اسكريبت بقلم مارينا عبود حواديت راكان و ايميليا

هنعمل إيه
هنعمل خطة.
خطة إيه 
فركشة الجوازة.
ولاد خالة متربيين سوا بس مفيش بينا أى إتفاق أحنا الإتنين مختلفين عن بعض خالص وفجأة اهلينا قرروا إن راكان ل إيميليا وإيميليا لراكان!! ومفيش تراجع عن القرار فقررنا لأول مرة نتفق ونحط إيد في إيد ونفشكل الجوازة.
يابنتي بقى بطلي حركة قدامي دوختيني! 
أنت يالاا طالع بارد كده لمين 
هيكون لمين ليك طبعا يا قلبي.
أنا مش قلبك ومتقوليش الكلمة دي تاني.
ياعم اقعدي هو أنت تطولي تسكني قلبي أصلا! 
ياسيدي أنا مش عاوزه اسكنه وبعدين دا أنت قلبك فندق خمس نجوم بيشيل من الحبايب ملايين.
طيب على فكرة بقى أنت واخده عني فكرة غلط خالص.
ملاك بريء ياخواتي سيب ام التفاحة دي من إيدك وركز معايا بقى.
قولتها بحده فبصلي بطرف عين 
قولي إللي عندك بسرعة علشان أنا معنديش وقت اضيعه معاك .
اتنهدت وقلت بنفاذ صبر
آه ياربي الصبر من عندك حقيقي الله يكون في عون خالتي إللى مستحمله برودك دا ولله يابني أنت إزاي مش مقدر حجم الكارثة إللى أحنا فيها 
إيه أفورة الإداء دي!! وبعدين هو الجواز اليومين دول بقى كارثة!
لا الجواز مش كارثة بس الجواز منك دا أكبر كارثة ممكن تحصل.
دا على أساس مثلا يا فراشة أني ميت في دباديبك ما أنا كمان مش طايقك 
طيب بما أننا مش طايقين بعض فخلينا نتصرف بسرعة يابن خالتي.
اتنهد وبصلي بغلب
طيب قوليلي الخطة بتاعتك وأنا مستعد أساعدك.
اسمع يا سيدي.
اتفقنا نجمع ماما وخالتي ونقعد معاهمونقنعهم إننا مش مناسبين ونتخانق قدامهم علشان نظهرلهم أحنا قد إيه مش متفاهمين ومننفعش

لبعض بس للاسف أنا زودتها عليه شويتين أو... ممكن نقول شويتين تلاته بصراحة وطلعته أسوء رجل على الكوكب فكان طول القعدة بيبصلي بشر وبيتوعدلي ودلوقت لو حد يعرف يلحقني من تحت إيده هكون شاكره جدا ولله.
بص أنا عاوزك تهدأ كده وتبطل جنان أصلا أصلا العصبية دي مضره لصحتك.
دا أنا هطلع العصبية والجنان كله عليك دلوقت تعالي هنا.
يا ميرا الحقيني اخوك هيقتلني.
وقفت وراها بخوف فقال بعصبية 
بقى أنا خاين وبتاع نسوان يا إيميليا
أنت دا أنت ملاك نازل من السماء.
لا ولله ما كنت من شوية قليل الأدب ومش محترم 
أنا قولت كده قطع لساني لو قلت عنك كده يا قمر.
ما أنا هقطعهولك لسانك دا دلوقت تعالي هنا.
كنا بنلف حولين بعض وميرا بتضحك وسطينا خالتي كانت قاعده عند ماما بحكم إننا جيران والشقة في وش الشقة ياربي يعني كان لازم أمي تجيب أختها تسكن جنبها مكنش زمانا متورطين التوريطه السودا دي دلوقت.
راكان بقولك.. 
متقوليش.
طيب اسمعني بس..
مش عاوز اسمعك.
يابني ركز معايا دقيقتين أنا عندي فك..
قاطعني بضيق
ابوس إيدك متفكريش تاني دماغك دي مش عاوزها تشتغل خالص.
كشرت وربعت إيديا قدامي وقلت بسخرية
طيب يابو مخ ذكي قولي هنعمل ايه 
هو مفيش غير حل واحد
وإيه الحل دا
أحنا نهرب قبل الخطوبة ونسيبها تخرب.
يا ولااا يا ذكي كانت فين الفكرة الخطيرة دي
مش قولتلك أنا مفيش مني.
أنت بتهزر يا راكان هنهرب إزاي يعني والخطوبة بكره! وبعدين أنا مستحيل اقبل أننا نحط اهلينا في موقف زي دا.
خلاص يبقى نوافق على الخطوبة لحد ما نشوف هنعمل إيه مفيش حل تاني للاسف.
