احاديث تيكتوكية بقلم لمياء شاهين 2

حواليا بدالها...
اختي اتصلت بيا وهي بتعيط.. قالت لي إن أمي راحت لكل أفراد العيلة وبلغتهم إن جالي انهيار عصبي أثناء الولادة.. والمستشفى بتغطي على القصة.. وإني خطر على كلير.. وإن آلان هددها مع إن كل اللي هي حاولت تعمله إنها تحمي كلير بس..
خالتي بعتت لي رسالة بتقول فيها إن أمي ناوية تعين محامي وترفع عليا قضية عشان تاخد بنتي مني بسبب الأمراض العقلية الموثقة اللي هي بتأكد إني مصابه بيها..
أنا معنديش أي أمراض عقلية موثقة أصلا... أنا كنت بتعالج نفسيا بالفعل.. بس ده عشان اتعلم اتعامل مع الصدمات النفسية اللي خلقتها عندي الحياة مع أم نرجسية..
تاني يوم الصبح الموظفة بتاعة الخدمات الاجتماعية اللي في المستشفى جت تتكلم معايا.. في حد اتصل بيهم وعبر عن قلقه لأني أم مش ملائمة.. الموظفة كانت بتتعامل بحياد طبعا.. بس أنا كنت متأكده إنها بتقيم كل حاجة.. بتراقب ازاي شايله كلير.. بتسأل أسئلة عن الأسرة والقرايب والأصدقاء المحيطين بينا.. عن صحتي العقلية..
الموظفة الاجتماعية مشيت وهي حاسه بالرضا إن كل حاجة كويسه.. أمي بالفعل بتحاول تاخد بنتي اللي لسه مولوده مني.. لأني بطلت اخليها تتحكم في حياتي.. قعدت في سرير المستشفى وأنا بتفرج على بنتي وهي نايمه.. كنت بعيط من غير صوت..
آلان مسك أيدي وقالي إننا محتاجين نعمل لأمي محضر عدم تعرض.. وإن سلوك أمي عدا كل الخطوط.. وإننا محتاجين نحمي أسرتنا بشكل قانوني..
وده لأن من ساعة واحده ابن عمي كيني اتصل وكان منزعج جدا.. سأل لو كنت كويسه.. ماكنتش فاهمه فيه ايه والا بيكلمني ليه.. لحد ما حكى لي إن أمي راحت له البيت وهي في حالة هيستيريا.. وبتدعي إن معاها دليل إني بأذي كلير..
ولما طلب منها يشوف الأدلة دي.. وريته صور لكلير وهي بشرتها حمرا وده طبيعي للأطفال اللي لسه مولودين..
الصور كانت متاخده بالفعل من أوضتي في المستشفى.. وواضح إننا ماكناش واخدين بالنا.. والصور اللي اتاخدت اتعمل عليها تعديلات عشان يبان إن فيها حاجة اسوء..
كيني قال لها إن اللي هي بتعمله ده مش صح وإنها تخطت الحدود.. ف صرخت فيه وقالت له إنه واقف في صفي على حساب مصلحة العيلة كلها.. وإن واضح إن مفيش أي حد غيرها في العيلة كلها مهتم بمصلحة كلير.. كيني طردها من بيته ومرضيش يسمع لها أكتر.. واتصل بيا يحذرني..
الست دي دمرت حياتي بكل معنى الكلمة.. حرفيا قضت حياتها كلها عشان تخليني أحس إن ماليش قيمة.. خربت فرحي لما جت بفستان أبيض وأعلنت في الحفلة إنها اتخطبت وطلعت بتكدب.. حاولت تخلي حفلة هدايا البيبي حوالين نفسها.. انتقدت كل قرار أخدته في حياتي. . فضلت طول مدة الحمل تقولي أد ايه هبقى أم بشعة لأني أنانيه ومش مستقرة نفسيا..
ودلوقتي بتحاول بكل
جهدها تاخد بنتي مني.. بصيت لآلن وقولت له انا خلاص اكتفيت.. اكتفيت تماما.. مفيش فرص تانية.. مفيش تأنيب ضمير.. مفيش أي حاجة لها عندي
آلان حاول يكون جنبي عشان اتخطى فكرة الأم المثالية اللي بحاول أتمسك بيها واقتنع بالأم اللي عندي.. وأشوفها على حقيقتها إنها نرجسية.. أنانية.. متلاعبه.. ومش بتشوفني على إني بنتها.. بتشوفني على إني حاجة من ممتلكاتها..
اتصلنا بالمحامي وأنا لسه على سرير المستشفى.. وبمجرد ما هطلع بكره هعمل لها محضر عدم تعرض.. عملت لها بلوك من كل حاجة أنا وآلان.. وبلغت كل أفراد أسرتي إن قدامهم حل من اتنين.. يا يحترموا حدودي وحدود أسرتي... يا ينسوا أي علاقة ممكن تجمعهم بيا أو ببنتي كلير..
احاديث_تيكتوكيه
LamiaaShaheen