حواديت سيف وفريدة بقلم مارينا عبود
فريدة القميص الأبيض بتاعي فين
هتلاقيه عندك في الرف التاني من الدولاب.
دورت وملقتوش.
طيب لحظة أنا هجيلك.
غسلت إيدي وروحتله كان بيقلب في الهدوم بعشوائية ملامحه كان باين عليها القلق والإستعجال الهدوم كانت واقعه على الارض والاوضه مكركبه اتنفست بعمق وقربت منه بكل هدوء ابتسمت بخفة وقعدته على السرير شلت كل الهدوم إللي وقعت ورجعتها مكانها وقلت بمرح وأنا بحاول الطف الجو
طيب قولي هتلاقيه إزاي وأنت بتدور بالشكل ده
اتأفف بتعب
طيب قوليلي أعمل إيه عندي اجتماع مهم النهاردة ومش عاوزة اتأخر!
طلعت القميص وبصيت له كانت عيونه تايها والضيق والتعب باين على ملامحهاتنهدت وقربت حطيت القميص في إيده وحضنته بلطف
متقلقش يا حبيبي كل الأمور هتبقى تمام طول ما أنت بتعمل إللي عليك اتاكد أن ربنا هيكرمك بس ممكن متضغطش نفسك بسبب مشاكل الشغل صدقني أنت عندي أهم من أي حاجة.
اتنهد تنهيدة طويلة وبصلي بإبتسامة خفيفة مسك كف إيدي وباسها بحب
متقلقيش عليا أنا زي الفل وبعدين أنت جنبي وطول ما أنت جنبي أنا هقدر أواجه أي حاجة مهما كانت صعبة.
ابتسمت وربت على شعره بحنان
وأنا هفضل دايما جنبك ويلاه دلوقت قوم كمل لبسك وأنا هروح أجهزلك باقي الفطار.
اتنهد وقال بتعب
حاضر بس ممكن تحطيلي اللاب في الشنطة
ابتسمت بخفة
عيوني.
الحياة صعبة والضغوطات كل يوم بتزيد عن اليوم إللي قبله بس وجود شخص جنبك بيدعمك وبيشجعك في وسط كل ده بيخليك قادر تكمل بيهون عليك الرحلة مهما كانت صعبة وده
خلصت تجهيز شنطته حطيتله كل حاجة بطريقة منظمةسندتها على السرير والتفت لقيته واقف بيبصلي بعيون بتلمع بصيت له بإستغراب وقلت
مالك بتبصلي كده ليه !
ابتسم وقرب حاوط وسطي وشدني لحضنه وقال بإمتنان
الإنسان محظوظ بوجودك يا فريدة وجودك بيهون عليا كل حاجة.
ابتسمت بخجل وحضنته بحب طيب اشرحله إزاي أن وجوده هو إللي مهون عليا كل حاجة وأن قلبي بيكون مبسوط بس وهو قريب منه للاسف أنا بتكسف أعبر بالكلام بس الطريقة الوحيدة إللى بعرف أعبر بيها هو الحضن والجميل أنه بيفهمني بيفهم مشاعري بيعرف أنا عاوزه أقوله إيه حتى أنه بيفهمني من نظرة عين والجميل أنه موجود.
يالهووي الأكل!!
برقت لما استوعبت أني سايبه الأكل على النار بعدت عنه وجريت ناحية المطبخ زي المجنونة طفيت النار بسرعة واتنهدت بإرتياح ثواني وسمعت صوت ضحكته رفعت رأسي لقيته واقف بيضحك بصوت عالي!
مش بقولك مجنونة!
شكرا يا ذوق بس الأكل كان هيتحرق بسببك.
طيب وأنا مالي أنا إللى قولتلك احضنيني واسرحي.
قالها وهو بيضحك فاتكسفت وقلت بغيظ
أنت مستفز على فكرة!
عارف بس بقولك إيه ما تيجي نكمل الحضن طيب
رميت عليه الفوطة إللى في إيدي وقلت بنفاذ صبر
سيف روح كمل لبسك علشان متتأخرش.
كشر وقال بضيق
حاضر ملكيش في الطيب نصيب.
رمالي الفوطه تاني ورجع الأوضةضحكت بصوت عالي وبدأت أجهزله الفطار بكل شغف بحب اعمله الأكل بمزاج رايق أي حاجة بعملهاله بحب اعملها بحب وقلب كبير حطيت الأكل
مش هتطلع من هنا غير لما تفطر.
