اسكرييت كامل بقلم أية حمام

_آية أنا عايزك أنا بحبك. 
_وأنا مابقتش عارفة أعمل إيه!
_حاربي علشاني. 
_مين قال إني مش بحارب.. 
_ضعفك واستسلامك. 
_غيث إفهمني أنا بنت في مجتمع شرقي يعني لو كسرت الخمسة وعشرين وكنت لسة مش متجوزة فيه كمية كلام وتلقيحات هتتقال عليا في الراحة والجاية ومن القريب قبل البعيد.. 
_بس.. 
_عارفة عارفة إننا مش بنهتم لكلام الناس بس أنا إنسانة وهتوجع أنت رجل يعني لو فضلت لبعد التلاتين من غير جواز هيبقى أمر طبيعي بل ممكن يتبرر لك كمان لكن أنا العكس.. 
نفسي أتجمع بيك في بيت واحد بعيد عن كل الناس بس أنا مغلوبة! 
_آية أنا مش هقدر أخسرك حاولي مع أهلك وأنا هكلمهم تاني وتالت وكدا كدا أنت عارفة إني بدأت أشتغل. 
_أنا راضية أعيش معاك على جبنة وخيار يا غيث راضية لو هزهد من الدنيا كلها ليك أنت.
خلصت كلامي وأخدت كتبي ودفاتري وقومت مشيت بسرعة دموعي نزلت ف مسحتها بسرعة ورفعت راسي

لفوق أدعي ربنا يحلها من عنده.
_إتأخرتي ليه 
_السكشن طول. 
_طيب غيري وتعالي.
دخلت غيرت هدومي وصليت وخرجت علشان الغدا كنت قاعدة معاهم لكني ساكتة.. لحد ما اتكلم بابا.
_فيه عريس متقدم لك يا آية. 
_لما أخلص الجامعة يا بابا.. 
_اتخطبوا واتعرفوا على بعض على ما تخلصي السنة دي وقضي السنة الأخيرة معاه. 
_بس أنا.. 
_مبسش هييجي وهتقعدي معاه. 
_بابا أنا مش عايزة أرجوك بلاش تجبرني! 
_أجبرك هو لما أكون عايز أتطمن عليك أبقا بجبرك أنت ال بتجبريني أعمل كدا برفضك المستمر. 
_وأنا مش هرتبط بشخص أنا مش عايزاه حرام تظلمني وتتسبب في ظلمي له!
قولت كلامي ودخلت أوضتي قعدت أعيط لحد ما دخلت ماما وقعدت قصادي واتكلمت
_نهايته يا آية 
_أنا مش عايزة مش عايزة ارحموني. 
_بس ال أنت عايزاه مش هيريحك 
_قصدك إيه 
_قصدي الواد ال بتحبيه وبيضحك عليك عايزة تتجوزي عيل لسة بيدرس هيصرف عليك ويعيشك بإيه بورق الكتب ال بيدرسها 
_بس غيث مش عيل دا رجل.. أها بيننا سنة بس هو رجل شقته جاهزة وناقص في عزالها جزء صغير وبعدين هو بدأ يشتغل لحد ما يتخرج ويتوظف في مجاله. 
_وأنت بقا عايزانا نرميك لواحد لسة هيبدأ ينزل الساحة مع الدنيا 
_مش بابا عايزني أتخطب سنة الأول يبقى غيث يخطبني سنة ويتخرج يتوظف وبعدها نتجوز. 
_دا مش كلام ناس عاقلة أبدا دا عته. 
_ماما أرجوك.. 
_بلا ماما بلا بابا إعقلي وسيبك منه واختاري ال هيعيشك مرتاحة طول العمر إختاري رجل.
قالت كلامها وخرجت من الأوضة ف نمت وأنا بكمل عياط وجوايا خوف لكن حاسة ربنا مش هيوجعني ربنا رحيم!
_أنا نازلة الصيدلية..
نزلت وروحت وخرجت أتمشى في الهوا والليل وقفت شوية في مكان هادي وقعدت جنب شجرة أبص للقمر والنجوم والسما السما باليل من غير النجوم والقمر بتكون كئيبة جدا لكن بيهم بتكون جميلة أوي بتكون لوحة لطيفة هادية تخلي ال يبص عليها مش عايز يبعد عينه عنها أبدا.
_دي دموع وجع الحب
فوقت من شرودي على السؤال دا بصيت جنبي بسرعة وكانت واحدة قاعدة جنبي رفعت إيدي ومسحت دموعي قبل ما أرد عليها
_ومين حب ومانزلتش دموعه 
_معاك حق المهم يكون حب مش سام! 
_هو دوا كل السموم بس محدش راضي إنه يكمل! 
وفي نفس الوقت مش عارفة أتجاوز معاه علشان حرام حتى لما بيحصل حوار لدقايق ببقا شايلة ذنب كبير ومش راضية عن نفسي. 
_تسمعي عن قصة حب اتنين الدنيا كلها فرقت بينهم بكل الطرق وفي النهاية فازوا عليها
هزيت راسي ب لاء ف بدأت هي تحكي
_كان أكبر منها ب سبع سنين لما اتولدت مكانش حد عارف يشوف عيونها كويس هو الوحيد ال لما شالها فتحت عيونها وأسرته بنظرتها دي.. 
كانت بنت خاله كانت بتكبر قدامه وبيكبر في قلبه حبه ليها كبرت هي كمان واتعلقت بيه أكتر من أي حد تاني بس لسوء الحظ حصلت مشاكل كبيرة في العيلة خلتهم يقاطعوا بعض بعدوهم عن بعض والأحرى إنهم بعدوا روح كل واحد فيهم عنه..