اسكريبت بقلم مريم سمير 2

_ لو سمحت ممكن اطلب من حضرتك طلب ممكن تعاكسني
افندم!!
_ أنا عارفة انت ممكن تفكر فيا ازاي دلوقتي بس ارجوك مفيش وقت ممكن تقولي اي حاجة
بصلي ب استغراب متوقع _ اصل مفيش غيرك هنا ف مش هعرف اقول ل حد تاني!
انا مبعرفش اقول كلام حلو يعني ممكن اقولك انك رائعة
_ اييييي!! 
عدل نضارته مهو دا أخري والله وبعدين انتي غريبة اوي!
_ عشان بقولك كد وانا مش جميلة 
مين قالك انك مش جميلة
قعدت قدامه بضيق _ أنا كنت جاية هنا عشان اقابل شاب اتعرفت عليه في موقع تعارف علي النت بس عمره ما شافني كان بيطلب يشوفني كتير بس كنت برفض لما حسيت بعد كد أنه كويس وافقت بس الظاهر أنه مش جاي او يمكن شافني من بعيد ف قال مستحيل يدخل يقعد معايا 
لي بتقولي كد!
_ تعرف أنا وصلت ل وزني دا عشان كانوا بيتريقوا عليا زمان فضلت اكل اكل وافش غلي في الاكل كانوا دايما بيقولولي اني فاشلة أنا حاولت كتير اخس بس فعلا طلعت فاشلة! 
ضحكت _ كان بعد كل وظيفة اخسرها اروح أكل برجر كتير بعد كل كلمة تريقة أسمعها اكل قصادها بطاطس 
رجعت كشرت تاني _ بس انا مش عاوزة افضل كد مش عاوزة الرجالة كلها تهرب اول ما تشوفني
مد أيده ب منديل ف خدته منه _ آسفة اني خدت من وقتك ومعلش اني جيت كلمتك من غير حتي ما تعرفني 
قومت من مكاني _ وشكرا انك سمعتني ومقاطعتنيش
ثواني انتي اسمك اي
_ مريم 
وانا احمد علي فكرة يمريم ومش مجاملة ولا معاكسة والله شكلك حلو اويييي 
جيت ارد عليه لقيت شاب بيكلمني مريم انتي مريم
_ أيوة انت عبدالله
كنت ما اكيد مش هقعد اضيع وقتي معاكي

اخي الإجارة راحت علي الفاضي عجبك كد
انت بتكلمها كد ازاي 
يعم وسع من وشي بقي أنا مش طايق نفسي 
كان جايب بوكيه ورد وهو جاي بصيتله ب زعل وقعدت علي الطربيزة عيطت! فضلت اعيط لدرجة إن صوتي بقي عالي ومش عارفة اتحكم فيه
اهدي طيب اهدي بالله عليكي 
قعد قدامي وبصينا احنا الاتنين جنبها علي البحر هديت وصوت عياطي بدأ يختفي كنت مكسوفة منه جدا عاوزة اهرب وانسي اني كلمته أو إن شاب جه قال الكلام دا قدامه .
_ أنا لازم امشي 
ثواني متمشيش وانتي مضايقة كد 
_ أنا بقيت كويسة شكرا 
فرصه سعيدة جدا يمريم تاكلي ايس كريم
_ لاء مكلتوش من زمان أنا عاملة دايت حاليا 
يعني بتحبيه ولا لاء
_ بحبه بس مينفعش 
طلبلنا اتنين ايس كريم ف بصيتله ب استغراب 
مش لازم عشان عاملة دايت تحرمي نفسك من حاجة انتي بتحبيها
_ بس أنا لو فضلت كد عمري ما هخس وافضل اكل ومفيش فايدة
خلي كل حاجة فيها تساوي لا تحرمي نفسك ولا تاكلي كتير أنا متأكد انك في يوم هتوصلي للوزن الي انتي عوزاه
_ معتقدش أنا بقالي سنة ونص بحاول!
متيأسيش وافضلي حاولي هيجي يوم وتعملي الي انتي عوزاه
_ متشكرة اوى أنا مش عارفة اقولك أي 
تاكلي عشان فلوسي مش حرام
ضحكت وكلت الايس كريم كان لذيذ اوي! فضل يحكيلي هو كمان علي طفولته 
_ واتكسر
أيوة حوشت كتير اوي عشان اجيب الجيتار دا لما وقع اتكسر حسيت إن حلمي اتكسر معاه 
_ محاولتش تجيب واحد تاني 
كان والدي رفض اجيب واحد تاني وقالي اني مهمل عشان معرفتش احافظ عليه ساعتها لميت كل حتة فيه وفضلت ألصقهم جمب بعض علي امل أنه يرجع تاني بس..
