اسكريبت قلبي اختارك انت بقلم مارينا عبود

أنتوا بالهناء والشفاء.
اتنهدت وقالت بحزن
طيب يابني على راحتك.
ابتسمت ودخلت أوضتيبس كنت سامعها وهي بتتكلم مع بابا.
سيف رجع يا وفاء
آه يا حبيبي رجع ودخل أوضته.
طيب قوليله ييجي يتعشاء.
قولتله وقال أنه شبعان ومش عاوز ياكل دلوقت.
مش عارف الولد ده ماله بقاله فترة كده مش عاجبني ومعرفش ليه مصر على موضوع الشغل ده! أنا قولتله بلاش يشتغل جنب دراسته ولما يخلص دراسة وحابب يشتغل ينزل يشتغل براحته في الإجازة لكن هو بالشكل ده بيضغط نفسه وممكن دراسته تتأثر.
صدقني اتكلمت معاه كتيرر في الموضوع ده ولكن هو مصر على الشغل سيبه على راحته.
هسيبه هعمل إيه غير كده.
قالها بابا بقلة حيلة كنت عارف إن بابا مضايق بسبب شغلي الكتير وأني بجهد نفسي رغم أن هو موفرلي كل إللى أنا محتاجه بس أنا كمان حابب اعتمد على نفسي وكمان لأني حابب اثبت لوالد نور انى قد المسئولية ولأني حابب احقق حلمي وأعوض اهلى عن تعبهم معايا فضلت طول الليل بفكر لحد ما روحت في النوم.
سيف 
نعم 
سيب الطلب ده أنا هوديه وأنت روح شوف الانسه إللي هناك تطلب إيه.
حاضر.
اتنهدت وروحت لقيتها هي ! أول ما شافتني رفعت عيونها وبصتلي ببراءة أخدت نفس وقلت بجمود
اتفضلي حضرتك تطلبي إيه  
بصتلي وقالت بزعل
أنا اسفه.
حضرتك تطلبي إيه برضوا  
سيف ممكن بلاش تكلمني بالأسلوب ده.
تمام أنا هبعت لحضرتك حد غيري يشوف طلبك بعد اذنك.
سيف!
سيبتها ودخلت المطبخ طلبت من زميلي إللي شغال معايا يطلع يشوفها كنت عارف أنها جايه الكافيه علشان تصالحني بس المرادي غير كل مرة كل مرة كنت بستحمل وبعديلها وبحاول بكل قوتي اراضيها بس آخر فترة بدأت احس أن مشاعري مش فارقه معاها علشان كده زعلي منها المرادي كان كبير رفضت اطلع بره وبدلت مكاني بواحد تاني الساعة بدأت تجيب التانية لحد ما خلصت شغل خرجت بره الكافية لقيتها واقفه جنب عربيتها وبتبصلي بحزن أول ما شافتني جريت عليا وقالت بزعل
ممكن نتكلم شوية لو سمحت
أنت إيه إللي مقعدك لحد الوقت ده فى الشارع
مهانش عليا اسيبك زعلان.
نور ! 
أنا اسفه صدقني مكنش قصدي اضايقك أصلا أنا كنت واقفه مع وحده صاحبتي وهو إللي جه وقف وفضل يهزر معانا.
وأنت فاكره أن ده مبرر يعني
لا مش مبرر أنا عارفة إني غلطانه وأني كان المفروض امشي ومفضلش واقفه معاه بس أنا اتحرجت أعمل كده سيف متنساش أني أنا وباسم قرايب وأنا وهو أصدقاء من الطفولة مش سهل أني اقطع علاقتي بيه في يوم وليلة.
بس أنت عارفة كويس ومتأكده كمان أنه معجب بيك يا نور
هزت راسها بالنفي وقالت بسرعة
صدقني الكلام ده مش صح أحنا مجرد صحاب مش أكترر بس يا سيدي أوعدك أني المرادي هقطع علاقتي بيه بشكل نهائى.
أخدت نفس عميق مسكت إيدي وكملت بحب  
وبعدين مش مهم هو بيفكر في إيه المهم أنا قلبي بيحب مين وأنا بحبك أنت ومهما حصل مش هكون لحد غيرك.
ابتسمت وقلت بحب
توعديني أنك مهما حصل مش هتكوني لحد غيري توعديني أنك هتفضلي جنبي دايما مهما كانت الظروف والتحديات 
ضحكت وقالت بحماس
أوعدك طبعا.
