اسكريبت بقلم مارينا عبود حواديت راكان و ايميليا

في وشي ليه مجرد ما طلعت من بيتك قلت كلام كتير في حقي عمري ما كنت اتخيل يطلع منك أنت!! ليه طلعتني اسوء زوجة وأم رغم إني عمري ما قصرت معاك ولا مع سيليا!
الكلام دا ما حصلش أنا عمري ما قلت الكلام دا عنك وحتى لما مشيت أنا مقولتش أصلا إحنا اتخانقنا ليه أنت مين اللي وصلك الكلام دا عني
فرحة أختك هي اللي قالتلي كده وقالتلي كلام كتير 
بس أنا مقولتش لفرحة تقو لحظة هي فرحة جتلك أمتى
من أسبوع بالظبط كانت هنا من بعد ما سيبت البيت بفترة صغيرة 
وأنت اشتكيت مني ليها أو قولتيلها حاجة 
لا وكل الاسئلة اللي أنت سألتها اجابتها هي إني عمري ما قلت عنك أي كلمة وحشة حتى بعد ما سمعت كلام أختك اللي أنت قولته عني دا إذا كنت قولته فعلا راكان أنت أول حب في حياتي وأنت عارف ومتأكد إني بحبك وعموما أنت أخدتني من بيت علمني يعني إيه الأصول يابن الناس وأنا لا يمكن اغلط فيك 
اتنهد وقال ببرود 
تمام أنا كده فهمت كل حاجة كل حاجة وضحت وأنا هعرف مين الكداب ومين الصادق 
سابني ومشي وهو متعصب كنت حاسه أنها بتكدب وانهم هيستغلوا المشكلة اللي حصلت بينا علشان يفرقونا بس كمان كنت حاسه أنه هييجي يعاتبني ولو مكنش هو بادر الأول كنت أنا اللى هطلب نتعاتب في الكلام اللي قالته فرحة لاني عارفة إن لحظة عتاب ومواجهة كفيلة تكشف كل حاجة مش واضحة كفيلة أنها تنقذ بيت من أنه يتهدم العتاب قادر ينقذ لكن الأهمال والعناد قادرين يدمروا كل حاجة حلوة 
اتأخرت كده ليه
الطريق كان زحمة أوي 
طيب ادخلي اقعدي في أوضتك لحد ما اجهزلك الغداء 
لا متتعبيش نفسك أكلت في الشغل المهم سيليا نامت 
لا قاعدة بتلعب في أوضتك 
امممم سيليا بتلعب في الأوضة!! حاسة إني هدخل مش هلاقي حاجة على التسريحة سليمة 
ضحكت 
طيب روحي ياختي وربنا يهديك 
هروح ابعتهالك وأنام لحد بكرة بقى 
قمت بصعوبة فتحت باب الأوضة واتفاجئت بيه نايم جنبها على السرير وبيلعبوا مع بعض قفلت الباب وقلت بإستغراب 
إيه دا أنت إيه اللي جابك هنا
بصولي هما الإتنين تجاهل سؤالي وبص لسيليا وقال بمكر  
حبيبتي اطلعي اقعدي مع تيتة وسبينا أنا وماما لوحدنا 
حاضر يا بابا 
أخدت العروسة بتاعتها وطلعت من الأوضة بصيت له لقيته نام على سريري وبيبصلي اتعصبت وقلت بضيق 
هو أنا مش بكلمك أنت إيه اللي جابك هنا وبعدين أنت مين سمحلك تنام على سريري 
كان بيبصلي ببرود قام من على السرير وقرب وقف قدامي  
بصراحة كده زهقت من القعدة في الشقة لوحدي فقولت ارجع الصداع للبيت تاني 
فرحت قلبي رقص بس قررت اكمل في دور المقموصة و اطلع عينه شوية ما أنا مش هتصالح بالسرعة دي!
أنت قصدك مين بالصداع أنا وسيليا صداع
تعرفي إني إكتشفت أنكم احلى صداع في حياتي 
طيب وبعدين في التثبيت دا دلوقت يابني هتخليني الم الشنطة دلوقت وأقولك بينا على بيتنا 
لا بقولك إيه متحاولش تثبتني بكلامك حضرتك راميني هنا بقالك أسبوعين مفكرتش تسأل عني 
الله!! هو أنا اللي قولتلك اطلعي من البيت 
ومقولتليش اقعدي محاولتش تمنعني ومفكرتش تيجي تصالحني 
اومال أنا بعمل إيه دلوقت
بعد إيه بعد ما دخلت اختك الحربوقة دي بينا وكانت هتخرب بيتنا! بعد ما حسستني إني ولا حاجة عندك هو أنت جاي علشان فعلا عاوز تصالحني ولا علشان تحافظ على بيتنا من الخراب وتخلي بنتنا تعيش وسطنا مبسوطة
وقف قدامي وقال بهدوء 
أنا بعترف إني غلطت بس أنت كمان زودتي المشكلة بينا وقررت فجأة تسيبي البيت وتمشي! أنت بنفسك وعدتيني في بداية جوازنا إن مهما حصل بينا مش هتسيبي بيتك وهنقعد ونحل نشاكلنا سوا لكن أنت عملت إيه لميت هدومك وأخدتي البنت ومشيت 
اتعصبت وقلت بصوت عالي  
وأنت محاولتش توقفني بالعكس سيبتني أمشي كنت مستنية منك تحاول توقفني تقولي متمشيش وهنحل كل حاجة سوا زي كل مرة كلمة وحده منك كانت قادرة تحل كل حاجة 
اتنهد وقال بضيق 
إيميليا أنت مشوفتيش نفسك في اليوم دا أنا كنت حاسس إني شايف إنسانة تانية غير اللي اعرفها إنسانة كل اللي يهمها انها تعمل اللي في دماغها ومش مهم أي حاجة تانية أنت كنت هتهدي كل حاجة بينا بسبب لحظة غضب منك أنا لو كنت أخدت على كلامك اللي قولتيه في اليوم دا كانت هتكون نهايتنا الإنفصال لا محالة 
بس أنا فعلا كنت جيبت اخري من المشاكل اللي بتحصل بينا بسبب أهلك وأنك طول الوقت شايفني غلطانة مكنتش عارفة اعملك إيه علشان تصدق اني مش بعمل مشاكل مع حد وإنهم هما اللي لحد دلوقت مش عارفين يتقبلوني بينهم وبعدين أنت من أمتى وأنت بتطلع مشاكلنا بره من أمتى وأنت بتحكي عن مشاكلنا لفرحة بالتحديد
أنا وراكان اتجوزنا بعد صراع طويل مع أهله وخصوصا والدته وأخته اللي لحد دلوقت مش قادرين