العوض

كل من عليها فاااان ويبقى وجه ربك ذو الجلال والأكراام  
كل شيء هالك إلا وجهه .. يا بنات حواااء يا بنات حواء هل سألتي نفسك هل أنتي المدفون الأول أم الثاني أم العاشر .. لعلوا أناس دفنوا قبلك ولعلوا أناس دفنوا بعدك .. أيتها السيدااات اليوم فوق التراب وغدا تحت التراب .. اليوم نتنعم بالنعيم ونفتخر بالمعاصي ومتاع الدنيا ثم بكت وبكوا معها بتأثر ثم أكملت وغدا تأكلنا الديدان .. يابنات حواء يابنات حوااء عيشي كما شئتي فإنك ميته .. يا بنات حواء مهما طال بكي العمر ومهما طالت بكي الدنيا فإنك ميته فإنك ميته ثم بكت بحرقه وتأثر فإنك م ميته .. تايهين ليه .. تايهين ما بين ربنا والدنيا ليه .. ربنا بيقول قل إن هدى الله هو الهدى أرجعوا لربنا .. مهما طالت بك الدنيا فإنها فانيه
____________________
إنتهت الندوه بعد تأثر الجميع من كلماتها وأنفعالها ايجوا يتكلموا معاها وريهام وشروق وعدوها أنهم هيلبسوا الخمار وهي فرحت ليهم سندت على عمود المسجد ووجهت كلامها لريهام
روفيدا بإبتسامه ونظره غريبه ريهام .. فيه صندوق بني صغير في دولابي هتلاقي مفتاحه تحته لو جرالي حاجه نفذي إللي فيه
ريهام قلبها إنقبض عشان روفيدا مريضه قلب من يوم ولادتها مالك يا روفيدا .. نروح للدكتور .. وليه بتقولي كدا..
روفيدا بإبتسامه يا بنتي بقى بطلي الخوف دا أنا كويسه أنا بقولك أنتي على سري عشان أنتي صاحبتي وأختي
ريهام بابتسامه ماشي يا ست روفا ثم أكملت بفرحه هروح ألبس خمار المسجد اللي هناك دا وتشوفيه عليا لحد ما شروق تيجي
روفيدا بإبتسامه روحي يلا
بعد ربع ساعه لبست ريهام الخمار إللي كان قمر عليها جدا وفرحت بيه والكل هنوها وقالوا قمر عليكي وهي فرحت راحت لروفيدا إللي كانت سانده على العمود ومغمضه عيونها وبتضحك
ريهام بضحك مالك يا هبله فيكي أيه .. لو حد شافك كدا بعد الندوه إللي أنتي قولتيها تبقى كرامتك في ذمه الله .. مفيش رد من روفيدا فهزتها ريهام .. روفيدا شوفي الخمار قمر إزاي..
ريهام بخضه رو روفيدا فيكي أيه ..
الكل أتجمع عليهم مخضوضين وشروق جت
شروق بخضه في أيه يا ريهام .. روفيدا فوقي هي بتضحك ليه ..
