اسكرييت بقلم هند حارس
دي
بعد كتب الكتاب سابونا ومشيوا
يا نهار أبيض
مين دا! وقعدت معاه إمتى والناس راحت فين
ببصله لقيته بيبصلي وساكت
إيه الرعب دا!
بعد شوية لقيته بيسألني سؤال
"ليه عملتي في نفسك كدا
ليه مخلية الكل ياخد عنك فكرة سيئة وإنك سلبية رغم إنك مش كدا"
بصيت له بذهول وبعدين الدموع اتجمعت في عيني واتكلمت بصوت مهزوز
"عشان هما عايزين يشوفوني كدا محدش فكر يتكلم معايا ويعرف أنا عايزه إيه ولا أنا ليه بعمل كدا
جربت أتكلم مرة بعدها الكلام كان بيقف ومبيطلعش
ولأن شخصيتي كدا مبحبش أشكي وأبكي
ممكن أتحمل الوجع في قلبي على إني أتكلم والكلام ميجيش بنتيجة "
سكت بعد ما حسيت بحمل تقيل كان على قلبي
إزاي شخص معرفوش قدر يسأل السؤال اللي كنت حاسة مالوش إجابة
وإزاي جاوبت عليه بكل سهولة
وإزاي سأل
استوعبت وسألته بصدمة
"إنت عرفت منين!"
بصلي بضحكة
لحظة إدراك
أنا أول مرة أتكلم لما حد يسألني
حتى صحابي دايما بيشوفوني أضحك وأهزر بس حد يعرف اللي جوا قلبي وحزني كل يوم لا
سكت شوية وبعدين
"انتي مكنتيش تاخدي بالك مني
كنت كل يوم أجي الحضانة أخد ابن أختي كنتي تديهولي ومتركزيش
أول مرة جيت عشان أشوفك من كتر ما هو بيتكلم عنك
شدني الفضول أجي أشوف الشخص اللي رجع الضحكة ليه بعد موت أبوه وانعزاله عن الناس لفترة
إيه اللي بعده عني بعد ما كنت محل أسراره
عشان أجي ألاقيكي وتخطفيني من أول مرة أشوفك فيها
بسمتك هدوئك غض بصرك اللي تقريبا مخلكيش ركزتي إني كنت باجي أخده كل يوم لمدة شهر
لما جيت أتقدم وسمعت من جيرانكم الكلام دا اتضايقت
اتأكدت إنك شخص طيب لدرجة ضيعتي حقك بإيدك
إنك بتحاولي تكوني النور لناس عمرها ما شافته في الوقت اللي انتي مطفية فيه
حبيت أكونلك النور زي ما كنتي النور لغيرك "
كنت بسمع بصمت وعيني بتدمع
مكنتش مصدقة
معقول يكون هو العوض
معقول يكون هو رزقي في الدنيا!
لما خلص كلامه لقيته بيقولي
"حقك عليا من كل حد أذاك "
مكنتش مستوعبة فضلت أعيط
أخيرالقيت النور في نهاية النفق!
انهاردة كان مفروض أهلي جايين يزوروني بعد ما فات أسبوع على
دي كانت أول مرة هطبخ من ساعة ما اتجوزت وأنا معرفش
كنت خايفة يبقى زيهم لما يلاقيني فاشلة ومكنتش عارفة أعمل
كنت خايفة أهلي كمان يذلوني قدامه زي كل مرة
صحيت من النوم فضلت مخنوقة وبعيط
هو كان لسه نايم
مسحت دموعي وصحيته عشان يروح شغله وكنت جهزت الفطار
دي الحاجة الوحيدة اللي بعرف أعملها
كان نايم ومش راضي يصحى فلقيت نفسي بعيط
هو عمل حاجة لا
بس نفسيتي لما بتكون تعبانة بعيط لما الشاي بيبرد عادي
صحى مخضوض على صوت العياط وحاول يهديني
"مالك بس في إيه والله كنت هصحى بس انهاردة إجازة "
كملت عياط
يا نهار أبيض كمان إجازة
يعني هيشاهد فشلي الذريع بعينه!
حاولت أتكلم بصوت مهزوز مقدميش حل تاني لازم يعرف
"أهلي انهاردة جايين وأنا مبعرفش أعمل أكل كتير هو مكرونة وايت صوص والحاجات الخفيفة اللي بعملها "
سكت
وكملت عياط
لقيته بيضحك وبيتكلم بحنية بعد ما سكت
"بس طب مانا عارف يا حبيبتي وعشان كدا خدت إجازة "
بصيتله باستغراب وأنا بمسح دموعي
وهو فهمني
"عارف إنهم جايين وعشان كدا خدت الإجازة وهنعمل الأكل سوا
طول ما أنا موجود متخافيش "
أنا بعيط
أنا ممتنة
ممتنة لوجوده وإنه عمره ما يسيبني لدماغي
اتكلمت باللي كنت خايفة منه
"كنت خايفة إنك تبعد زي ما ماما كانت تقول لما تعرف إني مبعرفش أطبخ
كنت خايفة أعاني زي ما كنت بعاني طول حياتي في صمت "
ابتسم وهو بيربت على راسي
"ربنا رزقنا الزواج عشان تكون بينا مودة ورحمة وسكن لبعض
لو مكنتش هبقى سكن ليكي وسط خوفك يبقى إيه الهدف
تاني حاجة مش معنى إن رزقك مكانش في أهلك يبقى تظني كل رزق ابتلاء
في ناس رزقهم مبيكونش في أهلهم بس في حاجات تانية كتير
في أدبهم احترامهم معافرتهم في الدنيا قربهم من ربنا رزقهم في شغلهم
الرزق بيتوزع بشكل مختلف وده مش معناه أقلل منك
دي إرادة ربنا وده ابتلاءك في الدنيا
ورزقك في حاجة تانية وده مش عيب طالما بتحاولي إنك تبري الوالدين وتصبري على أذاهم "
سكت شوية وبعدين ضحك وقال
"أو ممكن رزقك يكون في زوج حنين زيي!"
ضحكت معاه
"طب يلا يا رزقي في الدنيا عشان نلحق نخلص "
هند حارس
رأيكم