_ مفيش حاجة بتتكسر بترجع زي الاول 
بالظبط!
_ الظاهر إن احنا الاتنين طفولتنا مكنتش ألذ حاجة 
بس يمكن حاضرنا يبقي احسن اكيد فيه ايام متشالة فيها حلو كتير 
_ ونعم بالله أنا بجد مبسوطة جدا بالشويه الي قعدناهم سوا بس انا لازم امشي عشان اتأخرت 
هوصلك
_ ملوش لزوم 
لا لا أنا معايا عربية برا يلا بينا 
فتحلي الباب زي اي جنتل مان وخرجت من العربية بعد ما وصلت البيت 
_ احمد تفتكر افضل احاول
هتحاولي وهتوصلي للي انتي عوزاه طول ما جواكي رغبة تحققيها هتعمليها 
ابتسمت _ علي فكرة أنا مش ظابطة الدايت اوي بيفلت مني ساعات كتير من بكرة إن شاء الله هتبع نظام غذائي وانزل جيم 
أنا بجري الصبح في النادي الي في البلد تيجي نتقابل بكرة 
_ بجد ماشي ممكن 
تصبحي علي خير 
_ وانت من أهله 
طلعت البيت اتحول اليوم الي كنت حزينة فيه بشكل كبير ل يوم لطيف بوجود راجل ذوق بنضارة وشعر مرتب ولبس براند وجذمة بتلمع وكتب كتير بيقرأ فيها .
صباح الخير أنا استنيتك كتير 
_ أنا بجد آسفة مش متعودة اصحي بدري كد
ولا يهمك يلا
جريت خمس دقايق بس وصوت نفسي بدأ يعلي 
أنا عاوز ارتاح تعالي نقعد
_ لاء لاء أنا كويسه هنكمل
لاء تعالي بس هنقعد شويه ونكمل 
قعدت وانا بنهج وماسكة الفوطة بنشف بيها وشي 
برافو عليكي 
ضحكت _ أنا مجرتش خمس دقايق علي بعض! 
هو عشان في الاول لكن بعد كد هتجري بالساعات أنا كنت كد في الأول 
خلصنا تدريب وروحنا ضربنا نار رياضتي المفضلة مكنتش ضحكت كد من فترة كبيرة فضلت اعلم احمد يضرب نار ازاي وهو علمني الجري عملني اني احب الحياة واتمسك بيها ومخليش الامل ياكل فيا بالتدريج
بقينا صحاب! كان صاحب كويس اوي عمره ما حسسني أي إحساس وحش علي عكس أي راجل اول ما يشوفني كان بيبصلي بطريقة جميلة تحسسني اني بنت حلوة كان راجل لذيذ طيب وسيم احسن صاحب في الدنيا .
_ خسيت خمسه كيلو يا احمد أنا خسيت !!!!
دا احنا نروح نحلي من عند ب لبن بقي 
_ امشي من وشي حالا 
فضلت اخس بالتدريج تسع شهور وانا بحاول بس المرادي نجحت عشان كان موجود معايا طلع الحمل فعلا خفيف لما يشيله اتنين! كان بيشجعني دايما بيبحث عن أكل صحي جديد عشان مزهقش بس في نفس الوقت خلاني مبصش علي الكالوريز في الحاجة قبل ما اكلها المهم اكون مبسوطة اكل ايس كريم عادي وقت ما اعوز خلاني ارجع ابص في المرايا بمنتهي الرضا عشان هلاقي فيها بنت جميلة اوي .
_ كل سنة وانت طيب 
وانتي طيبة يمريومة مكنش ليه لأزمة كل دا تعبتي نفسك 
_ ولا اي حاجة دي حاجة بسيطة اوي والله يلا اتمني أمنية وغمض عينك وطفي الشمعة 
غمض عينه ف طلعت الهدية بسرعة حطيتها قدامه 
فتح ف بصلها ورجع بصلي
لا انتي اكيد بتهزري مريم انتي بتهزري 
خد الجيتار وفضل ماسكه كأنه رجع طفل تاني كأنه فرحان زي فرحته للجيتار الي اشتراه وهو صغير 
بس دا غالي اوييي!
_ المهم انك اتبسطت 
انتي اطيب واجمل بنت في الدنيا أنا بحبك اوييي والله 
برقت لما نطقها قلبي ضرباته بدأت تزيد وشي كله بقي لون الفراولة الي علي التورتة اطلع اجري طيب ولا اي 
_ اقطعلك التورتة ولا بتاكلها ب ايدك
ضحك هو انا ينفع اخطبك
_ لاء طبعا