اسكريبت بقلم أية حمام 4

أنت علشان أنت أغلى عليا من نور عنيا يا آية. 
_طب سيبني فترة أفكر وأهدى مع نفسي سيبني أفكر من تاني وأشوف هكون قد قراري ال هاخده فعلا ولا لاء 
وفي الفترة دي أنت صالح باباك وحل أمورك معاه.
فضل باصص لي شوية بعدين سحبني وطبطب عليا وقام دخل الأوضة وبعد حوالي ربع ساعة خرج بشنطته وبص لي ل دقايق بعدين خرج من الشقة 
قعدت عيطت جامد 
ماقدرش أبعد عنه وفي نفس الوقت مش قادرة أسامحه وال أكبر من كل دا هو ابننا أو بنتنا ال مش عايزة أظلمهم وفي نفس الوقت مش عايزة آجي على نفسي بسببهم!
وصلت البيت بعد حوالي نص ساعة دخلت لقيت غزل بتحاول تأكل مالك وهو رافض قربت منهم بعد ما حطيت الموبايل والمفاتيح على الترابيزة قعدت جنبه 
_هي ماما لسة نايمة أنا عايزها يا بابا هي وحشتني أوي وأنت كمان بتقعد تسيبني كتير وبتوحشني أنا عايز نبقا سوا زي قبل كدا إحنا التلاتة.
سيبته يقول كل ال جواه وأنا حاضنه وبطبطب على ضهره بعد ما خلص كلامه إتكلمت أنا بهدوء
_أنا عارف إن ماما وحشتك جدا وعارف كمان إنه أنا بسيبك وقت طويل بس أنا بكون مع ماما علشان أشوفها فاقت ولا لسة. 
_طب هي هتقوم إمتى 
_مش إحنا إتفقنا إنك هتدعي ربنا كتير إنه يقومها بالسلامة ويردها لينا مش أنت عارف إن كل حاجة نكون عايزينها أو نفسنا فيها نطلبها من ربنا علطول 
_أيوا أصلا كل شوية بفضل أبص للسما وأقول لربنا كدا. 
_يبقى ربنا هيستجيب بإذن الله. 
_طب يلا يا مالك بقا علشان تاكل يا حبيبي. 
_مش عايز يا عمتو. 
_قل له حاجة يا غيث من الصبح وهو مش راضي ياكل. 
_لازم تاكل يا مالك علشان تكبر بسرعة وكمان علشان ماما متزعلش لما تقوم وتشوفك ضعيف كدا ومش بتاكل. 
_طب هاكل بس بشرط.. 
_إيه هو 
_هتاخدني معاك المرة الجاية أشوفها. 
_حاضر.
فرح ورجع قعد قصادها تاني علشان تأكله بعد ما أكل دخلته ينام شوية وكنت أنا أخدت دش ورجعت قعدت تاني وأنا مرجع راسي ومغمض عيني 
حسيت بإيد بتلمس راسي وبتمسح عليها ف فتحت بسرعة ولقيتها غزل ال جت قعدت جنبي وإتكلمت بهدوء
_هدي نفسك يا غيث وسلمها لربنا وخير بإذن الرحمن. 
_مسلمها ومتوكل على الله والله بس صعب أوي صعب أوي يا غزل أتحمل كل دا حاسس إن روحي هي ال غايبة عني كل دا. 
_يا حبيبي والله ربنا هيقومها بالسلامة وهيفرح قلبك أنت وابنكم بوجودها وسطكم من تاني. 
بس أنت إجمد كدا ومتيأسش إنه لا ييأس من روح الله إلا القوم الكافرون.. أنت نسيت كلام ربنا ولا إيه. 
_ونعم بالله. 
يديمك يا حبيبتي.
طبطبت على إيدي بعدين رجعت إتكلمت
_هو عمر فين صحيح لسة مرجعش من شغله 
_زمانه على وصول أنا رنيت عليه قبل ما تيجي وكان بيقول إنه جاي. 
_طيب أنا هصلي المغرب وهخرج علشان أروح المستشفى والصبح إبقي خليه يجيبك أنت ومالك. 
_طب استنى كل أي حاجة قبل ما تمشي. 
_إعملي ساندويتش على ما ألبس علشان مش عاوز أتأخر.
هزت راسها وقامت بسرعة تعمله وأنا دخلت لبست ودخلت إتطمنت على مالك وخرجت أخدت منها الساندويتش وأكلته وبعدها روحت المستشفى.
_إيه الأخبار مفيش جديد 
_زي كل مرة مؤشراتها الحيوية بتتحسن بس لسة مفاقتش. 
_أنت قولت إنها ممكن متطولش عن شهرين صح 
_دا ال أنا متوقعه إصابتها كانت جامدة أها بس متوصلهاش إنها تفضل غايبة ل شهور كتيرة. 
_طب هي بتكون حاسة بال حواليها أو سامعة كلامي 
_في حالتها أيوا بتكون أوقات كتير قادرة تسمع وتحس لكن الإستجابة بتكون ضعيفة أو عشوائية بتكون إستجابة غير واضحة. 