وأنا كمان أوعدك إني هحاول أعمل كل إللى اقدر عليه علشان نكون مع بعض.
وأنا واثقة فيك وبعدين أنا كلمت وطلبت منه أنه يشوف معاد مناسب علشان تروح تطلب إيدي منه.
تمام شوفي أمتى المعاد المناسب وأنا هكون جاهز.
خلاص اتفقنا 
تمام يلاه بسرعة ارجعي بيتك لأن الوقت اتأخر.
حاضر بس تعال الأول أوصلك في طريقي الأول. 
لا أنا هركب تاكسي متقلقيش عليا ويلاه ارجعي البيت.
بس..
يلاه يا نور وبلاش عناد.
اتأففت بضيق 
طيب بس ابقى طمني لو توصل بيتك.
حاضر وأنت كمان ابقى خلي بالك من نفسك.
هزت رأسها بالموافقة وودعتني ومشيت اليوم ده رجعت البيت وأنا مبسوط دخلت أوضتي طلعت لقيت والدتي لسه سهرانه ابتسمت وقربت قعدت جنبها وفضلت احكي معاها الحقيقة أن الوقت إللى بقضيه مع والدتي بحسه أجمل وقت بقضيه في حياتي وبحس من بعدها براحة نفسية كبيرة القعده معاها بالنسبالي كأنها علاج نفسي.
__________
كنت فين يا نور  
ابتسمت وقربت حضنته
بابا! أنت جيت أمتى
لسه جاي من شوية قوليلي بقى كنت فين 
كنت خارجه مع صحابي.
اممم كنت مع صحابك ولا مع الولد الصايع إللي بيضحك عليك 
حضرتك تقصد مين 
هو في غيره زميلك الصايع بتاع الجامعة إللي حضرتك رايحه جايه معاه.
اضايقت وقالت بحده 
لو حضرتك تقصد سيف فسيف مش صايع يا بابا! بالعكس هو إنسان محترم وشاطر و..
قاطعها بسخرية
براڤو عرف يضحك عليك ويلعب بعقلك مش غريبة النوعيات دي من الناس أنا عارفها كويس الشاب من دول ما بيصدق يلاقي وحده في مستواك علشان يلعب بيها.
بس سيف مش بيلعب بيا أنا وسيف بنحب بعض وبعدين هو أكتر من مرة حاول يحدد معاد مع حضرتك علشان يتقدملي وأنت بتتجاهله!
وياترى البيه عاوز يتقدملك ازاي وهو لسه مش مجهز نفسه
بس هو دلوقت بيشتغل علشان يجهز نفسه يا بابا وبعدين أحنا ممكن نتخطب سنة لحد ما نخلص آخر سنة جامعة وفي السنة دي هيكون هو قدر يجهز نفسه.
اممم وياترى هو إللى قالك الكلام ده 
اتنهدت وقالت بحيرة
يا بابا أنت إيه مشكلتك معاه فهمني صدقني سيف إنسان محترم وكويس وأهله كمان كويسين.
بس هو مش شبهنا ولا من مستوانا يا نور.
يعني ايه 
يعني تنسيه خاالص وياريت تقطعي علاقتك بيه بشكل نهائى.
بابا أنت بتقول إيه أنا مستحيل أعمل كده! 
غصب عنك هتعملي كده نور أنت لسه صغيرة ومش فاهمة ولا عارفة مصلحتك لكن أنا عارف مصلحتك كويس ولا يمكن اسيبك تضيعي نفسك ومستقبلك بسبب الحب والكلام الفارغ ده.
بس يا بابا ...
قاطعها بعصبية 
نور اتفضلي اطلعي أوضتك.
دبدبت على الارض بغيظ وطلعت لفوق وهي مضايقه والدتها اتنهدت وقالت بزعل 
ليه عملت كده أنت عارف أنها بتحبه! 
أنت مش عارفة حاجة وهي كمان مش عارفة مصلحتها بس عموما أنا هتصرف في الموضوع ده.
يتبع ...
مارينا_عبود
رواية 
قلبي_أختارك_أنت
3
ممكن أعرف أنت بتعيطي ليه 
يعني عاجبك تصرفات بابا يا ماما 
أبوك خايف عليك أنت بنته الوحيده وهو عاوز مصلحتك.
