دخلنا اخت مراتي بقلم الهواري

دخلنا أخت مراتي بيتنا من باب العطف.. بس بعد شهرين، اكتشفت حقيقة دمرت حياتنا!
أنا ومراتي ليلى عايشين في شقة صغيرة أوضتين في مدينة نصر. عيشتنا كانت على قدنا، بس فيها راحة وهدوء ورضا. أنا فني في شركة في المعادي، وليلى بتبيع حاجات أونلاين من البيت، وكانت ست بيت شاطرة، منظمة، وبتعرف تمشي الدنيا حتى لو بإمكانيات بسيطة.
كنا بنضحك من قلبنا، نطلب أكل سوا، ونسهر نتفرج على فيلم.. لحد الليلة اللي كل حاجة اتغيرت فيها.
مكالمة من حماتي في وقت متأخر يا ابني، أختها هناء لسه جاية القاهرة ومالهاش حد.. خليها تقعد عندكم كام يوم لحد ما تقف على رجليها.
صوتها كان هادي.. بس فيه رجاء ميتقالش عليه لأ.
بصيت لليلى.. كانت مترددة، بس في عينيها خوف على أختها. هزت راسها بالموافقة، وأنا وافقت.. من غير ما أعرف إن القرار ده هيقلب حياتنا.
جت هناء.
من أول يوم، حسيت إن في حاجة مش مريحة. بنت صغيرة، 21 سنة، ماكملتش تعليمها، مالهاش هدف، ومش فارق معاها أي نظام. حاولت أديها فرصة.. يوم، اتنين، تلاتة.. بس الموضوع بدأ يكبر.
تصحى بعد الضهر، تطلب أكل دليفري طول اليوم، تسيب هدومها في كل مكان، وتشغل مزيكا بصوت عالي لحد الفجر. شقتنا الهادية اتحولت لفوضى.
كنت برجع من الشغل تعبان، ألاقي

الدنيا مقلوبة مواعين في الحوض، ريحة أكل بايت، وهدوم على الكنبة. ليلى تحاول تكلمها بهدوء يا هناء ساعديني شوية في البيت..
ولا كأنها سامعة.
عدى أسبوع.. واتنين.. والنوم بقى بالعافية. ساعات تجيب صحابها من غير ما تستأذن، ودخلت مرة لقيت ناس غريبة قاعدين في الصالة بياكلوا!
بصيت لليلى، قالتلي بحزن كلمتها كتير.. بس مش بتسمع.
كنت ساكت عشان خاطرها.. بس جوايا كان بيغلي.
لحد اليوم اللي كل حاجة فيه وقفت.
صحيت الصبح، بفتح الدرج أجيب محفظتي.. مش موجودة.
قلبت الشقة كلها.. مفيش.
سألت ليلى، اتوترت، وبصينا سوا ناحية أوضة هناء.
الباب مقفول والمزيكا شغالة.
خبطت.. مفيش رد.
فتحت الباب.. لقيتها نايمة، والموبايل في إيدها، وعلى جنبها شنط جديدة.
فين محفظتي؟
فتحت عينيها بتقل وقالت ببرود معرفش.
قربت من الشنط.. فتحت واحدة.. لقيت لبس غالي، مكياج.. وفوقهم محفظتي!
في اللحظة دي، حسيت إن في حاجة جوايا اتكسرت.
إنتي خدتي الفلوس؟
قعدت وقالت بمنتهى الهدوء أنا استلفتهم.
من غير ما تقولي؟!
ردت بلامبالاة ما إحنا أهل.
ساعتها فقدت أعصابي لمي هدومك.. واطلعي بره بيتي حالًا!
صوتي كان غريب حتى عليا.
ليلى دخلت بسرعة استنى بس.. خلينا نحل الموضوع بهدوء!
بصيت لها وقلت بكل حسم اختاري يا ليلى.. يا أنا، يا هي.
سكتت.
