اسكريبت بقلم أية حمام 1

من سبع سنين وال زيي أولادهم بقوا في المدارس دلوقتي! 
_يا حبيبتي إحنا بنتكلم علشان صحتك وعمرك! 
_أنا قريت إنه ينفع أحمل عادي بس أكون متابعة معاك وفيه خطة علاجية. 
_بس نسبة النجاح ضعيفة! 
_لو واحد في المية أنا واثقة في ربنا وعندي أمل فيه.
هزت راسها باستسلام ف ابتسمت لها بهدوء وأخدت منها ميعاد تاني ورجعت البيت يادوب غيرت هدومي وصليت العصر وكان جه لاحظت إن ملامحه متضايقة شوية ف حطيت الأكل على ما غير هدومه وبدأنا ناكل وسألته
_أنت كويس يا حبيبي 
_أيوا. 
أنت أخدتي علاجك. 
_أيوا.. بس أنت متأكد إن مفيش حاجة مضايقاك أو مزعلاك 
_بعد الغدا هنقعد نحكي شوية.
هزيت راسي وكملنا أكل وبعد ما خلصنا شطفت الأطباق وعملت عصير وخرجت قعدت جنبه أسأله عن حاله تاني
_مالك بقا إيه ال مزعلك 
_أنت..! 
_أنا 
_أيوا آية هو أنت كنت بتقرئي إيه الصبح على اللاب
إتوترت شوية وقبل ما أجاوبه شاور بإيده واتكلم هو
_وبلاش تكذبي عايز الحقيقة. 
_كنت بشوف نسبة نجاح الحمل لو حصل وعرفت إن فيه أمل. 
_إحنا مش لسة متكلمين من يومين في الموضوع دا وكنا قفلناه يا آية أنت ليه بتحبي توجعينا كدا 
_أنا مش بحب أوجعنا أنا بحب ألاقي أي أمل أمسك فيه علشان نبقى أب وأم! 
_فيه مليون طريقة تانية زي إننا نجيب طفل نربيه يكون ابننا برضه ونبقى عايشين معاه بدل ما نمشي في طريق يكون نهايته ابن موجود وأم مش موجودة!
لاحظت إنه بدأ يتعصب ف مسكت الموبايل ورنيت على ليلى
_أنا آسفة يا ليلى عارفة إن ميعادنا كمان يومين بس أنا محتاجاك. 
_أنت كويسة طيب حاسة بتعب 
_أنا بخير متقلقيش هفتح بس الإسبيكر وقولي ل غيث إنه ينفع أحمل. 
_آية تقدر تحمل يا غيث لكن هيكون فيه خطة علاجية ومتابعة مشتركة معايا ومع الدكتور ال هتتابع معاها الحمل والولادة.. 
_بس دا مكانش كلامك يا ليلى أنت والدكاترة ال قبل كدا 
_هو نفس كلامنا يا غيث أنا لسة مخلصتش.. كل دا هيحصل بس في الأول لازم تكونوا عارفين إن نسبة النجاة ضعيفة علشان كدا طول الوقت ال فات بقول إنه بلاش أفضل لكن مراتك بقا مصممة! 
_ونسبة النجاة دي مضمونة يا ليلى 
_مش هكذب عليك هي ضعيفة بس في الأول والآخر دي أقدار ربنا.. 
المهم أنتم فكروا بهدوء مرة واتنين وعشرة وأيا كان قراركم أنا معاكم وهحاول أبذل كل جهدي علشانها وعلشان تكون بخير. 
_تمام يا ليلى تسلميلي يا حبيبتي آسفة لو أزعجتك.
قفلت معاها وبصيت له واتكلمت
_اتطمنت 
_أتطمن إيه بتقول لك نسبة النجاة ضعيفة.. 
بعدين هي مش ليلى بنت عمتك دي مامتها إتوفت وهي بتولدها بسبب كدا برضه يبقى أتطمن إزاي.
