عاشقي السري بقلم اسراء ابراهيم

المميز وهو بيقولها بحنان بالغ 
هتعرفي كل حاجة بس مش دلوقتي يا ندي لما اثبتلك اني شخص تاني خالص غير الخلفية اللي انتي واخداها عني مش هتأخر
خرج عمر وندي وقتها ابتسمت بفجأة وهي بتقعد عالسرير وبصت للسما وحمدت ربنا ان عمر طلع انسان تاتي خالص فعلا غير ما كانت متخيلة بس سألت نفسها ليه بيعاملها كدة حتي لو صعبانة عليه مكنش هيعاملها بكل الحنية دي نفضت الفكرة من راسها وقامت تغير هدومها وبعد ما فتحت الدولاب بس اتفاجأت بهدوم جديدة عمر محضرها ليها اتصدمت وبقت باصة للهدوم وبتبتسم بسعادة وهي بتكتشف جانب جديد في حياتها 

خرجت ندي بعد شوية لما غيرت هدومها لفستان حلو اوي عليها وكانت مسيبة شعرها علي ضهرها وبتدور بعنيها علي عمر اللي خرج في نفس الوقت من المطبخ وهو شايل صنية الاكل بس وقف فجأة مكانه وهو منبهر بجمال ندي وطلتها اللي زي الملايكة فضل واقف شوية وهو بيبصلها بنظرات خلتها تبص في الارض بخجل وانتبه وقتها عمر لنفسه واتحمحم وهو بيقولها بابتسامة 
عملتلك بيض بالبسطرمة بس هيعجبك اووي
ابتسمت ندي وردت بخجل وهي بترفع عنيها ليه 
متشكرة اوي انت تعبت نفسك
عمر بصلها بحب ورد بتلقائية وهو بيرجع الكرسي لورا عشان هي تقعد 
تعبك انتي بالذات راحة يا ندي 
اتوترت ندي من كلام عمر وقربت منه وقعدت عالكرسي 
شكرا بجد
قعد عمر وبصلها وهو بيقولها بابتسامة جذابة 
عايزك من انهاردة تعتبريني مسئول عنك اي حاجة ناقصاكي تطلبيها مني يا ندي
ابتسمت ندي بامتنان وردت بخجل وهي بتبص لعمر براحة 
حاضر
قالت جملتها بهدوء وخجل وبدأو ياكلو سوا تحت نظرات عمر لندي اللي كانت محاوطاها