وأنا مصلحتي مع سيف يا ماما سيف بيحبني وبيحارب كل حاجة بس علشان نكون مع بعض.
بس يا نو...
قاطعتها بزعل
ماما من فضلك أنا بجد مش حابه اتكلم في أي حاجة دلوقت ولو حضرتك جايه تقنعيني بنفس كلام بابا الغريب فمتتعبيش نفسك لأني مش هقتنع بكلامكم.
اتنهدت والدتها وقالت بتعب
طيب يا بنتي هنأجل كلامنا لوقت تاني تكوني بقيت أحسن بس أنا مش عاوزك تزعلي نفسك صدقيني لو الموضوع خير ليك مفيش حاجة هتوقف في وشكم بس المهم عندي دلوقت أنك تمسحي دموعك ومتتعبيش نفسيتك بسبب الموضوع ده.
نور مسحت دموعها واترمت في حضن والدتها كانت حاسه بتقل على قلبها بقت دلوقت ما بين نارين ما بين حبيبها إللى بييجي على نفسه وبيحارب كل حاجة بس علشانها وعلشان تكون من نصيبه وما بين أبوها العنيد إللى رغم كل حاجة مش بتقدر تكسرله كلمة ولا بتقدر تستحمل زعله كانت حاسه أنها ضايعه ومش عارفة تعمل إيه مكانتش تعرف أن ضريبة الحب غالية اووي كده وكل إللى بتتمناه أن كل حاجة تكون بخير وبس.
______
سيف يا سيف!
يابني أنا كرهت اسمي بسببك خير في إيه 
في واحد بره بيسأل عليك بس شكله راجل معروف وليه وضعه وطالبك بره بالأسم.
عقدت حواحبي وقلت بإستغراب
طيب متعرفش اسمه إيه 
لا هو مقالش اي حاجة غير أنه عاوز يقابل سيف صلاح إللى شغال معانا في المكان.
اتنهدت وقلت بحيرة
طيب أنا ثواني وهطلعله.
تمام أنا هطلع ابلغه أنك طالع تقابله.
تمام روح بلغه وأنا ثواني وهطلع وراك.
هز رأسه بهدوء وخرج فضلت افكر ياترى مين الشخص ده ويعرفني منين علشان يجيلي لحد هنا رغم أن مفيش حد كتيرر يعرف أني بشتغل في الكافية ده!! قلعت اليونيفورم الخاص بالشغل وطلعت أشوفه كانت صدمة بالنسبالي أني اشوف والد نور رغم أني متقبلناش قبل كده ولكن أعرف شكله من الصور إللى دايما نور بتوريهالي وبتحكيلي عنه بس ياترى إيه إللى هيخليه ييجي هنا وهو من البداية رافض يقابلني وقلت بإبتسامة
اهلا وسهلا بحضرتك بلغوني أنك بتسأل عليا.
بصلي من فوق لتحت وقال بغرور
أنت بقى سيف  
اضايقت من نظراته وطريقة كلامه ولكن حاولت أكون هادي وفضلت الإبتسامة مرسومه على وشي
. أيوه أنا سيف خير حضرتك محتاجني في إيه
رجع بضهره لورا وقال بمكر
أنا أمجد والد نور إللى حضرتك راسم عليها دور الحب ودور العاشق الولهان.
رفعت حواجبي وقلت ببرود
بس أنا مش راسم على بنت حضرتك دور الحب أنا فعلا بحبها وهي عارفة ومتأكده من ده.
بصلي بنظرة غريبة وقال بحده
اسمعنى يا سيف أنا شوفت كتير من أمثالك وعارف كويس ازاي الشباب إللى زيك ما بيصدق يلاقي بنت زي نور علشان يلعب بيها ويوقعها في شباكه بس أنا جاي علشان احذرك واقولك تبعد عن بنتي احسلك وإلا مش هتشوف مني خير أنا محلتيش غير نور ومش هسمح لعيل تافه زيك أنه يستغلها علشان يحقق اهدافه الشخصية...
اتعصبت وكنت هتكلم ولكن صدمني لما طلع شيك ورماه قدامي على الترابيزة وكمل بسخرية
دول تلاته مليون جنيه ولو عاوز اكتر أنا ممكن اكتبلك شيك بالمبلغ إللى تطلبه بس في المقابل أنا عاوزك تبعد عن بنتي خاالص ومشوفش وشك قريب منها.
