اسكريبت جديد بقلم أية حمام
معاك ماما تعبانة ومحتاجة أروح أكشف عليها
طب ما تاخديه معاك يا آية
بقول لك هكشف عليها ومش هعرف آخد بالي منه وبيت سارة بعيد مش هلحق أروح لها
هو أصلا لسة راضع ونام يعني بس كل ال عليك تخليه نايم في شقتك!
بس أنا النهاردة يومي يا آية مع ياسين وبصراحة مش هينفع أضيعه كدا!
إتضايقت جدا من جدالها ورفضها بالشكل دا ف نزلت تاني ودخلت الشقة أخدته وركبت تاكسي وروحت على ماما كانت تعبانة جدا ومش قادرة تتحرك ومحدش معاها ف أخدتها للدكتور بعد ما وصيت واحدة جارتها تاخد بالها من الولد
أنت فين يا آية
معلش يا ياسين ماما تعبت جدا وروحت أكشف عليها وعلفكرة أنا رنيت عليك بس موبايلك كان مقفول
طب وإلياس فين
مخلياه عند خالتو سحر جارة ماما
إزاي تسيبيه كدا مطلعتيهوش عند مريم ليه
مكنتش عارفة أقول له أيه خوفت أقول له الحقيقة يتخانق معاها بسببي وهي تكرهني ف حاولت أنهي المكالمة
أنا لازم أقفل دلوقتي يا ياسين هخلص وأرن عليك
نهيت معاه وقفلت الموبايل وغمضت عيني أستغفر وأحاول أهدى ومأبينش أي حاجة علشان ماما
بعد حوالي ٣ ساعات خلصنا وروحت بيها لكن لقيته واقف تحت بيتها!
قرب بعد ما نزلنا من التاكسي وسندها معايا ودخلناها سوا ونيمناها وخرجت أجهز لها أكل ف دخل معايا
جيت ليه يا ياسين مكنش ينفع تسيب مريم
وبرضه مكنش ينفع أسيب مراتي لوحدها وكنت عايز أعرف عنوان العيادة بس أنت قفلتي الموبايل
طب أنت إتطمنت
ليه معرفتنيش إنها مرضيتش تقعد ب إلياس
إتفاجئت إنه عرف كدا ف لفيت له من غير كلام مكنتش عارفة أقول إيه ف إتكلم هو
أنا زعقت لها علفكرة
وقبل ما أتكلم كان جرس الباب رن ف خرجت أفتح
كانت سارة جت ووراها جارة ماما أخدت منها الولد ودخلتهم
روحي أنت بيتك يا آية وأنا هبات هنا
بس
مبسش كفاية تعب لحد كدا يلا
هزيت راسي ودخلت إتطمنت عليها وخرجت نزلت معاه بعد ما وصلنا شال إلياس لحد سريره وقبل ما يخرج لف لي وإتكلم
لو إحتاجتي حاجة رني عليا أنت مراتي مسؤولة مني!
قربت بابتسامة هادية قبل ما يطلع إتحركت قعدت على الكنبة وسندت ضهري وأنا بسحب نفس جامد أوقات بقول إيه خلاني أوافق على الوضع دا وأوافق غيري تشاركني فيه وأوقات تانية برجع أقول دا حقه وإن الشد ال بيني وبين مريم بسبب بس إننا لسة قي البداية ومش متأقلمين على بعض
مالك يا مريم
مش قادرة دايخة أوي وبطني بتوجعني
طب أدخلي إرتاحي هكلم دكتور تيجي تشوفك
كنت بجهز الأكل وسمعت صوت الباب ف خرجت لقيتها ساندة على الحيطة جنبه وباين عليها التعب أوي سندتها ودخلتها ورنيت على واحدة في العمارة ال قصادنا وكنت متابعة معاها في حملي
إشربي دا وعشر دقايق وهي جاية إن شاء الله ربنا يطمنا عليك ويفرحك
شوية وجت فعلا وأكدت تفكيري كانت حامل!