عدي فترة كانت من اجمل حياة ندي كان عمر بيعاملها فيهم كأنها اميرة كان مهتم بيها وبتفاصيل حياتها بطريقة خلتها تتعلق بيه كانت بتستغرب لما بتلاقيه عارف حجات عنها يمكن هي نسيتها من كتر الحزن اللي شافته في حياتها حقيقي روحها ردت ليها لما هو بس ظهر في حياتها وبدأت وقتها تاخد نفسها كانت هدي هتموت من الغيظ وهي شايفة معاملة عمر لندي وخصوصا انه كذا مرة يقف ليها لما بتحاول تفرض سيطرتها عليها او تقلل منها وده كان بيخلي ندي تطير من سعادتها لانها اخيرا لقت اللي يحميها ويدافع عنها كانت واقفة في المطبخ وبتعمل الاكل في شقتها وعمر كان قاعد برة مع هدي امه اللي طلعت عشان تتكلم معاه وتشوف حل لكل اللي بيحصل وبعد ما خلصت ندي الاكل وخارجة عشان تبلغهم انه الاكل جاهز اتصدمت ووقفت مكانها وهي بتسمع كلام هدي اللي كانت بتوجه لعمر بصوت واطي لكن بحدة 
مكنتش اعرف انك لسة بتحبها يا ابن بطني كنت فاكراك خلاص نسيت اللي حصل زمان 
كشرت ندي باستغراب وفضولها خلاها تستني تسمع عشان تعرف ايه اللي حصل زمان وبتعاتب عمر عليه وهنا انتبهت لرد عمر علي امه اللي قاله باندفاع وغضب كأن امه رجعت ليه زكريات سنين لعقله من تاني 
أنسى أنسى ايه يا امي انسي ان اخويا من كرهو ليا راح اتجوز الانسانة اللي حبيتها واختارها قلبي مع انه كان عارف اني بحبها وانا اللي كلمته عنها واني هروح اتقدملها بس هو سبقني واتقدملها هو تعرفي انتي ايه اللي سكتني وقتها وخلاني ابعد هو ندي لما شفتها سعيدة وراضية بيه وقتها مقدرتش انطق وادافع عن حبي ليها وانتي يا امي عملتي ايه بعد ما حكيتلك وافقتي ورحبتي عشان هو ابنك الكبير واللي متقدريش تقولي ليه لا ودلوقتي لما حلم عمري وحب حياتي بقي معايا وملكي جاية تقوليلي اسيبه وانساه لا يا امي انا مش هتنازل عن ندي حتي لو فيها موتي
قامت هدي وردت بغضب وهي بتبص لعمر بتحدي 
يعني انت بتخسر امك عشان خاطر مراتك يا عمر 
قام عمر ورد بهدوء وهو بيبص لامه بعتاب 
مقدرش اعمل كدة يا امي مقدرش اظلم الانسانة اللي حبتها واختارها قلبي
بصتله هدي بغضب وسابته ونزلت وفي نفس الوقت كانت واقفة ندي كانت ندي في المطبخ وحاطة ايديها علي وشها بصدمة من اللي سمعته مش متخيلة ان عمر كان بيحبها قبل معاذ وان معاذ اتجوزها عند وكره لاخوه دموعها نزلت بصمت وهي بتفتكر قد ايه كان معاذ بيفضب عليها وبيضربها لما كانت بتجيب سيرة عمر وتقوله انه يكلمه وميقاطعش اخوه ودموعها نزلت اكتر لما افتكرت قد ايه كانت مخدوعة في معاذ وقد ايه عمر اتظلم بسببها وحست بالندم بيقطع قلبها لما افتكرت معاملته ليها من يوم ما اتجوزته وقد ايه بيعوضها عن اللي عاشته انتبهت ندي لعمر اللي بيقرب عليها بلهفة وهو بيسألها بخوف 
ندي مالك يا حبيبتي انتي عورتي نفسك ولا حاجة وريني ايدك
كان عمر ماسك ايديها وهو بيتكلم بخوف وقلق خلاها ابتسمت من بين دموعها واخيرا اتكلمت وقالتله بهمس 
انا اسفة
عمر بصلها بقلق اكبر وقالها باستغراب وهو بيتبت في ايديها 
علي ايه انتي بتعتذري علي ايه يا ندي انا مش فاهم
اتكلمت ندي بحزن وكان باين في عيونها الندم اللي شافه عمر 
هتصدقني لو قولتلك اني لو اطول الزمن يرجع بيا عشان اختارك كنت عملت كدة المدة
القصيرة اللي عشتها معاك خلتني اقول ياريتني قابلتك قبل ما قابلته او عرفته ياريتني عرفتك في ظروف تانية وحياه تانية صدقني وقتها انا متأكدة ان حبك كان هيسكن قلبي من اول لحظة اشوفك فيها يا عمر
عمر كان بيبصلها بعدم تركيز وهو مش مستوعب كلامها ولا اللي هي قالته كان قلبه بيدق بعنف لدرجة انه واصل ليها رد بابتسامة حزينة مكسورة متغلفة بفرحة شافتها وقرأتها ندي في عنيه 
انتي سمعتي كلامي مع امي مش كدة 
حركت ندي راسها بهدوء وهي بتبص في عنيه وردت بهمس وهي بتقرب منه 
غصب عني والله بس حقيقي كانت اسعد لحظة في عمري لما عرفت انك بتحبني زي ما انا حبيتك
دقات قلبه ذادت اكتر من حركتها المفاجئة ليه وهنا غمض عنيه براحة اخيرة وكأنه كان بيصارع الحياه عشانها رفع عمر ايديه وشدد عليها ورد بصوت عاشق متيم ليها هي وبس 
وانا مش عايز غيرك في حياتي وراضي بيكي يا ندي عن الدنيا كلها حتي لو كان عدي مليون سنة لاني بحبك
تمت 
بقلمي اسراء ابراهيم
عاشقي السري
لو لقيت التفاعل حلو اوي كدة علي الاسكربت الكامل هنزل بعد كدة كل الاسكربتات كاملة ايه رأيكم تفاعل حلو بقي ومتنسوش رأيكم لانه بيفرق معايا اوووي