اتعصبت وعروقي برزت من الغضب مسكت الشيك بتاعه مليون حتة وأنا شايف صدمته قدامي أخدت نفس وقلت بحده وغضب
أنا مسمحش لحضرتك تتعامل معايا بالإسلوب ده وكلامك ده كله مش صح أنا بحب نور ومش بلعب بيها ولا هدفي استغلها بالعكس أنا دلوقت بشتغل بديل الشغله اتنين علشان بس أجي اطلب ايدها من حضرتك صحيح فلوسك تقدر نشتري كل حاجة بس متقدرتش تشتري بيها راجل يحافظ على بنتك وأنا بحب نور وهعمل المستحيل علشان تكون ليا ولو حضرتك جاي تشتريني فأنت غلطان أنا أبويا رباني على عزت النفس وأحب أقولك أن فلوسك دي كلها متلزمنيش وكلامك كمان ميلزمنيش وأظن مقابلتنا لحد هنا انتهت يا أمجد بيه بعد أذنك.
سيبته في صدمته واتحركت كام خطوة علشان ارجع اكمل شغل ولكن وقفني صوته الساخر
ولو نور بنفسها قالتلك مش عاوزك ياترى هتفضل برضوا عايش في وهمك ده ومصدقه 
غمضت عيني للحظات اتنفست بعمق علشان اسيطر على عصبيتي ولفيت بصيت له وانا راسم على وشي إبتسامة باردة
نور مستحيل تعمل كده لأنها بتحبني وأنا عارف ومتأكد أنك مهما حاولت تضغط على نور فهي مش هتتأثر وتتخلى عني فأنا بنصح حضرتك تبطل تضغط عليها لأن كل محاولاتك فاشلة وملهاش أي لأزمة أنا بحب نور ومهما حصل نور مش هتبعد عني.
مستنتش رده وسيبته ومشيت كنت عارف أن تصرفي ده هيزود غضبه عليا بس أنا أكتر حاجة بكره في حياتي أن حد يتعالى عليا أو يبصلي على أني أقل منه دخلت بعت رسالة لنور أني محتاج أقابلها كنت متعصب جدا وعاوز أعرف ليه أبوها بيفكر فيا بالشكل ده!!
ممكن أعرف أنت متعصب ومضايق كده ليه قولي مين إللى مضايقك بالشكل ده 
أبوك النهاردة عمل معايا موقف عمري ما هنساه.
بابا !! وأنت شوفت بابا فين 
حضرته جالي النهاردة مكان شغلي علشان يحذرني أبعد عنك لا وكمان جاي يعرض عليا فلوس بس علشان ابعد عنك أنا بس عاوز أفهم أبوك ده بيفكر ازاي بجد!
الصدمة ظهرت على وشها عيونها كانت بتلف في كل المكان إلا عنيا كنت عارف أنها هتضايق بسبب إللى حصل بس غصب عنى اضطريت أقولها على موقف أبوها هي لأزم تعرف أن أبوها مستعد يعمل أي حاجة بس علشان يبعدنا عن بعض قربت مسكت إيدها وقلت بحنان
أنا مش بقولك كده علشان تضايقي أنا بس عاوز أعرفك أن أبوك مستعد يعمل أي حاجة علشان يبعدنا عن بعض وأنا عاوزك تكوني قوية أنا عاوزك تمسك في إيدي كويس علشان نقدر نعدي كل ده أحنا لأزم نثبت أن حبنا لبعض أقوى من أي حاجة بس أنا مش هقدر أعمل كده لوحدي أنا عاوزك جنبي يا نور الطريق هيكون صعب اووي.
سابت إيدي والتفت أخدت نفس طويل وقالت بتعب
أنا تعبت يا سيف أنا دلوقت بقيت ما بين نارين أنا لا بقيت عارفة أكون معاك ولا أكون مع بابا! أنا حاسه أني في حرب كبيرة مش عاوزه تخلص ومبقتش عارفة أعمل إيه لا أنا عاوزه اخسرك ولا عاوزه اخسره.
وقفت قدامها وقلت بحزن
قصدك إيه يا نور يعني أنت شايفه حبي ليك تعب! نور أنت بجد ممكن تسبيني
بصتلي بعيون تايه وقالت بحزن
أنا مش عاوزه اخسرك يا سيف.
اتنهدت تنهيده طويلة وقلت
ولا أنا هقدر اخسرك علشان كده خليك قوية وبإذن الله هنلاقي حل