_زي إيه 
_يعني مثلا يحصل حركات في الأطراف لكنها غير متسقة أو حركات لا إرادية للعين أو حركات في الوجه برضه أو إنها تهمس وتقول كلام غير واضح وغير مفهوم.. 
_أنا ولا مرة ركزت في ريأكشاناتها بعد كلامي لها!
خلصت كلام معاه وهو خرج من الأوضة وأنا إتحركت ناحيتها وقعدت على الكرسي جنبها ومسكت إيدها وإتكلمت
_مالك بقا مش مستحمل بعدك كل دا حياتنا متشقلبة خالص من بعدك.. 
أتمنى تكوني سامعاني دلوقتي وحاسة بيا فعلا وتعرفي قد إيه إحنا محتاجينك تفوقي بسرعة وترجعي لنا تاني!
تاني يوم الصبح دخل الدكتور يفصحها كان بيقرب نور عالي على عينها لكن استجابت له!
_حركت وشها!
بعدوني شوية وبدأت الممرضة تعمل حاجات علشان تتأكد لو كانت فاقت فعلا ولا لاء 
أنا مكنتش مركز مع كل ال بيعملوه كل ال مركز معاه هو إنه أخيرا ربنا استجاب ليا.
فات وقت معرفش مدته لحد ما فتحت عينها ببطء رجع الدكتور يوجه لها ضوء تاني يشوفها هتستجيب ولا لاء استجابت فعلا ورجعت تحرك عيونها كإنها بتسأل هي فين قربت منها وإتكلمت
_آية سامعاني 
_أنا فين
كان بيخرج الكلام ببطء وهادي جدا بعد ما الدكتور خلص هو والممرضة إتكلم معايا
_براحة عليها دلوقتي يعني مش لازم نضغط عليها في الأسئلة متوقع منها تكون فاقدة الذاكرة للأحداث الأخيرة أو يكون النطق عندها ضعيف. 
_يعني هي مش هتكون فاكرة الحادثة ال حصلت لها ووصلتها ل كدا 
_أيوا فقدان ذاكرة مؤقت ممكن مع الوقت تقدر تسترجع الأحداث الأخيرة.
هزيت راسي وهو خرج ورجعت قعدت جنبها تاني.
_وحشتيني أوي طولتي في الغياب. 
_إيه ال حصل أنا هنا ليه 
_مش مهم إيه ال حصل المهم إنك بخير. 
لما تتحسني شوية هحكي لك كل حاجة.
قبل ما ترد كانت جت غزل هي ومالك دخل مالك بسرعة أول ما شافها فايقة وإتجه ليها 
_براحة يا حبببي علشان ماما لسة تعبانة. 
_سيبه يا غيث. 
_وحشتيني يا ماما.
كانت الفرحة مش سايعاني وأنا شايفها مفتحة عيونها وبتتكلم معانا وبتتجاوب أها مش بشكل عالي بس بالنسبة لي أنا راضي لحد ما تكون كويسة خالص.
فات أسبوع وكانت بتعمل علاج طبيعي علشان عضلاتها ال إتأثرت وأثرت عليها في الحركة. 
وخرجت من المستشفى ورجعت أنا وهي ل شقتنا ودنيتنا.
_أنت كويسة حاسة بحاجة
كنا قاعدين باليل ومالك نعسان على رجليها.
_بخير يا حبيبي بس هو مالك ماله علطول بيقول لي إنه بيحبني.. علطول بحس إنه عايز يتأسف لي! 
هو إيه ال حصل قبل ما أتعب كدا. 
_ال حصل إن وأنت معاه كنتم رايحين تشتروا حاجات من المكتبة وأنت بتحاسبي كان هو واقف برا وكان بيتفرج على حاجة الناحية التانية وكان عايز يعدي الطريق وكان زحمة بس أنت لمحتيه ف جيتي تشديه العربية خبطتك أنت. 
_يعني هو حاسس بالذنب وإن هو السبب 
_بالظبط.. الفترة الأولى كان علطول بيعيط وكان حالته صعبة ولولا غزل وعمر هم ال حاولوا يهدوه ويخلوه يعرف إن ملوش ذنب.
وإتكلمت
_فداه فداكم أنتم الاتنين عمري والله. 
_ربنا يبارك في عمرك يا حبيبتي ويديم وجودك أنت متعرفيش الفترة ال فاتت مرت علينا إزاي.
قربت إيدها وطبطبت على كتفي وبعدين مسكت إيدي وإتكلمت بعد تفكير ل دقايق
_عايزة أحكي لك حاجة 
_قولي يا حبيبتي. 
_وأنا نايمة كدا معرفش دا كان حلم ولا إيه بس أنا كنت عايشة حياة واقعية يا غيث كنت حاسة إني عايشة في الواقع عارف لما تحلم بحاجة بس تحس إنه حقيقي أوي أهو هو دا ال كنت بشوفه.
بص لي باستغراب واستفهام ف إتكلمت
_أنا مش فاكرة الأحداث كلها بس غالبا كانت بتدور