المرادي مستعجل.
ميخصنيش! هتقعد تفطر دلوقت بالذوق أحسن ما أنكد عليك النهاردة.
أنت بتهدديني يعني
عليت صوتي وحطيت إيدي في وسطي بتحذير
اه بهددك يا سيف ده إذا كان عاجبك.
اتنهد تنهيدة طويلةساب شنطته بإستسلام وقعد على السفرة
حاضر ياست فريدة.
كتمت ضحكت على شكله وقعدت قدامه
برافو عليك زوج شاطر وبتسمع الكلام.
قطم حته من الساندوتش وقال بسخرية وهو بيبصلي بغيظ
لا ده علشان انا مش مستعد استحمل جرعة النكد بتاعتك.
ضحكت
طيب بطل جدال معايا وخلص كل الطبق إللي قدامك.
لا ده كتيرر مش هقدر اخلصه كله.
كنت لسه هتكلم لقيته قام باس على رأسي وقال بهدوء
صدقيني أنا شبعت يلاه أنا همشي دلوقت ومتنسيش تدعيلي المشروع يتقبل.
بإذن الله هيتقبل خد بالك من نفسك ومتنساش تطمني عليك.
حاضر وأنت كمان.
سابني ونزل وأنا فضلت ادعيله سيف شاطر جدا في شغله إنسان مجتهد طموح بيحب يشتغل بكل طاقته بيعرف إزاي يخطط ويحقق أي هدف هو عاوزه فخورة بيه وفخورة بكل خطوة هو بيخطيها في طريق حلمه.
طمني عملت إيه
كنا بنتكلم مكالمة فيديو الفرحة كانت ظاهره على ملامحه ابتسم وقال بحماس
تمام جدا قدمت فكرة المشروع والناس عجبهم جدا.
برافو كنت واثقة أنك قدها.
ابتسم وقال بفرحة
أنا مش قولتلك لما بتدعيلي كل حاجة بتمشي تمام.
ضحكت وغمزتله
طيب بالمناسبة دي متنساش تجيبلي حاجة حلو وأنت راجع البيت
ضحك بصوت عالي وقال بمرح
ده أنا عيوني لحبيبة القلب.
ابتسمت وخبيت وشي بإيدي بخجل فضحك وقال بمشاكسه
يابنتي قولتلك كل ما بتتكسفي بتحلوي أكتر وأنا قلبي مش قد الكلام ده!
شيلت إيدي وبصيت له بكسوف
يا سيف بطل غلاثه بقى!
ضحك وكان هيتكلم لكن قاطعه صوت يوسف صاحبه
ولااا كفاية حب ورومانسية وتعال على مكتبي عاوزك في موضوع.
ضحك وبصله بغيظ
يابني وأنت مالك ومالي واحد ومراته ايش دخلك بينا!
حقك ما أنت من يوم ما اتجوزت وأنت مبقاش يفرق معاك حد حتى مشاعر صاحبك السنجل يا خاين مبقتش تفرق معاك.
امشي يالااا من هنا امشي.
طيب كفاية بجد وتعال ورايا.
حاضر روح وأنا خمس دقايق وجاي وراك.
هي دقيقة وحده وتكون عندي أحسن ما أجي أكسر المكتب فوق دماغك.
قفل الباب وطلع فضل ثواني يستوعب الكلام إللي قاله يوسف وأنا فضلت أضحك على رياكشن وش سيف بصلي وفضل يضحك
صاحبي خلاص اتجنن! يلاه أنا هسيبك واروح أشوفه وأكمل شغل.
خلاص تمام هستناك.
هخلص شغل واجيلك.
اتفقنا تيجي بالسلامة.
الله يسلمك.
ابتسمت وقفلت المكالمة قمت نضفت المكان وبدأت اخلص الشغل إللى ورايا بحكم أن شغلي أون لاين والحقيقة أن أكتر حد شجعني على الشغل ده كان سيف هو دايما بيدعمني وبيشجعني علشان احقق أحلامي خلصت شغلي ودخلت أجهز العشاء لحد ما ييجي.
فريدة يا فيرو.
قالها وهو بيحضني من ضهري وبيضحكابتسمت وقلت بحب
قلب فيرو حمدلله على سلامتك.
الله يسلمك.
اممم جيبتلي الحاجة الحلوه ولا نسيت يا أستاذ
وأنا
قالها ورفع كيس لفوق مليان حاجات ابتسمت وقلت بحماس
يعني هنسهر
