اسكريبت بقلم أية حمام 2

أنا تعبان يا آية! 
سلامتك يا عين آية
" وقولت كدا وأنا بطبطب على راسه وضهره إنسان جميل بقلب طير خفيف أكيد جملته دي ناتجة عن وجع شديد فعلا لذلك بعدته عني شوية واتكلمت بحنية
مين زعلك
"مسح عيونه وإتكلم بعد ما حاول يرسم ابتسامة خفيفة على ملامحه
مفيش أنا هدخل أنام شوية
"مسابش ليا فرصة أرد عليه ودخل علطول فضلت باصة في أثره بحزن على حاله 
إحنا لسة متجوزين من أربع شهور مكنتش أعرفه قبل ما يتقدم لي بس لما جه وقعدت معاه أكتر من مرة حسيت إن وراه حكاية هو نفسه في البداية كان بيحاول يخليني ما أقبلش بيه لكن غصب عني كان فيه حاجة بتجذبني ناحيته وخلتني أوافق عليه وأوافق أشاركه حياته!"
غيث  
حبيبي قوم بقا كفاية كدا
"كانت الساعة داخلة على اتنين بعد نص الليل وهو نايم من المغرب دخلت أصحيه لكنه مش عاوز يقوم قربت ومديت صوابعي بين شعره وسرحت
هو أنا ليه بحس إنك عايز تفركش الخطوبة وفي نفس الوقت عايزني أنا ال آخد الخطوة دي أنت حد غصبك عليا
"كنت بتكلم بغضب مخطوبين بقالنا شهور وفي كل مرة بييجي بطلع منه الكلام بالعافية طول الوقت بيبص في الفراغ وعيونه فيها كلام كتير مش بيحكيه "
ليه بتقولي كدا 
مش أنا ال بقول كدا يا غيث أنت نفسك بتقول كدا بس من جواك صح ولا لاء
"اتنهد جامد وكان هيقوم لكني إتكلمت بسرعة
بعد ما تمشي النهاردة أنا هقول لبابا إني مش مرتاحة وكل واحد ربنا يعوضه أنت موصل لي شعور وحش أوي وأنا مش هقبل بكدا  
أنا مش كويس  
نعم 
أنا كان عندي أخ أصغر مني بسنتين
"بصيت له باهتمام علشان يكمل اتنهد جامد وبدأ يحكي ويكمل كلامه
كنا مسافرين كنا

في الإبتدائي وإحنا بنلعب مأخدناش بالنا إننا بنبعد عن مكان أهلنا وكملنا لعب هو قال لي نتسابق ونشوف مين فينا يقدر يعوم أطول مسافة في أقل وقت وعملنا كدا فعلا وبدأ هو ونزل البحر لكنه مرجعش فضلت مستنيه من الصبح للعصر لكنه مخرجش من الماية!
"لاحظت إن الدموع اتكونت في عيونه وسكت لحظات قبل ما يرجع يكمل
أنا كنت مش فاهم حاجة غير إنه أكيد هيكسبني خايف أروح أقول لماما وبابا يطلع هو وميلقنيش وفي نفس الوقت بدأت أخاف من طول المدة ال غابها  
أهلنا حسوا بغيابنا وفضلوا يدورا عليا لحد ما وصلوا ليا حكيت لهم ال حصل وفجأة الدنيا اتقلبت بين خوف رعب عياط قلق أحوال كتير كنت مش فاهم حاجة منها غير إني خايف! 
وحصل إيه 
بدؤوا ينزلوا البحر يدوروا عليه وجت الفرقة المنقذة وفضلوا طول الليل كدا لكن كانت النتيجة إني اتسببت في قتل أخويا بقيت في نظر أمي قاتل ومش عايزة تسامحني كبرت واتخرجت واشتغلت وبرضه شايفاني العيل المستهتر ال كان سبب في موت أخوه الصغير
"سكت شوية ومسح وشه ورجع يتكلم تاني
أنا مش هنكر مشاعري ناحيتك بس أنا طول الوقت عايش بذنب كبير بيخنقني دايما خايف بعد ما نكون دخلنا في الجد أأذيك أنت كمان خايف من الكلام ال بسمعه إني مش هكون قد المسؤولية يكون كلام حقيقي! 
