حواديت رحيم بقلم رؤيا محمد 1

مش عيب لما توقع شابه كتكوته زي في بداية عمرها في حبك وتهرب يا استاذ دي حركات ولاد الناس
افندم
سندت وشي على كفي وبكل الراحة اللي في الدنيا
مكنتش بتيجي ليه الأيام اللي فاتت قولي متداريش عليا حاجه أنا ستر وغطا عليك يا اخويا.
اخوكي
انا قولت بردو أنت متجيش اخويا أنت تيجي جوزي حبيبي قره عيني حاجه في الرينچ ده.
أنت مجنونة صح
اخص عليك مكنش العشم بقى تقول عليا مجنونه عيني عينك كدا
ممكن تقومي
أيوه بردو مقولتليش مكنتش بتيجي الاسبوع اللي فات ليه
كنت مشغ..
سكت فجأة وبرق وهو بيكمل
أنا بقولك ليه اصلا وأنا اعرفك منين ولا أنت تعرفيني منين عشان تعرفي أنا مكنتش باجي ليه.
بسيطه خالص نتعرف أنا رؤيا ها بقى مكنتش بتيجي ليه
يا سلام مفروض أجاوب أنا دلوقتي.
هو أنت مش قولت متعرفنيش اديني عرفتك يا سيدي قول بقى.
قومي وحالا.
لا ده انا اروح فيك في داهيه عايزه تخلى بيا بعد ما عرفت اسمي.
هو اسمك سر حربي مثلا وأنا معرفش
أنتم الرجالة كلكم كده تاخدوا الواحده مننا باسم وترموها من غير.
ابتديت اعيط وهو باصصلي ومحتار مش عارف يعمل ايه في المجنونة اللي قدامه معاه حق واحده اقتحمت ترابيزته فجأة سألته

أسئلة مش من الطبيعي أنه يرد عليها بس أنا هعمل ايه بردو بقالي شهور براقبه في صمت والباشا من اسبوع فص ملح وداب ولما ظهر مقدرتش افضل قاعده افترضنا غاب تاني هيبقى خلاص كده قلب ممس اتكسر.
يا آنسه طب أهدي خلاص أنا آسف طب.
بصيت بطرف عيني كام ثانيه وكملت عياط.
يا بنتي الناس بتبص علينا يقولوا عليا بعمل فيك إيه
رديت فجأة
مش راضي تحبني.
لا ده أنت مجنونة فعلا.
قومت بسرعة فبصلي بخضة.
لا أنا مسمحلكش أنت زودتها اوي.
أنا بردو اللي زودتها
اومال أنا حضرتك بتغلس عليا من الصباحية ربنا وسكتالك.
برق بصدمه وهو بيشاور على نفسه وصوته عالي.
أنا أنا بغلس عليك أنت شكلك مجنونه ورايحة جايه ترمي بلاك على الرجالة لو ممشتيش دلوقتي حالا تصرفي مش هيكون لطيف وخصوصا لبنت زيك ولا اقولك أنا اللي همشي.
تابعت خروجه من المكان وأنا دموعي نازله بحرقة وكسوف من كلامه ومن نظارات الناس اللي كانت حواليا ساعتها بس كان نفسي الأرض تنشق وتبلعني او الزمن يرجع كام دقيقة لورا وألحق نفسي قبل ما اتهور واضيع كرامتي مسحت دموعي بكف أيدي وانا بمشي من المكان بكل سرعتي فضلت ماشيه في الشارع ودموعي نازله وبلوم نفسي على غبائي وتسرعي للمرة المليون لو مكنتش اتسرعت مكنش اتقال عليا برمي بلايا على الرجالة دموعي نازله بندم وحرقه بتحرق في قلبي.
خلاص يا رؤيا عشان خاطري كفايه عياط بقالك ساعه بتعيطي يا حبيبتي.
مسكت منديل واتكلمت بشهق
ده قال عليا برمي نفسي رجالة يا ليلة أنا برمي نفسي على رجالة
مبدئيا هو قال بترمي بلاك على رجالة مش بترمي نفسك.
لا تصدقي فرقت كتير.
مش القصد بس أنت كمان حطي نفسك مكانه يا رؤيا مهو طبيعي لو لقيتي ولد جايه يعاكسك هتعملي معاه كده وازيد.
زعقت بنرفزه
مكنتش بعاكسه أنا كنت بحاول اظهر وجودي مش اكتر.
ولو أنا نبهتك كذا مره وقولتلك متعمليش ده وأنت ركبتي دماغك وتستاهلي اللي عمله فيك عشان تبقي متسمعيش كلامي تاني.
أنت معايا ولا عليا أنا عايزه افهم.
أنا مع اللعبة الحلوه.
حدفتها بالعلبة المناديل وانا بكمل عياط انا كان قصدي خير اينعم الطريقه كانت غلط بس كان قصدي خير مهو لو اختفى تاني كنت هجيبه منين يلا أديني بوظت الدنيا و الموضوع من غير ما يختفي.
ممكن اقعد
رفعت عيني له وبدون ما ارد رجعت عيني تاني للكتاب اللي في أيدي لمحته بطرف عيني بيقعد لكن مهتمتش وكملت قراءة.
كنت حابب اعتذرلك.
اعتذارك غير مقبول.
على فكره أنت لازم تحطي نفسك مكاني تخيلي كنت قاعده فجأة لقيت حد جاي يرمي بلاه عليك بدون مقدمات.
رفعت راسي وبرقت فاستوعب اللي هو قاله بلع ريقه بتوتر وكان لسه هيتكلم لكني مستنتش.
تاني برمي بلايا عليك تاني يمكن أنا غلطت لما اتسرعت واتكلمت لكني مش برمي بلايا على الرجالة يا استاذ لكن أنا اللي بعتذر.
عن ايه
عن طريقتي عشان سمحتلك تكون وقح بالشكل ده في كلامك.
أنا وقح
ودبش وقليل الأدب كمان.
أنت اكيد مجنونة.
كتفت ايدي وواجهت عيونه بقوة
والله مضربتكش على أيدك عشان تيجي تقعد معايا وعلى العموم اعتذارك مش مقبول وياريت تورينا جمال خطوتك.
آنسه رؤيا.
نعم يا احمد
انا مضطر أمشي عشان والدتي تعبانه فينفع أنت تقفلي المكان انهارده
أيوه طبعا روح أنت بس لوالدتك ومتشغلش بالك وابقى طمني عليها.
ماشي لو حصل حاجه كلميني.
مشي وأنا ابتديت اتابع شغل المطعم المطعم بتاعي من سنه ونص بعد سنين كتير من التعب والشغل بجانب الدارسة قدرت أني اعمل مطعم يكون خاص بيا مش كبير اوي اينعم لكني كنت دايما بهتم بأنه يكون مريح اكتر منه أنه يكون كبير ببقى قاعده فيه طول الاسبوع طول اليوم لكن على الساعه تسعة بمشي وأحمد بيكمل لحد الساعه اتناشر كنت بتابع الشغل