اسكريبت بقلم سمية عبدالسلام
مال بجسمه على سور البلكونة من ناحيتي وسند بأيديه وكمل بنفس نبرة الصوت
الخوف مطلوب بس الزيادة منه مش هيخلينا نعرف نعيش زي ما في خوف في أمان بس احنا اللي مش بندور عليه بلاش يا قمر لما الفرصة تيجي لحد عندك عشان تطمني ترفضيها انت بحجة انك خايفة تطمني ليجي يوم والخوف يرجع يسكن قلبك من تاني.
فلسفة وانا مش بحب الفلسفة وانت كده بتضيع وقتك معايا وواحد زيك اكيد مشغول بحاجات تانية.
ده الرد اللي لقيته مناسب ما انا اكيد مش هقوله انت صح مش هقوله اني خايفة من اول دقيقة بعد موت بابا بس الخوف ده اقل من بعد الثانية اللي عيونا اتلاقت فيها اكيد مش هقوله إني خايفة احس بالأمان وبعدين الامان ده يتبخر مش هقوله انه الوحيد اللي حبيت قعدته ومادخلتش ورزعت باب البلكونة ورايا مش هقوله اني مش عايزاه يمشي ومايسمعش كلامي مش هقوله..حاجات كتيرة جوايا اتخلبطت وماحدش هيعرف يرتبها غيره هو.
انا ماشي.
جملة قالها وكان نفسي ارد عليه واقوله
استنى ما تمشيش
بس فضلت ساكتة منطقتش.
بعدها حط ايده في جيبه وخرج السلسلة ورفعها قدامي
لما اتأخرتي علينا ليلى صاحبتك قالت انك هنا بتدوري عليها استأذنت من عمك اني اجيلك وعشان ماينفعش ادخل اوضتك ونبقا فيها لوحدنا جيت لك من بلكونة بيتنا إحنا.
فضلت باصة لسلسلة بحزن وشغفي ليها راح وهو لاحظ حزني ده بس ابتسم وقال بهزار
لأ ما هو مش هفضل مشعلق ايدي في الهوا كده كتير لو مش عايزة السلسلة قولي.
خدت السلسلة من ايده
كويس انك لقيتي السلسلة هاتي البسهالك
كانت بتحاول تفتح معايا كلام عشان تشيل الحرج بينا بس سبتها وقعدت على السرير بفتور
هتصدقيني يا ليلى لو قلت لك انا خلاص مابقتش عايزة البسها
ابتسمت هصدقك
ضميت حواجبي باستغراب من ردها وابتسامتها لأنها اكتر واحدة عارفة تعلقي وحبي لسلسلة دي واصل لحد فين
ما تستغربيش يا قمر بعد عشرة العمر دي كلها مش صعب عليا اكون فهماك وفاهمة احساسك حتى لو انت توهتي عنه.
واي بقا احساسي ده اللي انا تايهة عنه ياست العبقرية
قعدت جمبي على السرير وخدت من ايدي السلسلة ولبستها وانا مش فاهمة هي عايزة توصل لايه
فاكرة يا قمر يوم ما طلبت منك تخلعي السلسلة اجربها عشان عجبتني كان ردك عليا اي ساعتها
اول مرة اعرف ان قلبك اسود يابت يا ليلى وبعدين احنا في اي ولا في اي
ردي عليا بس كان ردك اي ساعتها
رفضت طبعا وقلتلك ماقدرش اخلعها من رقبتي دي هي دي الأمان بالنسبة لي بعد بابا
طب ودلوقت.
اتنهدت بحزن وانا برد
بقيت شيفاها سلسلة عادية
وده مالفتش نظرك لحاجة
ليلى بالله انا دماغي هتنفجر من الصداع مش وقت فوازير نيلي وشريهان بتاعتك دي
خبطتني بأيدها في دماغي بهزار وقالت
عشان ياقمر كنت محتاجة تحسي بالامان
طب ليه دلوقت بقيت شيفاها سلسلة عادية
عشان لقيتي امانك يا قمر لقيتي يوسف يوسف هو امانك والسلسلة مجرد سلسلة.