يمكن علشان كدا بحاول أخليك متتعلقيش بيا أوي  
بس أنا لأول مرة أشارك حد ال حكيته ليك دلوقتي وأيا كان قرارك ف هو حقك سلام
"نهى كلامه وقام خرج علطول مكنتش مصدقة كدا لحد ما دماغي قعدت تفتكر مامته وقت ما جه اتقدم ووقت الخطوبة وفي أي وقت كانوا هنا كانت دايما نظرتها له مش صافية كنت بحس إنها بتبص له باستهزاء وسخرية فعلا  
صليت استخارة أكتر من مرة واختارت أكمل معاه في البداية كنت فاكرة إني بعمل كدا شفقة لكن طلع إني حبيته وكنت عايزة حبي يداويه "
صباح الخير  
صباح النور  
هتروحي عند مامتك دلوقتي ولا في نص اليوم 
لاء وصلني وأنت رايح الشغل
"كان فات أسبوع حاولت أنسيه الزعل وأهون عليه ويمكن أحلى ما فيه إنه بيتراضى بسهولة علشان كدا دايما بشوف إنه زي الطفل في نقائه!
جهزت الفطار وفطرنا وبعدها لبسنا ونزلنا "
هتيجي بعد الشغل صح 
إن شاء الله سلميلي عليهم كلهم  
حاضر خلي بالك على نفسك
" نزلت من العربية دخلت العمارة وهو اتحرك ناحية شغله طلعت البيت عندنا وقضيت معاهم اليوم المسافة بين بيتي وبيتهم مش صغيرة ف علشان كدا مش بعرف آجي دايما "
"غيث" هييجي إمتى يا آية 
كمان ساعة إن شاء الله ليه 
علشان أشوف أحط صينية الجلاش إمتى علشان تكون سخنة  
نص ساعة ونحطها  
طب وأنت عاملة معاه إيه وأهله كويسين معاك 
والله كل مرة بتسألي نفس السؤال وبجاوبك إن الدنيا زي الفل يا ماما بعدين هو أنا لسة متجوزة إمبارح دا أنا كلها شهور وأتم السنة  
مهما تكبري هتفضلي بنتي الصغيرة وطبيعي أبقا عايزة أتطمن عليك علطول  
ربنا يديمك يا ست الحبايب
"بعد ساعة كان جه من شغله واتجمعنا كلنا وقضينا باقي اليوم سوا لحد بعد العشا ومشينا وإحنا في الطريق وقف العربية ف بصيت باستغراب لكنه قال ننزل نقعد شوية قصاد النيل نزلت معاه وقعدنا وسط الجو الجميل واتكلمت
تعرف إن وأنا صغيرة كنت بقف قصاد أي مكان فيه ماية كتير وأقول ياه لو يطلع لي عروس البحر ونحب بعض وأضحي علشانه وأسيب البر وأنزل أعيش معاه تحت
"بص لي شوية بعدين بدأ يضحك جامد على كلامي ضحكت معاه على سذاجة تفكيري زمان واتكلمت
صدقني قعدت فترة طويلة مقتنعة إن دا هيحصل وجهزت نفسي إني هكون عروسة البحر! 
كان عندك كام سنة وقتها 
مش فاكرة بس كنت في الثانوي تقريبا  
كمان!! أنا قولت التفكير دا آخره سن خمس أو ست سنين  
بعدين مجاش معاك إن مفيش حاجة اسمها عروس البحر ولا أنت كنت بتسمعي ديزني وقتها  
أيوا علشان كدا حبيت تضحية "إريال" وقولت أضحي أنا كمان زيها  
بعدين مين قال لك إن مفيش كدا هو مش باباها كان زيها برضه
بس يا آية بس الله يكرمك
"كنت لسة هرد عليه بس قاطعنا الطفل ال قرب علينا واتكلم
وردة يا بيه 
خد وردة يارب تتجوزها  
اتجوزتها الحمدلله  
طب يارب تخلف منها دستة شبهها  
لو في الشكل موافق لكن في التفكير لاء
"همس بجملته وهو بيطلع الفلوس لكني سمعته أخد منه الورد وقدمه ليا وهو بيقول
اتفضلي يا ست حورية البحر  
ميرسي يا عروس البحر
"ضحكنا وقال نقوم نمشي ف أخدت الورد وركبنا ومشينا وطول الطريق يضحك كل ما يفتكر كلامي وصلنا وطلعنا وغيرنا هدومنا وصلينا العشاء وقعدنا في الصالة كنا بنتفرج على الشاشة في هدوء لكنه قطعه بسؤاله
آية أنت مبسوطة معايا
"كنت نايمة على رجله ف قومت قعدت قصاده وجاوبته
عمري ما حسيت براحة وأمان زي ال حسيتهم معاك يا غيث حاسة إن ربنا بيحبني وراضي عني علشان كدا خلاني مراتك  
متأكدة 
والله العظيم يا غيث أنت مش مقصر معايا في أي حاجة والله العظيم أنا أسعد انسانة في الدنيا علشان معاك صدقني مفيش حاجة توجعني أو تزعلني غير إنك تسيبني لوحدي من غيرك