اسميته تميم بقلم هند إيهاب الحبال
مفيش أي راجل يستاهلك علي فكره
بملل قالت
هند المعقده هتتكلم
عشان بقولك مش أي راجل يستاهلك أبقي معقده!!
لاء عشان عارفه شعورك أتجاه أي راجل
رفعت حاجبي وابتسمت وقلت
عشان عارفه ومتأكده أن مفيش راجل في الدنيا دي كلها يستحق قلب هند
بأنبهار قالت
واو ومغروره كمان
من حقي
قولتها وأنا بشرب بق من فنجان القهوه ودماغي سرحت للماضي
أنا مبقتش كده من فراغ كل شخص ليه ماضي في حياته يا بيغيره للأحسن يا للأوحش وحاسه أني بقيت أحسن حتي لو ببان غريبه لناس كتيره
بقيت بشوف الرجاله كلها علي أنها شخص واحد كلهم عايزين واحده تحب أكتر تستنزف طاقه أكتر يتحكم فيها وفي حريتها يعني من الأخر كده عايز واحده يشكلها علي مزاجه
مستحيل ألاقي شخص عكس كل دول شخص يعرف يعني أيه حب يعني أيه يخاف يعني أيه أحتواء شخص يعترف بغلطه
بقيت ماشيه بمقولة طول ما الراجل بيحب أكتر طول ما ششششالعلاقه بتبقي ناجحه
مفيش علاقه فاشله إلا وكانت سببها الراجل
يا أستاذه!!
بصيت ناحية الشخص وقال
عربيتك قافله علي عربيتي
ابتسمت
أنا أسفه
طلعت من الكافيه بهدوء وركبت عربيتي وطلعتها ركب عربيته وقبل ما يمشي رفع أيديه لي من الشباك ومشي
قررت أروح وقتها حسيت أن القعده مالهاش لازمه هفضل كل قعده أشرح وجهة نظري لواحده مش فهماني ولا حاسه بي
بعت لها مسدچ ومشيت
شعور أن حد يشوفك شخص معقد شعور تقيل وسيئ جدا
روحت لأوضتي أو بمعني أصح قوقعتي اللي عمرها ما خذلتني أبدا وكانت شاهده علي جميع أسراري وانهزماتي
شغلت الساوند علي كوبليه ل فضل شاكر وهو بيقول
"عملت كتير عشان خاطرك ورد فعل كان غريب تقسى على اللي بيحبك واسهل حاجة انك تسيب ودلوقتي انا هعمل زيك هبعد واقولك ده النصيب"
وبعديها غنيت معاه وقلت
وابقى قابلني لو حد استحمل طبعك اكتر من يومين ده انا ليه الجنة عشان انا عشت معاك سنين ده انت بصراحة ما تتعاشرش فكرة اسامحك ما افتكرش والراحة بعدك هالاقيها في ناس تانيين
نمت وصحيت علي صوت مسدچات كتيره أوي
صحبتي بتتكلم عن عقدتي في الجروب!!
للحظه أتضايقت وقررت متكلمش أصل هرد أقول أيه!!
نزلت الكافيه
محدش فاهمني محدش حاسس بي كله شايف أني معقده بس محدش عارف أيه السبب ولا حد جرب يسأل
دخلت الكافيه وقعدت علي ترابيزه بعيده بعيده أوي
الويتر قرب مني وقلت
واحد نيسكافيه لو سمحت
هز راسه ومشي بصيت من الشباك وأنا بحاول أكون كويسه بس للأسف حسيت بدموعي بتنزل علي خدي من غير أستأذان
غمضت عيوني وأنا بنفخ وبحاول أتمالك نفسي بس كلامهم عني خلاني مش قادره أقاوم دموعي كانت سخنه كأنها نار نازله علي خدي
خبيت عيوني لما لقيت الويتر بيقرب وبيحط كوباية النيسكافيه
مشي وكان فيه منديل جمب كوباية النيسكافيه خدته عشان أمسح دموعي
حسيت أن فيه حاجه فتحته ولقيته مكتوب
"ياللي شمس الدنيا تطلع لما تطلع ضحكه منك حسي بالناس الغلابه اللي زيي بعد أذنك"
ابتسمت ما بين دموعي وقربت المنديل لقيت عليه برفيوم كانت ريحته حلوه حلوه ومميزه جدا
قومت وروحت للويتر وقلت وأنا برفع المنديل ناحيته
حضرتك اللي كاتب لي علي المنديل!!
هز راسه برفض وقال
لاء
بصيت له ثواني وبعدين رجعت قعدت علي الترابيزه رجعت بصيت تاني للمنديل وبعديها طبقته وحطيته تحت الكوبايه حطيت الحساب علي الترابيزه ومشيت
روحت ولقيت صحبتي بتتصل بي رميت التليفون بملل علي السرير وحاولت مشغلش بالي بيها
دخلت عملت مج نيسكافيه كبير ورجعت الأوضه
لقيت مسدچ منها بتقول فيه
هنتقابل بكرا في الكافيه!!
شوفت المسدچ ومردتش بأي عين بتكلمني!! أزاي حد ممكن يأذي شخص بكلامه وأفعاله وبعديها يرجع يتكلم وكأن معملش حاجه!!
أزاي الأنسان قادر يبان بجح أوي كده!!
قررت مروحش الكافيه بكرا مبقتش حابه أشوفها طب أعملها بلوك!!
هزيت راسي وقلت أحيانا البلوك بيعطي قيمه للشخص كوني أني أعملها بلوك تبقي فرقالي وحقيقي بعد كلامها السخيف عني مبقتش تفرقلي
فضلت قاعده في البيت يومين مبنزلش كانت بتبعت لي مسدچات فينك!! مبترديش ليه!! هو أنت زعلانه مني!! أنا كنت بهزر
نزلت الكافيه وأخترت أبعد ترابيزه
وكالعاده طلبت النيسكافيه والمره دي جالي الطلب ومعاه
ثانيه واحده!!
رجع بص لي
