إزاي فضحت بنت خالتي نقلا عن لمياء شاهين

جت فقرة إن أصحابي والأشبينات يقولوا كلمة بسيطة.. المفروض إنهم بيباركوا أو يتمنوا لنا حياة سعيدة.. أو يقولوا حاجة مضحكة..

جاسمين وقفت وقالت "انا عندي حاجة عايزة أقولها".. الكل سكت وانا فكرت يمكن تكون عايزة تحكي أي حاجة حلوة من طفولتنا..

بس بدل ما تقول أي حاجة كويسة.. مسكت المايكرفون وقالت "أنا بس عايزة أقول إن في ناس بيكونوا هيموتوا ويتجوزوا لدرجة إنهم بيوافقوا على أي حد.."

بعدها بصت مباشرة لبراد وكملت كلامها "أنا أقصد إن جوازتكم دي مش هتبقى أطول من جوازتي الأولانية.. يعني مش هتكملوا 8 شهور سوا.."

بعدها

بدأت تضحك كأنها قالت أحلى نكته.. القاعة كلها كانت ساكته.. كنت فاتحه بقي ومتنحة مش فاهمه ايه اللي هي بتقوله ده!! وش براد بقى أحمر.. المصور وقف الكاميرا وبطل تصوير..

شوفت أمي وهي بتتحرك ناحيتها عشان تقعدها.. بس جاسمين مقعدتش وكملت "على الأقل أنا لما اتطلقت.. أخدت القرار بسرعة.. بدل ما أجر كل اللي حواليا وأوهمهم لسنين إني سعيدة.."

ساعتها مقدرتش اسكت.. وقفت وروحت ناحيتها وشديت المايك من أيدها.. الأوضة كلها كانت مبرقه بتبص علينا..

أيدي كانت بتتهز بس أنا كنت غضبانة جدًا وحقيقي مش فارق معايا أي حد موجود.. قولت

"جاسمين بما إننا بنشارك نصايح عن الجواز.. ليه متقوليش لكل الموجودين ليه تايلور طلقك؟؟"

القاعة كلها فعلًا كانت مترقبة الكلام اللي هقوله في صمت تام..

كملت وقولت لها "هو أنا المفروض أقول ازاي تايلور اكتشف الرسايل على تليفونك؟ أو عايزة تشرحي لتيته ليه مشي وساب البيت بعد ما جمع كل حاجته وإنتي في الشغل؟"

وش جاسمين بقى أصفر.. حاولت تشد مني المايك تاني.. بس أنا أخدت خطوة بعيد عنها وكملت "لأني على حسب ده ميخليكيش خبيرة في النصايح الزوجية والا ايه؟؟"

اديت المايك لواحدة من صاحباتي بعد ما قولت "انا اسفه يا جماعة.

. من فضلكم كملوا الاحتفال معانا"

باقي الحفلة كانت غريبة جدًا.. ناس كتير كانت بتبارك لي لأني رديت على جاسمين.. والباقيين كانوا قاعدين في حالة من الصدمة وعدم الارتياح..

جاسمين مشيت مباشرة بعد ما قولت الكلام اللي عندي.. كانت بتعيط وتصرخ عشان تلفت نظر الكل لها أكتر..

بس مش ده أسوء حاجة.. أسوء حاجة إن محدش في العيلة كلها كان عارف سبب طلاق جاسمين وخيانتها لجوزها..

تايلور طليقها صاحب براد وهو اللي قاله على اللي حصل.. وبراد حكى لي.. ف لما قولت الكلام ده قدام العيلة كلها في فرحي.. أنا تقريبًا فضحتها قدام الكل.

.

#احاديث_تيكتوكيه
#LamiaaShaheen