسف مسافر تبع الشغل قولت آجي أقعد معاكوا
بابا رحب بيا جدا وقالي أوضتك فاضية يلا ادخلي فضي هدومك وارتاحي دخلت أوضتي وانفجرت من كتر العياط نمت من التعب والوجع اللي جوا قلبي صحيت ع صوت بابا
يلا يا منار قومي افطري يا حبيبتي
حاضر يا بابا هقوم أهو
أختي الصغيرة بتعرفني كويس جدا من أول نظرة فأول ما قعدت على السفرة لقيتها بتقولي
مالك يا منار عيونك فيهم إيه
ولا حاجة يا حبيبتي دا قلة نوم
عدت كلامي عشان قدام أهلي وابتسمت لأنها عارفة إني بكذب عدى اليوم وأنا قلبي كل ثانية بيفكر في يوسف وعامل إيه وكل ولا لا وزعلان ولا نسيني!
وحشتيني يا منار مش عاوزة ترجعي
أنا عمري ما كان نفسي أسيب بيتي وأمشي بس أنت في إيدك الحل أنا مش هقدر أعيش كدا
قفلت موبايلي ونمت وعدى يوم والتاني وإحنا على نفس الحال بس جيه يوم أم يوسف كلمتني
طبعا أنت زعلانة مني وأنا ميرضنيش قعدتك بعيد عن ابني كل دا يوسف حاله اتغير مبقاش بياكل ولا يشرب في البيت ويجي على النوم ومبشوفهوش أصلا طول اليوم ودقنه طولت وخس خالص وأنا عارفة إنه روحه فيك وملكوش غير بعض عارفة إني غلطت في حقك وإني ضايقتك كتير بس حقك عليا أنا زي أمك محلتيش غيره ومليش غيره بعد موت باباه اعذريني يا بنتي كنت خايفة تاخديه مني ومتخليهوش يجيلي عشان كدا اشترطت إني أعيش معاكوا بس أنت أكرمتيني وعاملتيني كويس وشيلتيني في كل حاجة خفت على ابني منك لا تبهدليه عشان أنت مستواك أعلى من مستوانا بس أنت كنت متربية وصونتيه وشلتيه وقت ضيقته أنت ست جدعة وتستاهلي ابني وكل اللي أقدر أقوله خليه يجي يزورني على طول وتعالي معاه دة أنا بحبك والله وهترجعي بيتك النهاردة جوزك هيجي ياخدك وأنا مش هتلاقيني في البيت هرجع بيتي أنا خلاص اتطمنت عليكوا
مجيتك عندي بالدنيا يا ماما وحقك عليا لو فهمتك غلط بس خلاص خليك معانا متمشيش
يا بنتي أنا خلاص نقلت كل حاجتي هناك وهبقى مرتاحة أكتر منتي عارفة كل واحد بيرتاح في بيته
متحرميناش من حسك في البيت يا ماما
هجيلكو هو أنا ليا غيركو يلا بس حضري هدومك يوسف هيعدي بالليل ياخدك
حاضر
فضلت مستنية لحد الليل ما جيه ويوسف مجاش لقيته باعتلي ماسج على موبايلي الساعة ١١ بالليل
افتحي باب الشقة
جريت بسرعة لقيت بوكس كبير وبلونة حمرا أخدت البوكس ودخلت لقيته باعتلي
البسي الفستان اللي في البوكس بسرعة أنا مستنيك تحت البيت
لبست فستان أحمر منفوش وهيلز كافيه وطرحة نفس لون الهيلز حطيت ميكاب خفيف أوي ونزلت بسرعة عشان أعرف في إيه وليه كل دا
هو أنت عامل كل دا ليه
هتعرفي
طب إحنا رايحين فين
هتعرفي
طب بقالنا كتير ماشيين بالعربية وبعدين طيب!
ما هو لو صبر القاتل على المقتول
نزل من العربية وجه فتحلي الباب وقالي
انزلي يا أجمل أميرة شافتها عيوني
بس أنا اسمي منار
أنت منارتي وحياتي وعمري وعيوني وكل ما أملك
ضحكت ومسكت إيده ومشينا في مكان ظلمة
يوسف أنت جايبني هنا عشان إيه
هحبك
ما أنت بتحبني
لا النهاردة غير
دخلت مكان في بلالين كتير وأنوار هادية ابتسمت وقولتله
من امتى الرومانسية دي
من دلوقتي يا لمضة هاتي إيدك
مسك إيدي ولبسني خاتم فيها
أنا جايلك عشان نبدأ قصة حب جديدة في يوم جديد بكل حاجة جديدة تعالي نبدأ سوا ومنسيبش بعض أبدا
أنا موافقة
تعرفي إني بحبك
أعرف
وتعرفي إيه كمان
إن البيت من غيري وحش
ظلمة!
بحبك
ولو الدنيا تعاندنا يوم هيفضل حبنا مكمل ولو
بقلم منار رضا
