اسكريبت بقلم أية حمام 1
_أنا عايزة أخلف يا غيث.
_أنت هتغدينا إيه النهاردة
_غيث!
_نعم يا حبيبتي.
_أنا مش بهزر ممكن تاخد كلامي بجدية أكتر.
_ما أنا لو أخدته بجدية أكتر هنتخانق يا آية وأنا مش حابب كدا.
_وأنا مش حابة الوضع دا يا غيث.
_حبيه علشان يحبك يا حبيبتي.
رجع يكمل بص في اللاب توب ال قدامه ف اتعصبت جدا وقربت قفلته جامد ومسكته رميته على الكنبة ال جنب السرير بنرفزة ف خلع النضارة ورجع يتكلم ببرود
_هي دي هرمونات
_متعصبنيش.
_هو أنت كدا مش متعصبة إعقلي يا آية وإهدي كدا وخشي خدي شاور يمكن الماية تهدي أعصابك.
_أنا مش متحركة غير لما توافق على ال عايزاه يا غيث.
_وأنا مش هوافق يا آية وأعتقد سمعتيها مني بدل المرة ألف.
_يبقى أنت أناني.
_أنا أناني!
هزيت راسي ب آه وأنا بحاول أتحكم في دموعي لكن غصب عني قعدت على السرير وبدأت أعيط قرب مني رفع وشي وبص في عيني واتكلم
_لو ال بعمله دا أنانية ف أنا مبسوط إني أناني.
خلص كلامه وخرج برا الأوضة وثواني سمعت صوت قفل الباب بتاع الشقة ف حطيت وشي يين كفوفي وقعدت أعيط أنا حاسة بيه وعارفة إنه بيحبني وبيعمل كدا بسبب خوفه عليا بس أنا مبقتش قادرة أتحمل!
فات حوالي ربع ساعة وأنا على نفس حالة العياط
خلصت وكان لسة مرجعش وبدأت أقلق حتى الموبايل كان سايبه هنا!
دخلت آخد دش علشان أشتت تفكيري تحت الماية وبعد ربع ساعة خرجت لقيته قاعد على السرير بصيت عليه من غير كلام وقربت قعدت على كرسي التسريحة وبدأت أنشف شعري قبل ما أسرحه.
_هديتي
بصيت له في المراية ومجاوبتش على سؤاله ف اتحرك وقرب مسك مني المشاطة وبدأ يسرحه هو وبدأت دموعي أنا تنزل.
_أنت عارفة إني بحبك.
وعارفة إني معنديش أغلى منك.. دايما بحس إنك جزء من روحي وقلبي مكنتش متخيل أوصل في الحب للدرجة دي مع أي إنسان بس سبحان ال زرع حبك جوايا وخلى حتى النفس وأنت مش معايا يبقى كإنه بيخنقني!
بيتكلم بحنية بتدوب قلبي زي كل مرة نبرته واحساسه بيوصلوا لي وبيأكدوا لي إني فوزت بحبه وإنه مش بيحبني لإني مراته وخلاص بل بيحبني كإني روحه بجد!
خلص وعمل لي الضفيرة على جنب وبعدها باس راسي ورجع يتكلم تاني
_علشان خاطري بلاش تفكري تاني في حاجة أنت عارفة إنها بتضايقنا.
لفيت له واتكلمت ودموعي لسة مستمرة اتكلمت بكل التعب والخنقة ال جوايا
_أنا تعبت مش معترضة على أمر ربنا والله بس الوقت بيعدي وأنا خايفة أموت
سحبني له بسرعة واتكلم بعصبية خفيفة
_ممكن تسكتي!
السيرة الزفت دي متنطقيهاش تاني لو سمحت.
_يا غيث إفهمني بقالنا أكتر من سبع سنين متجوزين ومعندناش طفل الأمر صعب عليا.. سواء من كلام بسمعه من أهلي أو من أهلك أو سواء مشاعري لما بشوف أي أم في الواقع أو على الميديا..!
_وهو أنا ال بالنسبة لي الموضوع بسيط ما هو صعب عليا برضه إن ميكونش عندي طفل من الانسانة ال بحبها بس دي رغبة ربنا ال أكيد خير لينا أعترض بقا على ربنا علشان يحصل شيء يضرنا
_مقولتش كدا بس على الأقل نحاول!
_قصدك أرميك في الهلاك.
كام دكتور قالت لنا إن الأمر فيه خطورة كبيرة عليك كام مرة سمعنا إن حالتك الصحية مش هتتحمل
_محدش يعرف المستقبل والغيب غير ربنا أنا بقول نتوكل عليه ونمشي الطريق سوا وإحنا بنطمن وبنسند بعض!
_مش شايفة أنت إن دي أنانية!
إنك تختاري طريق احتمال كبير نهايته تكون إنك تسبيني لوحدي فيه مش شيفاها أنانية!
_أنا مش شايفة غير وجعي وغير إني تعبانة.
_طب ممكن نكمل كلام في وقت تاني وتهدي
قام فتح درج الكومودينو جاب منه العلاج وخرج جاب كوباية ماية ودخل وإداني هو العلاج بنفسه ومسح دموعي وإتكلم بهدوء
_روقي
حاولت أبتسم بهدوء وخرجت معاه وقعدنا أكلنا وبعدين قعدنا قدام الشاشة شوية لحد ما نمنا.
أنا بحبه جدا وهو كمان بيحبني أكتر بس كل مشكلتي هو حوار عدم انجابي لطفل مننا أنا متشخصة إني مريضة قلب تاجي ودا هيكون فيه خطورة جدا على حياتي لو حصل حمل خاصة إن اتنين من عيلتي زمان كانوا مصابين زيي ولما أخدوا ال risk للأسف فقدوا حياتهم ولذلك غيث عامل إكس على الموضوع دا ورافض حتى مجرد الكلام فيه!
_صباح الخير يا حبيبتي.
_صباح النور يا روحي.
_بتقرئي إيه في اللاب على الصبح كدا
_عادي يا حبيبي المهم.. قوم غسل يلا على ما أجهز الفطار.
قام وأنا كمان قفلت الجهاز وخرجت جهزت الفطار وفطرنا وبعدها جهزت له لبسه وساعدته لحد ما خرج على شغله.
بعد ما نزل رتبت الشقة وجهزت الغدا وركنته وبعت له إني هنزل أقابل واحدة صاحبتي ولبست ونزلت.
_إتفضلي يا مدام آية.
_شكرا.
اتحركت وأنا بحاول أهدي نفسي ودخلت قعدت قدامها.
_عاملة إيه بتشتكي من حاجة
_أنا كويسة بس في نفس الوقت مش كويسة.
_يعني إيه..
_يعني أنا عايزة أخلف وغيث مش موافق وأنا جاية أقول لك إني هقنعه نيجي لك علشان تقنعيه يوافق!
_بس يا آية..
_