دماغه أنشف من حجر الماس وهيغلبني على ما أقنعه لذلك قربت منه أكتر ورفعت إيده الاتنين بوستهم وإتكلمت وأنا لسة مسكاهم
_ممكن نفقد ذاكرة الحياة ال فاتت كلها وممكن نعتبر إني مش تعبانة كإن مفيش كلام دكاترة مخوفنا كإننا في أيام زمان ومنعرفش أي حاجة غير إننا زوجين عايزين نخلف طفل وهنتوكل على الله ونسلمه أمرنا! 
صدقني ياما فيه حالات المستحيل فيها اتحقق بمعجزات وقدرة ربنا. 
علشان خاطري يا غيث لو بتحبني بجد وافق وخلينا نمشي الطريق دا وإحنا إيدينا في إيد بعض.
فضل باصص لي شوية وبعدها اتنهد وضمني ليه جامد حاسة بخوفه لإن أنا كمان خايفة أكتر منه بس لازم أداري خوفي.
_أنت كويسة 
_دايخة وصدري بيوجعني. 
_طب كلمي ليلى وعرفيها هنروح لها.
كان فات أربع شهور على الليلة دي واليوم حاسة إني تعبانة أوي أكتر من أي يوم تاني لدرجة إني متحركتش من السرير لحد ما هو جه من الشغل. 
جهزت ونزلنا نروح لها المستشفى علشان تكون دكتور متابعة الحمل هي كمان موجودة..
_إيه الأخبار يا ليلى هي كويسة
بصت للتانية وكانوا بيتكلموا سوا بصوت هادي لكن هو كان واقف جنبي وماسك إيدي جامد رفعت راسي له أطمنه بعيني لحد ما قربت مننا ليلى واتكلمت
_زي ما كنا متوقعين الحمل صعب جدا وطبيعي يأثر عليك وتتعبي كل شوية. 
_لو فيه خطر عليها يبقى بلاش من دلوقتي يا ليلى. 
_غيث.. 
_أسكتي دلوقتي لو سمحت. 
_الموضوع مش كدا يا غيث برضه لإن لو لا قدر الله حصل إجهاض هيكون فيه نفس خطر الولادة برضه. 
_والحل 
_إحنا هنغير لها نوع العلاج وهنفضل متابعين كل شوية برضه أهم حاجة الراحة وتحافظ على الأكل الصحي والتمارين الخفيفة علشان تنشط الدورة الدموية.. 
أنا مش عايزة أخدعكم وفي نفس الوقت مش عايزة أقلقكم بس برضه آخر تلات شهور هيكونوا أصعب مرحلة في الرحلة كلها. 
هروح أجيبلكم روشتات العلاج وأنت ساعدها يا غيث ونتقابل برا.
هز راسه لها وبص لي بعتاب وساعدني أعدل هدومي وخرجنا سوا أخدنا الروشتات منها ونزلنا ركبنا العربية وهو ساكت طول الطريق بس تنهيداته ال بين الدقيقة والتانية عرفت منها إنه مخنوق ومتضايق على الآخر لذلك فضلت ساكتة. 
ركن العربية ونزل جاب العلاج ورجع واتحركنا للبيت. 
وصلنا وساعدني أبدل هدومي وخرج يعمل أكل ورجع بعد شوية يأكلني وإداني العلاج وكل دا وهو على نفس حالة السكوت والغضب ف مسكت إيده ونديت ب اسمه
_غيث. 
_نعم.. 
_هتفضل مخاصمني كدا علطول 
_أنا مش قادر أتقبل الواقع أصلا مش قادر أتقبل فكرة إني وافقتك وسمعت كلامك! 
_يا حبيبي صدقني أنا كويسة أنا مش بيتعبني ولا بيزعلني غير زعلك مني وخصامك ليا يا غيث. 
_وأنا مش بقدر أستحمل فكرة تعبك يا آية. 
_علشان خاطري إنسى أي أفكار سلبية

وركز في إن بعد شهور هتكون حتة من روحنا في حضننا ومبسوطين. 
_أتمنى يا آية تكون هي دي النهاية علشان أنا ال متوجعش أتمنى بجد.
بصيت له وطمنته وأنا بشد على ضمتي لإيده وبأمن على كلامه الأخير.
