حواديت سيف وفريدة بقلم مارينا عبود

النهاردة 
مع كوبايتين شاي من تحت إيدك.
وسهرة حلوه مع النجوم في البلكونة.
ونرغي ونحكي لحد الصبح.
ضحكنا أحنا الإتنين أخدت نفس وقلت بحب
يلاه بسرعة روح غير هدومك علشان نتعشاء سوا ونبدأ السهرة بدري.
غمزلي وقال بحماس
عيوني يا حلو جهزي العشاء أكون أخدت شاور وغيرت هدومي.
خلاص اتفقنا يلاه روح بسرعة.
حاضر.
سابني ودخل الأوضة كعادة كل يوم لأزم نسهر كل يوم في البلكونة نحكي ونرغي في تفاصيل اليوم وطبعا لأنه بكره إجازة فالسهرة بتاعتنا النهاردة هتكون لحد الصبح جهزت العشاء بكل حب وحطيته على السفرة وأنا بدندن بمزاج.
يا مزاجك يا حلو وأنت رايق.
قالها وقعد على السفرة فضحكت وقعدت جنبه
أنت عارف لو سبتني ونمت النهاردة زي المرة إللي فاتت هعمل فيك إيه  
ضحك
لا متقلقيشأنا مزاجي رايق النهاردة ومش هيجيلي نوم.
خلاص اتفقنا.
ابتسم وبدأ يأكل كنت كل شوية ببصله سيف بيكون جميل اووي وهو فرحان عيونه بتلمع بشكل حلو الحقيقة إن الإنسان قلبه بيدوب في حلاوته يا ولاد !
احكيلي بقى ياسيدي عملت إيه النهاردة 
كنا قاعدين في البلكونة محاوطني بدراعه والبطانيه حولينا وقدامنا أطباق مليانه تسالي وحاجات لذيذه الجو كان جميل السماء شكلها مبهج والنجوم واضحه وجميلة والأهم أني موجودة في حضنه.
ابتسم وبدأ يحكيلي تفاصيل يومه بكل الأحداث إللي حصلت فيه خطوة بسيطة بس لذيذه بحب جدا اشاركه التفاصيل مهما كانت بسيطة بحب اسمعه بإهتمام شديد والجميل إن هو كمان بيحب يشاركني تفاصيل يومي وأخبار شغلي حكاية فضلت تجيب حكاية وكل حكاية مليانه تفاصيل جميلة فضلنا نضحك ونهزر والجميل أن الليل كان طويل ويساع حكاوينا والشتاء رجع بجماله.
أنت واخدني على فين 
كنت بقولها وأنا نعسانه ونايمه على نفسي كان شايلني على كتفه وعلى وشه إبتسامة حلوه تشبه لجمال ملامحه نومني على سريري وقال بمرح
كفاية لحد كده أحنا بقينا الفجر يلاه علشان تنامي.
مسكت إيده وقلت بنوم وتعب
وأنت مش هتنام جنبي
ابتسم وباس رأسي بحنان 
هنام جنبك ثواني هشيل كل الحاجات من البلكونة وهرجعلك.
مستنياك متتأخرش.
عيوني.
ولأن مش دايما الأمور هتكون تمام ومش دايما هتكون حياتنا هادية ومليانه سعادة ومش دايما هنكون في أحسن حالاتنا أوقات هنقع وأوقات هنتعرض لمشاكل كتيرر فوق طاقتنا وأوقات هنكون على وشك الإستسلام بس المهم أننا منستسلمش منبعدش عن بعض مهم حد فينا يسند التاني مهم أننا منسمحش للضغوطات أنها تعمل حاجز ما بينا.
سيف أنت كويس 
في إيه يا فريدة!! قولتلك أنا كويس.
