اسميته تميم بقلم هند إيهاب الحبال

ومسكت المنديل ولقيت مكتوب فيه
"وشك منور النهارده عن المره اللي فاتت أتمني يفضل منور العمر كله"
رفعت حاجبي وقلت
مين الشخص اللي كاتب الكلام ده!!
الحقيقه أنه كان قاعد هنا ولما جيتي سلم لي المنديل ومشي
هزيت راسي ومشي قربت المنديل من وشي وكانت نفس ريحة البرفيوم بتاعت المره اللي فاتت
يا تري أنت مين!! وليه بتكتب لي!!
عدت فتره وكل مره بروح فيها الكافيه بيجي لي منديل مكتوب عليه
لحد ما دخلت التويليت قبل ما أطلب حاجه وأنا خارجه من التويليت لقيت الويتر هو اللي بيكتب علي المنديل
هو أنت!!
كان مدي لي ضهره وأول ما سمع صوتي مسك المنديل وطبقه في أيديه وبان عليه التوتر
بص لي وهو مش عارف ينطق قربت منه وقلت
ليه بتعمل كده!!
فضل ساكت وكملت وقلت
طب ليه مقولتش أنه أنت!!
خوفت
من أيه!!
من أنك تعملي مشكله ومتجيش تاني
طب ليه عملت كده!!
هز راسه وابتسم تلقائي وقال
مش عارف بس حسيت أني عايز أعمل كده خصوصا لما لقيتك بتعيطي ومش عارف أعملك حاجه
شكرا
بص لي وهو مش متوقع مني ده وقلت
حقيقي شكرا
جيت أمشي وقفني سؤاله وقال
علي أيه!! حد غيرك كان عملي مشكله
ابتسمت وقلت
أعمل مشكله علي حاجه كانت بتهون علي!! ده أنا حتي أبقي ظالمه
ابتسم وقال
طب بما أنك كشفتيني ينفع أعزمك علي فنجان قهوه!! بس قبل ما تردي علي أحب أنك تعتبريني شخص خفيف عليكي
مظبوط
عقد حواجبه بستغراب وقلت
قهوتي بشربها مظبوط
مشيت وروحت قعدت علي الترابيزه سلم مكانه لزميله وقرب مني بعد ما عمل القهوه
قعد قصادي وقال
عايزه الصراحه أنا مبسوط
علي أيه!!
أني أتكشفت قدامك يعني موضوع المناديل دي مكنتش عارف أخرتها أيه كنت حاسس أني مش هعرف أواجهك
هزيت راسي وقال
هو أنا ينفع أعرف كنتي بتعيطي ليه يوميها!!
بصيت من الشباك وأنا حاضنه فنجان القهوه بأيدي وقلت بأبتسامه كلها حزن
أتقال عني أني معقده لسبب أني مش بقرب من أي راجل وبعمل حدود كويس أوي
رفع حاجبه وقال
ده اللي هو أزاي يعني!! هي أي واحده بتعمل حدود تبقي معقده!!
ابتسمت وقلت
أتقال عني كده
باين عليكي موجوعه مريتي بحب قديم خلاكي متثقيش في أي راجل
بصيت له بعيون مدمعه وقال
بس أقولك هو اللي خسران علي فكره أنت أقوي خليكي عارفه ومتأكده أنك مخسرتيش حاجه أنت مش معقده أنت بس محتاجه تنسي تنسي وتشوفي الناس اللي حواليكي ترجعي تثقي ولو بنسبه بسيطه
غصب عني دموعي نزلت قام بعد ما مسك منديل وقعد علي ركبته قدام كل الناس وقال
طب أهدي طيب مش عايزك تبقي كده قدام حد
فضل يمسح دموعي وقال بحنيه
أهدي أنت قويه أنت أحسن بنت وأحلي بنت
هزيت راسي وقلت
أنا قويه
هز راسه وقال
أنت أقوي بنت
ابتسمت علي منظري واتحرجت من قربه الشديد وقلت
محتاجه أدخل التويليت
قام وقف وبعد عشان أعدي مشيت ودخلت التويليت وبعديها طلعت وقررت أمشي من الأحراج اللي أنا وقعت فيه أستأذنت منه ومشيت
وصلت البيت ولقيت رقم غريب بيتصل رديت وكان هو وقلت
عرفت رقمي منين
في واحده قويه تسيب تليفونها من غير باسورد!!
ضحكت علي سذاجتي وقلت
طب وهو فيه واحد ذكي يحط من نفس البرفيوم بتاعه علي المناديل!!
أسميته تميم 
هند إيهاب الحبال