من الفصل الثاني حتي الرابع من رواية فرصة تانية بقلم مارينا عبود

البنت المناسبه ليك.
منزل نوح الساجي 
لا يا ماما يعني لا
يا بنتي انتوا لازم تتعرفوا على بعض أكتر وتتفقوا على كل حاجه.
قعدت على السرير وقالت بحزن
أنا مش عاوزه اتفق على أى حاجه ولا حتي عاوزه اتجوزه.
والدتها قربت وقعدت جنبها
يا روفان حرام عليك أنت بقالك 3 سنين رافضة موضوع الجواز ولحد دلوقتي منعرفش إيه معقدك منه.
يا ماما أنا مش عاوزه أتجوز وخلاص وخصوصا البنادم إللي اسمه راكان ده.
والدتها قامت وبصتلها بغضب
أنت مفيش فايده فيك وأنا تعبت من الكلام معاك الفستان اهوو جهزي نفسك علشان الولد هيجي ياخدك بعد شوية وانتهى الكلام.
والدتها طلعت وهي بصتلها بغضب وقهر هى عارفه أنهم واخدين وصية جدها فرصة عظيمة علشان يجوزوها وميبقاش عندها أى عذر او سبب رفض هي معقده من الزواج وحاولوا كتيرر يقنعوها بس كانت بترفض وتطفش العرسان إللي بتجيلها غمضت عنيها وحاولت تسيطر على غضبها وقامت أخدت الفستان وبدأت تجهز نفسها.
بعد وقت كان راكان قاعد مع جده نوح وإللي بدأ يتعود على الكلام معاه وخصوصا أنه نوح شخص حكيم جدا وشخصية مرحه وروحه كالأطفال وراكان بيحب الناس إللي من النوع ده كان قاعد بيتكلم مع جده بس فى حاجه من جواه بتخليه كل شوية يبص على السلم ويشوفها.
متقلقش هتنزل دلوقتي.
هى مين ديه!
إللي كل شوية تبص لفوق على امل تشوفها.
ضحك بصوت عالي
يا جدي يا جدي أنت فاهم غلط خاالص.
طيب عيني فى عينك كده.
راكان ضحك والجد ابتسم وقال
اتمنى متزعلش منها لما تكلمك بحده شوية هي طيبة اووي صدقني بس هى بتخاف من موضوع الجواز ده اووي وبتطفش أى عريس بيجيلها هى هتحاول بكل الطرق تطلع اسوء ما فيها علشان تطفشك وتخليك ترفض بنفسك الجوازة وتطفشك زى إللي قبلك وعلشان كده حاول تاخدها على قد عقلها ومتزعلش منها صدقني لو عرفتها كويس وعرفت تحتويها هتكتشف أنها أجمل شخصية دخلت حياتك.
راكان ابتسم بحب والجد طبطب عليه وفضل يتكلم معاه عنها لحد ما نزلت من فوق.
راكان أول ما شافها ابتسم وبصلها بنظرات مش مفهومه.
أستأذن وأخدها وطلع وهو ببدندن ويضحك علشان يعصبها وهى بتحاول تسيطر على غضبها.
ركبوا هما الاتنين وراكان بدأ يسوق وشغل أغنية اجنبية وفضل يدندن معاها.
أى القرف إللي أنت بتسمعه ده!
العربية عربيتي ....والكاست بتاعي...... واشغل زى ما أنا عايز.
ابتسمت ببرود وقفلتله الكاست بس هو رجع فتحه وبصلها وفضل يرقص حواجبه باستفزاز
رفعت حاجبها ورجعت قفلت الكاست فضحك ورجع شغله وفضل يغني مع الأغنية بصوت عالي.
روفان بصتله ومقدرتش تكتم ضحكتها على شكله رغم إنه صوته حلو لكن بيعمل حركات تشبه للاطفال.
وقف العربية وفضل يبصلها ضحكتها كانت جميلة اووي عيونها العسلي غمازاتها إللي مخلى شكلها أجمل وأجمل ابتسم وقرب همس فى أذنها
حد قلك قبل كده أنه ضحكتك تجنن.
خدودها احمرت بخجل ولفت وشها الناحية فظهرت إبتسامة جميلة على شفايفه ورجع يسوق العربية وكل شوية يخطف نظره منها ولأول مره ميكونش قادر يفهم نفسه ولا تصرفاته كأنها سحرته وأخدت عقله برغم أنه قابل بنات كتيررره تكاد تكون أجمل منها بمراحل بس هى مختفلة فى حاجه بتجذبه ليها كأنها مغنطيس.
مرت دقايق ووقف العربية بسبب صراخها فجأة بصلها بفزع وغيظ
فى إيه يا بنتي أنت ناويه تقطعيلي الخلف
اقلع الجاكيت بتاعك بسرعة.
نعممم ياختي!
أنت لسه هتستفسر اقلعه يلاه.
ضحك
لا ده أنت شكلك مخك ضرب على الآخر!
بصتله بنظرة رجاء كالأطفال
لو سمحت لو سمحت من فضلك.
أخد نفس عميق وقلع الجاكيت التقيل إللى كان لابسه فوق التيشرت وعطهولها
اتفضلي يا ستي.
أخدته ونزلت جري وهو فضل مبرق وبيحاول يستوعب إللى بيحصل أخد شهيق زفير ونزل يشوفها بس اتفاجأ اول ما شافها........
نهاية البارت الرابع 
كان المفروض البارت ده ينزلكم امبارح بليل بس للاسف حصلت مشكلة فى تيار الكهرباء والنور قطع والواى فاى فصل ف معرفتش انزله سامحوني على التأخير
كمان الصبح شوفت كومنتات كتيرر ومسجات بتقولوا أنى قفلت صفحتي بس يا رفاق أنا مقفلتهاش ممكن يكون وأنا بظبط فى الاكونت قفلتها بالغلط لكن البيدج مقدرش اقفلها لأنكم بتابعوا الرواية من عليها وكمان أنا بنزل حاجات كتيرر عليها ف اكيد بالخطاء
فى بارت تانى هنزله بليل انشالله