قالها بزعيق فاتنفضت من نبرة صوته وسكت أخد حاجته ونزل حتى من غير ما يفطر أو يودعني زي عادته!! فضلت ببص لطيفه بتعب زعله مخليني عاجزه ومش عارفة أعمل أي حاجة خصوصا أنه بقاله كام يوم مخنوق بيرجع من الشغل ينام من غير حتى ما يحكيلي تفاصيل يومه زي ما اتعودنا بقى ساكت طول الوقت ودي مش عادته التعب والزعل ظاهر على ملامحه بيحاول يبان ثابت بس للاسف مهما حاول يعمل ده قدامي مش هيقدر الغريب أنه رافض يحكيلي إللي تاعبه رافض يشاركني وده مش اتفاقنا!! أحنا اتفقنا نتشارك اتفقنا منخبيش عن بعض حاجة طيب وبعدين
أنا اسفحقك عليا.
كنت واقفه بغسل الأطباق لحد ما سمعت صوته بيتأسف بكل حزن التفت وبصيت له كان باصص للأرض بإنهزام والتعب ظاهر على ملامحه متكلمتش معاتبتش قربت بوست رأسه وحضنته بحنان وقلت بهدوء
متحاولش تخبي عني إللي فيك حتى لو أنا السبب فيه أنا جنبك مش هسيبك متقلقش كل الأمور هترجع تمام إيدي في إيدك وهنعدي كل صعب.
اتنهد تنهيدة طويلة وقال بتعب
في مشاكل كتيرر اووي في الشغل أنا مبقتش عارف أجيبها منين ولا منين دماغي تعبت من كتر التفكير حاسس أن كل حاجة ضغطاني بحاول أكون ثابت قدام الكل بس بأجي قدامك ومش بعرف ومش عاوز اشيلك الهم معايا بس للاسف أنا مش قادر اشيل كل حاجة لوحدي محتاج وجودك جنبي محتاج دعمك أوقات بحس أني محتاج أهرب من كل حاجة واجيلك أنا بأخد قوتي كلها منك فمتزعليش مني غصب عني.
طيب ليه تشيل كل ده في قلبك وبعدين هم إيه إللي أنت بتتكلم عنه!! أحنا مش اتفقنا أننا هنتشارك كل حاجة مهما كانت صعبة سيف أنا سعادتي مرتبطة بيك لو أنت مش مبسوط فأنا مش مبسوطة أنا موجودة هنا علشانك علشان اسندك تعال نقعد واحكيلي كل حاجة بالتفصيل.
أخدته وقعدنا على الأريكة فرد جسمه وحط رأسه على رجلي غمض عيونه وبدأ يحكيلي كل حاجة فضلت امشي إيديا في شعره بحنان وأنا بسمعه بإهتمام شديد خلص كلامه وفتح عيونهابتسمت وسألته بإهتمام
ارتحت شوية
ابتسم ومسك إيدي باسها
فريدة أنت إزاي كده !!
كده إزاي
يعني كل مرة بجيلك وأنا مهموم بلمسه منك على كام كلمة بسيطة بتنسيني أي حاجة تعباني! كل مرة بتثبتيلي أنك المكان الوحيد الدافيء وسط كل صعوبات وقسوة الحياة وأنك الشخص الوحيد إللي بيقدر يداوي جروحي بكل سهولة وجودك دايما بيهون عليا أي تعب أنا بقيت بهرب من كل الدنيا واجيلك علشان ببقى عارف أنك الوحيدة إللي هتفهميني وأنك الشخص الوحيد إللي هيواسيني ويشجعني ارجع أكمل فريدة أنا بتؤنس اووي بوجودك أنت بالنسبالي الأمان إللي بهرب من الدنيا واجيله.
ابتسمت وأخدته في حضني
أنا موجودة هنا علشانك علشانك وبس يا سيف وللنهاية هتلاقيني ماسكه في إيدك ومش هسيبك.
وجدته يطمئنني فأسكنته قلبي.
مارينا_عبود 
حواديت_سيف_وفريدة