مكنتش عارفة أحدد مشاعري في اللحظة دي حاسة إني غيرت منها لما شوفت فرحة ياسين بيها وحاسة إني كنت مبسوطة ليها وله بس ال عارفاه إن الفترة
هو إلياس فين يا آية
فوق عند مريم
كان فات حوالي ٣ شهور وبدأنا نتأقلم أكتر وعرفنا إن لازم يكون الوضع هو الرضا علشان منتعبش وهي طلعت كويسة برغم الخلافات ال كانت بيننا في البداية وزي ما بيقولوا ما محبة إلا بعد عدواة!
والنهاردة كان يومي معاه وكان واحشني جدا وكنت عايزة أقضي معاه أطول وقت لوحدنا لذلك جهزت عشا خفيف وإتزينت له بكل ال يحبه
حسيت إننا بقالنا فترة مش بنعرف نقعد لوحدنا بسببه ف قولت يقعد النهاردة فوق
عملتي كويس والله
وحشتيني بجد ووحشتني الحالة ال بتوه فيك فيها!
جميل شعور إن الست تفضل حلوة في عين زوجها دايما مهما الظروف بعدتهم شوية جميل إنها تفضل شايفة في عيونه دايما رغبته في قربها منه جميل الحب والأجمل منه إننا نتحب بصدق!
الدكتور قالت لك إيه حددت لك ميعاد الولادة
أيوا آخر الأسبوع إن شاء الله
على خير يارب ربنا يقومك بالسلامة
يارب يا حبيبتي
هقوم أحط الغدا على ما ياسين يغير خليك بس آخدة بالك من إلياس
حملها كان شوية صعب ف كلنا متوترين وخايفين من اللحظة الجاية
لكن لأن ربنا رحيم وكريم مر الأسبوع بكرمه وهي خرجت بخير وبنتها برضه كانت كويسة الحمدلله ورجعوا البيت وشعور فرحة وبهجة مسيطر على الجميع
الحمدلله على سلامتك يا مريم ربنا يفرحكم بيها يارب ويعينكم على حسن تربيتها
في وجودك يا حبيبتي
شدتني ناحيتها وهمست لي
عرفتي ياسين الخبر
قولت لما نتطمن
متتأخريش وعرفيه
بتتهامسوا في إيه
مفيش يا حبيبي
بقيت أتضايق من قربكم دا إرجعوا ضراير أحسن
براحتك كدا كدا النكد هيكون على دماغك أنت
بعد حوالي أسبوع جه يوم العادة المتعارف عليها في المجتمع السبوع لكن كنا مختلفين شوية في إن محصلش العادات الغريبة ال بتحصل فقط إتجمعت العائلات ال باركت وهنت والأطفال ال وزعنا عليهم حاجات تفرحهم
كان يوم طويل ومجهد شوية لكن الفرحة كانت كبيرة فيه وبعد نهاية اليوم نزلت أنا الأول غيرت هدومي واستنيته ييجي وبالفعل ربع ساعة وكان دخل
أومال فين إلياس
نام فوق ف قولت أسيبه
طب كنت عايزة أقول لك حاجة
معاك يا حبيبتي
التالت جاي!
بص لي باستفهام وعدم فهم ف سحبت إيده وحطيتها على بطني وإتكلمت بهمس
أنا حامل!
دقيقة مرت من غير أي رد فعل منه ملامحه مش عارفة أستشف منها هل مبسوط متفاجئ متضايق زعلان بعدها إتكلم
أنا كدا محتاج ورث علشان الفترة الجاية!
بعدت عنه شوية وأتكلمت
جاي في وقت زنقة صح
بالعكس طالما دا توقيته وربنا بعت الرزق دا دلوقتي يبقا هو دا الوقت الصح ربك هييسرها وكدا كدا إحنا مرتاحين الحمدلله أهم حاجة عندي إن الفترة تمر على خير وتكوني كويسة وتقومي ليا بالسلامة
أنا بحبك أوي
مش نقطة في محيط حبي ليك بجد!
أنا بحمد ربنا على إنه رزقي وإني موجودة معاه واختارته واختارني ومسمعتش كلام غيري وبعدت عنه أصل تسوى إيه الحياة وهو مش فيها!
واسترح بالحبيب
كل شيء سوى الحبيب عناء
بشار بن برد
تمت
آية حمام
