اسكريبت بقلم سمية عبدالسلام
بعدها فضلت ادور على السلسلة في كل ركن في البلكونة وانا عندي امل اني هلاقيها إزاي بس تضيع مني ودي اخر حاجة بابا حبيبي سبهالي قبل ما يمشي ازاي اسيبها تضيع وافرط فيها
معقولة يكون ده اخر نصيب ليها معايا هتمشي وتختفي هي كمان زي ما سبق وصاحبها سابني ومشي هتوجع قلبي تاني زي ما قلبي اتكسر يوم موت بابا بس يا ترى الوجع المرة دي عشان السلسلة ولا عشان صاحب السلسلة مابقاش موجود عشان خلاص مافيش بابا يقولي
فداك العالم كله مش بس السلسلة يا قمر
على فكرة انا لسه موجود
رديت بعصبية
ايوة مستني اي
ابتسم ولا فارقله عصبيتي ونبرة صوتي اللي عليت شوية
مستنيك
افندم!!
عصبيتك دي وحشة ونيتك دي اوحش انا اقصد يا محترمة اني مستنيك تخلصي لف في البلكونة وتقوليلي بتدوري على اي يمكن اعرف اساعدك.
بدون مقدمات او تردد رديت مرة واحدة وانا برمي كلامي في وشه وماعرفش خرج مني إزاي وانا بقوله بصوت مخنوق من كتمي للعياط وعيون بتلمع ودموع بتهدد انها تنزل
تعرف ترجع حد من الموت
حسيته اتجمد من كلامي وسكت يستوعب السؤال عشان
لأ ماعرفش بس بعرف اعمل حاجات تانية.
بصتله بأستنكار وسألته
بتعرف تعمل اي
بعرف اعمل شاي
لحظة ذهول بعدها ضحكت على جملته وهو كمل
خلي الحزن لأصحابه
ولو انا أصحابه هتقول اي
هقولك مستحيل تكوني أصحابه عشان ملامحك الجميلة دي لا يمكن يليق عليها الحزن.
ملامحي كلها استغراب بس مش منه مني انا عشان واقفة مع حد غريب اول مرة اشوفه ويسمعني كلام غزل من غير ماهزقه ولا انزل على خده الحلو ده بقلم ينزل يطرقع على وشه.
انا طبعا مش قصدي اعاكس عشان لو ناوية تضربي
ولا حاجة.
عرفت ازاي اني ناوية اعمل كده فعلا
من الكف الخماسي اللي بتجهزيه.
طب خد بالك في الكلام معايا بعد كده ولا عنك ماخدت انت ماتتكلمش معايا اصلا.
حاضر هاخد بالي في الكلام معاك بس اني ماتكلمش معاك خالص لأ في دي ما اوعدكيش
حد قالك انك بجح
لأ يوسف وانت
ده انت جاي تشقط
عيبك إنك لامحة
طب حتى خلي عندك دمك واكدب عليا
واكدب ليه ما دي الحقيقة
رديت بذهول تام
الحقيقة إنك جاي تشقطني!!
ابتسم وخرج ايده من جيبه وهو بيقول بعبث وضحكة خبيثة
تؤ
حطيت ايديا على وسطي ورديت بسخرية
امال بتتقال إزاي
إني جاي اتجوزك اصل انا ما قولتلكيش ما هو انا عريس الغفلة اللي انت لطعاه بره بقالك ساعتين وانت هنا بتدوري على حاجة في علم الغيب.
المرة دي انا اللي اتجمدت مكاني وعقلي بيحاول يترجم جملته بس للاسف ما اسعفنيش بأي رد وفضلت ساكتة
انت ساكتة ليه ما تقولي اي حاجة ما انت كنت بلسانين من شوية ما هو ما تقنعنيش انك فقدتي النطق من الفرحة عشان دي مش ريأكشنات واحدة فرحانة دي ريأكشنات واحدة بتتشل.
ماقتدرش امنع نفسي وما اضحكش على جملته لدرجة ان صوت ضحكتي كان عالي وماخدتش بالي غير على صوته وهو بيقول
ضحكتك جميلة ما شاء الله بس جوا البيت انما برى البيت تكتفي ببتسامة و ضحكة الرقاصة دي تنسيها.
لا والله
انا راجل غيور بغير على اهل بيتي.
اهل بيتك مين لمؤخذة ده انت ناقص تقولي قبل ما اخرج من البيت اخد أذنك
لأ ده شيء مفروغ منه.
ده عند الست الوالدة الكلام ده
على فكرة عيب تغلطي في حماتك
لأ ماهو انت ماتعرفش ده انا عندي استعداد اغلط فيك انت شخصيا
رد فعلي كان عدواني كتير هيشوفني قليلة الذوق ومش متربية بس ده عشان شايفين الحكاية من ناحية واحدة شايفين الظاهر بس شايفين رد فعلي الاوفر على كلامه بس اللي مش شايفينه ان رد فعلي ده مش رد فعل لكلامه ده رد فعل لفعل تاني فعل حصل زمان يوم موت بابا يومها لأول مرة حسيت بالخوف وعرفت شعوره الأمان بالنسبة لي كان بابا وبابا ما بقاش موجود قلبي اتعلق بيه وكان طاير لفوق بجناحات بس مرة واحدة الجناحات دي اختفت وقلبي وقع واتفتت لميت حتة واللي اتبقى منه أشلاء
استنيه يمشي بعد كلامي او حتى يتعصب وصوته يعلي وابقا اخيرا لقيت حجة ارفض بيها العريس الجديد ويبقا اسم جديد يحط ضمن قايمة العرسان المرفوضة يوسف
ده اللي عقلي فكر فيه بس قلبي كان مستني يحصل عكس كده بس الغريب ان فعلا ده اللي حصل كأنه سمع صوت قلبي او يمكن هو سامعه فعلا من صوت ضربات قلبي العالية.
رد بنبرة هادية ونفس الابتسامة الأولى اللي شفتها على وشه وهو بيعرض عليا يساعد وقال
محاولة جميلة منك بس محاولة فاشلة عيونك فضحاك.
حسيت
تقصد اي