_لازم تولد حالا جهزوا الأوضة بسرعة! 
_هي أهم يا ليلى.
كنت في نهاية الشهر السابع وبداية التامن التعب بدأ يزيد فعلا وأنا حالتي مش أحسن حاجة أها بحاول م أبينش إني بتألم والموضوع صعب علشان غيث مش يقلق.. لكن فيه أوقات مش بيقدر الإنسان يكتم فيها أكتر من كدا. 
ودا كان حالي آخر فترة كنت مش قادرة أداري أكتر من كدا وحاولت أستحمل الشهر السابع ينتهي علشان الخطر يقل شوية لكن النهاردة من بدايته وأنا حاسة إني حقا يا هموت يا هموت برضه! 
_آية أنت معايا أنت حاسة بال حواليك
كان بيكلمني بخوف سامعة صوته وحاسة بيه

بس مش قادرة أجاوبه أطمن قلبه عليا حاسة إني السبب في كل ال هو حاسس بيه وفي كل القلبان ال بيحصل دا..
شوية ودخلت أوضة الولادة وأنا خايفة جدا من النهاية لكن بعد فترة قليلة حسيت بيه جانبي إتطمنت بوجوده وبقيت بدعي ربنا إنه ميوجعناش وتكون النهاية مرضية لنا.
_آية..! 
_لسة يا غيث مش هتفوق دلوقتي العملية مكانتش سهلة.. سيبتها تاخد وقتها. 
_يعني هي كويسة 
_اتطمن والله. 
المهم حابب تشوف البيبي 
_لما هي تفوق نشوفها سوا.
_غيث.. 
_حبيبتي أنت كويسة 
_بنتي.. 
_كويسة يا حبيبتي ومستنيك تفوقي علشان نشوفها سوا.
هزيت راسي ورجعت إتكلمت بدموع
_كنت خايفة خفت ملحقش أشوفها وأشوف فرحتك بيها. 
_أنا ال كانت روحي مسحوبة مني يا آية وحاسس بخنقة لحد ما فتحتي عيونك دلوقتي.. مفيش حاجة كانت هتفرحني لو مكنتيش معايا. 
_ربنا يديمك ليا يا حبيبي.
بدأت أتحسن تدريجيا وقدرت أشوفها كانت زي القمر ال منور السما الضلمة كانت زي أجمل وردة وسط زرع كتير وهي مغطية عليه.. أنا حسيت إني بحبها من قبل ما أشوفها وليه لاء وهي حتة من روحي وروح حبيبي.. ويمكن لذلك اختارنا لها اسم روح لإنها فعلا عبارة عن روحنا إحنا الاتنين بس في جسم تالت!
_نامت 
_الحمدلله طول اليوم كانت بتتنقل كتير وأكيد الدوشة ضايقتها. 
_من فرحة الكل بيها.
النهاردة كان فات حوالي عشر أيام على خروجنا من المستشفى كانت العيلتين موجودين يباركوا ويهنوا وكان اليوم شوية مهلك.
_أنا مبسوطة. 
_مش عايز أكتر من كدا. 
_الحمدلله يا غيث إنك وافقتني واتوكلنا على الله وإن ربنا جبر بخاطرنا ومش وجعنا. 
_الحمدلله يا حبيبتي بس أنا مش هقدر أخاطر بحياتك تاني.. أنا كنت حاطط إيدي على قلبي طول الفترة ال فاتت من ال هيحصل. 
_متخافش يا حبيبي ال بيتوكل على الله مستحيل يصيبه سوء ربنا رحيم وودود بعباده. 
_ربنا يراضيني فيك ويديمك ليا أنت وبنتنا ومش يوريني فيكم أي تعب أو شر أبدا.
بوست إيده وأنا بأمن على دعائه وبتمنى أفضل باقي عمري في نفس الدفا دا وإن بنتي نقدر نربيها كويس وتكون سبب دخولنا الجنة وتكون خير الذرية لينا.
والشط لوح من بعيد 
قال كل إيد تحتاج لإيد!
فؤاد حداد.
آية حمام.