ريهام بصدمه وترتعش بعد ما شافت نبضها لأ لأ .. روفيدا فوقي بالله عليكي فوقي .. روفيدا شوفي الخمار عليا روفيدا بالله فوقي .. حضنتها وعيطت جامد
شروق بضحك أنتي هبله يا ريهام .. دي روفيدا إللي بتعمل فينا مقالب مش تصدقيها
الكل بكى بحرقه إللي يعرفها واللي ميعرفهاش
ريهام بدموع وبشحتفه روفي يا حبيبتي فوقي أنا ريهام روفيدا أنا لبست خمار أهو روفيدا عشان خاطر ريهام أختك فوقي بالله عليكي متوجعيش قلبي .. فوقي يلا عشان تبقي مهندسه قد الدنيا .. فوقي عشان تدعيلي أدخل صيدله .. ثم بكت بحرقه 
الكل متأثر على حسن خاتمتها وطلبوا الإسعاف ودا كله ريهام بتعيط وبترتعش
إيجي الإسعاف وستروها وأخدوها للبيت عشان يخدموها آخر خدمه
شروق أتصلت بوالدة روفيدا يا طنط .. وسكتت
والدة روفيدا قاعده وقلبها مقبوض روفيدا كويسه يا شروق .. قلبي مش مطمني
شروق بهدوء م مفيش يا طنط هنجيب روفيدا وجايين أهو وقفلت معاها 
الإسعاف ايجي وأخدهم لبيت روفيدا وأول ما الإسعاف دخل أول الشارع خرجت أمها وأبوها وأختها يجروا لما شافوا شروق وريهام بيبكوا
أمها جريت ورا الإسعاف كام مره وتقع وتكررها تاني بدموع وأبوها قعد مكانه يبكي بصوت وقلبه مخلوع من فكره إن بنته خلاص راحت منه مش هتبقى في حضنه تاني .. وصل الإسعاف وأهل الشارع وأهلها وصحباتها اتجمعوا وبيبكوا بحرقه .. قلوبهم في الأرض ومكسوره .. شروق حاضنه ريهام إللي تايهه خالص لدرجه إن دموعها نازله ومش متأثره بأي حاجه .. دخلوها البيت
والدة روفيدا ب بنتي .. روفيدا لااا .. روفيدا يا قلب ماما قومي يلا عشان تقولي لينا بطلوا أغاني أذكروا ربنا بدل ما تتعذبوا .. قومي يا حبيبة أمك ردي عليا
أبوها بدموع وصوت باس إيديها فوفه يا روح بابا قومي يلا .. مين هييجي يحضني كل يوم الصبح .. سيبتيني ومشيتي كدا قبل ما تشيلي أبوكي في عجزه ! .. روفيدا ردي على بابا وأمسحي دموعه .. روفيدا هتوحشيني
ريهام أفتكرت وصيتها راحت لاوضتها وخرجت الصندوق لقت فيه ورقه قرأتها ريهام يا حبيبة قلب رسول الله .. أدام مسكتي الصندوق وبتقرأي الورقه دي يبقى أنا هكون عند حبيبي إللي كان نفسي أشوفه من زمان .. متزعليش يا ريهام هفضل معاكي ومش هسيبك أبدا متخليش حد يشوفني يا ريهام أستري أختك وأحضني ماما وأختي وخلي بالك منهم قولي لبابا ميحزنش أكيد أنا هكون في الجنه وحواليا مسك وأنهار وهعيش في قصري إللي بيطل على شباك رسولنا زوريني كل يوم وأحكي معايا زي ما بتعملي ورشي مسك على قبري وكملي مسيرتي يا ريهام هاتي كليه الصيدله وألبسي الخمار أنتي وشروق عشان أدور عليكوا في الجنه هتوحشيني يا حبيبة قلب رسول الله قفلت ريهام الورقه وقعدت على الأرض تبكي بحرقه على كل كلمه قالتها .. مين هيلبسني الخمار يا روفي .. مش قولتي هتاخدي بإيدي للجنه .. مين هيضربني ويزعقلي لما تلاقيني بعمل حاجه تغضب
ربنا .. مين هيقولي أذكري الله بدل ما أنتي قاعده تتكلمي في حجات تافهه .. طيب مش قولتي أنك هتحضري فرح شروق وتلبسيها أنتي بنفسك .. وجعتي قلبي عليكي يا روفيدا .. وجعتي قلبي يا غاليه.. 
فتحت باب الأوضه وقالتلهم على وصية روفيدا وهما نفذوها وخدموها آخر خدمه وحضنوها وسلموا عليها وأندفنت روفيدا..
ماتت روفيدا وهي في سن الشباب ماتت روفيدا وهي بتحاول تصلح المجتمع ماتت على آخر عهدها وهي بتدعي لدين الل الحق راحت وأخدت معاها قلوب الناس كلها كانت من شويه بتقول مين المدفون اللي عليه الدور طلعت هي صاحبة القبر ماتت وهي بترضي الله وهي بتضحك وهي بتذكر الله رحم الله أناس ماتوا في الدنيا ولم يموتوا بقلوبنا...
رددي بين نفسك وقولي ...
ومن ترك شئ لله عوضه الله فوق ما يتمناه.
حافظي علي نفسك وقلبك انتي غالية يا غاليةة.