ثانية.. اتنين.. تلاتة...
وهناء واقفة بتبص لها بثقة غريبة.
وفجأة.. ليلى قالت بصوت مكسور مش هقدر أطردها...
اتصدمت.
ليه؟!
دموعها نزلت وقالت عشان أنا السبب في اللي هي فيه...
سكتنا.
وبصتلنا هناء لأول مرة من غير تحدي.. كان في عينيها وجع.
ليلى كملت هناء كانت بتدرس.. وأنا اللي ضغطت عليها تسيب التعليم وتشتغل معايا عشان نعرف نعيش.. وبعدها سيبتها لوحدها وسافرت معاك هنا. هي ضاعت مني.. وأنا اللي بوظت مستقبلها.
الغضب اللي جوايا بدأ يهدى.. وحل مكانه فهم.
بصيت لهناء وقلت بهدوء الغلط مش مبرر للسرقة.
سكتت.. وبصت في الأرض.
ليلى مسكت إيدي إدينا فرصة نصلحها سوا.
خدت نفس طويل...
وقلت تمام.. بس بشروط.
بصوا لي الاتنين.
مفيش فلوس تتاخد من غير إذن. مفيش صحاب في البيت. وفي نظام يمشي عليه الكل. وأهم حاجة.. هناء ترجع تكمل تعليمها.
هناء رفعت عينيها لأول مرة ولو موافقتش؟
بصيت لها بثبات يبقى تمشي.
سكتت شوية.. وبعدين قالت بصوت واطي هحاول.
ومن اليوم ده.. بدأت رحلة صعبة.
مكانتش سهلة.. بس كانت بداية.
وبعد شهور.. البيت رجع هادي.. يمكن أحسن من الأول.
وهناء؟
رجعت تدرس.. وابتدت تبني نفسها من جديد.
وأنا اتعلمت درس عمري ما هنساه
مش كل اللي بندخله بيتنا بدافع العطف بيكون صح
بس أحيانًا.. الفرصة التانية بتفرق بين إنسان يضيع.. وإنسان يتصلح هناء قالت هحاول... بس الحقيقة إن المحاولة ماكنتش سهلة خالص.
أول أسبوع عدّى كان مليان توتر.
البيت ساكت زيادة عن اللزوم، كل واحد ماشي على أطراف صوابعه. ليلى بتحاول تصلّح، وأنا بحاول أهدى، وهناء كانت تايهة.
في أول يوم صحيت بدري شوية، لقيتها قاعدة لوحدها في الصالة، من غير مزيكا، من غير موبايل حتى بصالي بسرعة ووطّت راسها.
أول مرة أشوفها ساكتة كده.
قلت لها بهدوء في إيه؟
ردت بصوت واطي مش عارفة أبدأ منين
قعدت قدامها وقلت ابدئي بأي حاجة بس المهم تكمّلي.
اليوم ده كان نقطة تحول صغيرة بس حقيقية.
بعدها بكام يوم، ليلى جتلي بابتسامة خفيفة تصدق؟ هناء غسلت المواعين النهارده من غير ما أقولها.
بصيت لها باستغراب بجد؟
ضحكت آه وحتى رتبت أوضتها.
بدأت أحس إن في تغيير بسيط، بس موجود.
لكن الاختبار الحقيقي جه بعد أسبوعين.
رجعت من الشغل، لقيت الباب مفتوح شوية.
قلبي وقع.
دخلت بسرعة لقيت الشقة متروقة، بس في صوت بكاء جاي من الأوضة.
دخلت لقيت هناء قاعدة على الأرض، ووشها كله دموع.
ليلى جنبها بتحاول تهديها.
أول ما شافتني، هناء قالت أنا عملت مصيبة
اتوترت إيه؟
طلعت ورقة من شنطتها وادتهالي.
كانت استمارة تقديم في معهد.
وقالت قدمت واتقبلت بس لازم أدفع المصاريف خلال