بصيت له واتنهدت بيأس معرفش أنا ليه بيحصل معايا كده! وليه مهما قدمت مبررات لأهلي مش بيقتنعوا وليه من بين كل الشباب اختاروا راكان! وليه مفيش خطة وحده بتنجح!!
قمر تشهبي الأميرات في جمالهم.
فستان سيمبل ميكب خفيف أظن بطوط خلاص بقى جاهز هو أنا صحيح مجبورة على الخطوبة دي بس دا ميمنعش إني أكون في قمة الشياكة والحلاوة في يوم زي دا طيب بالله الولا ابن خالتي دا محظوظ بيا جطعه من القمر ياخواتي!
بت يا ميرا الولا اخوك راح فين
معرفش كان واقف هنا من شوية.
ليكون عملها وهرب ابن المجنونه دا مجنون ويعملها.
لا ياعم مش للدرجادي تلاقيه واقف مع حد هنا ولا هنا.
بس..
قاطعني صوته من ورايا
عيونك بتدور عليا ليه
اتنفست بغضب وبصيت له وقبل ما اتخانق معاه عيوني وقعت على بوكيه الورد إللى كان نفسي يتقدملي يوم خطوبتي !! والبدلة الشيك إللى هو لابسها يخرابي الولا قمرر يخرب بيته! ولا غلطه يا ولاد! ولا غلطه.
حطيت إيدي على بوئي وقلت بإنبهار
الله !! مش معقول!
ابتسم ومدلي إيده بالبوكيه غمزلي وقال بمرح
هي صحيح خطوبة كده وكده بس دا ميمنعش أجبلك بوكيه الورد إللى نفسك فيه.
ترا الولا طلع ذوق ذوق! الظاهر خالتي عرفت تربيه 
عيوني لمعت بشكل جميل حضنت البوكيه وبصيت له بإبتسامة خفيفة 
شكرا.
العفو يا فراشة.
ابتسمت بخفة رغم إننا مش بنطيق بعض ودايما خناق خناق إلا إني بحب أوي كلمة فراشة منه بحس بإحساس لطيف لما بيقولهالي بحسها بتخطف قلبي خطف كده خطف.
ميرا مش ملاحظة حاجة 
حاجة زي إيه 
يعني أخوك راكان من وقت ما لبسنا الدبل وهو نازل رقص! حاسه أن الولاا دا لو خاطبني عن حب ومش مجبور على الجوازة دي مش هيفرح كده ! في حاجة غريبة مش قادرة افهمها 
بصتلي وضحكت
دا العادي أنت عارفة راكان بيموت في الفرفشة يعني هو وصحابه ما بيصدقوا يلاقوا مناسبة علشان يهيصوا فيها بس سيبك أنت الواد طالع قمر النهاردة 1010 ونجمة ولله.
كلامها صح هو فعلا قمر وخصوصا فرحته في حتة تانية أنا مش عارفة إزاي هنقنع اهلينا إننا مجبورين على بعض بعد اليوم دا !! عيوني منزلتش من عليه كنت بتأمل فرحته وعلى وشي إبتسامة جميلة عيونه وقعت عليا فابتسم وقرب شدني أنا وميرا علشان نرقص معاه معرفش إزاي نسيت نفسي ودخلت معاه في المود كنا بنغني ونرقص كأننا مخطوبين عن حب!
ممكن أعرف أنت بتعيطي ليه 
مسحت دموعي وبصيت لها
يعني أنت عاجبك إللي بيحصل دا
اتنهدت وقعدت جنبي وعلى وشها علامات حيره
مش عاجبني بس ممكن تقوليلي أنت رافضة راكان ليه
نفخت وقلت بعصبية
أنا وراكان مش شبه بعض أحنا مش بنتفق على حاجة وطول الوقت خناق وبعدين أنا عاوزه حد يكون بيعرف يتحمل مسئولية حد يكون قادر يفهم دماغي حد حنين عليا أكتر من نفسيوراكان مش كده!
اممم طيب بعيد عن أني أخته فأنا هنصحك نصيحة بما أني صحبتك إيميليا بلاش تحكمي على الكتاب من غلافه بس يعني أنت متعرفيش راكان بشكل كويس رغم أننا ولاد خالة وجيران وكمان متربيين سوا! بس من وأحنا صغيرين ومفيش حد فيكم بيطيق التاني لسبب مجهول! وخصوصا أنت أنت كل إللي تعرفيه عن راكان أنه شاب مغرور وطايش ومبعرفش يتولى مسئولية رغم أن راكان عكس كده خالص! بس أنت مفكرتيش ولو لمرة وحده تشوفيه بصورة تانية غير إللي في دماغك مجربتيش تقربي منه وتعرفيه كويس بمعنى تاني أنت مجربتيش تفتحي الكتاب وتشوفي محتواه!