حسيت بمشاعر كتير جوايا وحسيت بردو اني تايهة رغم ليلى اللي بتحاول توريني الطريق وتدلني عليه بس انا لازلت خايفة اخد اول خطوة فيه فضلت اني افضل مكاني ساكنة ماحولتش ادور على الأمان
زي ما يوسف قال وكأني حبيت الاستسلام في كل مرة.
وبعدين يا قمر
بعدين اي مش فاهمة
هتفضلي ترفضي في العرسان لحد امته حتى يوسف كمان هترفضيه
اشمعنا يعني يوسف اللي عملتليه استثنى ما انت طول عمرك معايا ومعارضتنيش اشمعنا المرة دي
لأ السؤال مش كده اشمعنا هو
ماشي ياختي اشمعنا هو
عشان كل مرة قولتي فيها على عريس لأ ماكنش بيفرق لك وكان عندك لامبالاة بتشلني انا شخصيا بس يوسف مختلف لأنه الوحيد اللي عرف يحرك ده.
خلصت جملتها وهي بتشاور على قلبي
حتى لو كلامك صح خلاص ما بقاش ينفع.
وقفت بحماس وقالت
مين قال انه مابقاش ينفع قومي معايا
يابت اتهدي انت عارفة هو اتقدم كام مرة وانا بردو رفضت
عشان غبية
انا فعلا غبية.
طب لو اتقدملك تاني توافقي
ابتسمت بوجع
مش هيعملها جه على كرامته كتير عشاني
طب قومي
هنروح فين
اكيد مش هنروح في حتة وانت لابسة ميكي كده.
وقفت في نص الاوضة وشدت فستان كان على السرير جابته معاها بس ماكنش عندي ذرة اهتمام اسألها عنه
البسي ده بسرعة يلا
البس اي مش افهم الأول
لا انت غبية وكده هنتأخر
قبل ما اسأل نتأخر على ايه كانت بتخلعني هدومي وانا مصدومة منها ومش فاهمة اي اللي بيحصل
وبس كده خلصنا بس مش عارفة ليه حاسة اني ناسية حاجة.
رديت بسخرية وانا بجاريها في اللي بتعمله
الجزمة مثلا
صح الجزمة اكيد سبتها برى تعالي نجيبها
انا مش هخرج من الاوضة دي غير لما تقوليلي ايه اللي بيحصل هنا وليه سامعة دوشة برى
الباب خبط ونجدها مني وهي بتقول
ادخل
الجزمة ياقمر نسيتيها قلت اكيد بتدوري عليها ماهو مش معقول هتقعدي تدوري عليها ساعتين وتلطعي المأذون برى طب انا وعشانك انتظر اليوم كله انما المأذون ذنبه اي.
كان هو كان يوسف مافعوش غير يوسف و قمر بس خرجت من العالم ده على صوت ليلى وهي بتقول
طب طالما انت واقعة في حبه من الدور العاشر كده امال منكدة على اللي خلفونا ليه
كل حاجة تمت زي ما هما مخططين وانا ماعرضتش على حرف كأني ملسوبة الارادة واول حاجة قلتها بعد كتب الكتاب
ما زهقتش
انا نفسي طويل وعشانك احاول بدل المرة ألف طالما نصيبي هيكون القمر
مش عايز تعرف انا كنت بدور علي اي في البلكونة ساعتها
كنت بتدوري على السلسلة وانا ادتهالك
كنت بدور على نفسي اللي كانت تايهة مني.
ابتسم
ولقتيها
لقيتك انت
أخيرا
ضالتي..
و جدت نفسي الضائعة
لم يعد
للخوف
مكانا بيننا..
سميةعبدالسلام.
