حواديت مريم وادهم بقلم مريم وليد 2

سنين يا مراد.. سبع سنين بنام بصحى بدور بدرس بشتغل بقابل ناس.. ناس بتحاول معايا وناس بتحبني وأنا مش عارفة انسى رغم إنه في أول محطة رماني وفي أقرب محطة اختار غيري! طيب وليه أنا من جوايا واثقة إنه راجع وهيفتح موضوعنا.. بس من جوايا برضوا عارفة إنه خلاص أدهم لو رجع مش هقدر أرجعله أنا لسه بحبه.. أو يمكن بيتهيألي ده بس مبقتش بثق فيه مبقتش قابلة وجوده حواليا بقى تقيل على قلبي الذكريات.
اتنفس بهدوء وكمل
يا مريم أنت بتعاندي مع نفسك علشان تنسي بتبذلي مجهود علشان تنسيه.. مجرد محاولاتك لنسيانه تفكير فيه اساسا.
سكتت فقدر سكوتي وسكت هو كمان.. مسحت دموعي وكملت وأنا ببتسم
أنا بقالي سبع سنين رافضة اتكلم او أعيط معلش جت فيك بقى.
ضحك بهدوء
يا ستي فداكي مش أحسن ما تخبطيني بالعجلة!
قمت وقفت فجأة وكملت
مراد تعالى نسوق سوا علشان منخبطش في بعض المرة دي.
سمع الكلام وفعلا قومنا نسوق سوا كنا مشغلين اناشيد وأغاني منغير موسيقى من اللي بحبها واللي طلع هو كمان بيحبها وبنسوق.. كنت حاسة إني بفوق الهوا جميل والعجل جميل وأنا مبسوطة وباكل ايس كريم.
شكرا بجد يا مراد كنت محتاجة اتكلم مع حد وحد يطاوعني ويركب معايا عجل ورحمة مش بتحب العجل.. فبجد متشكرة.
ابتسم بهدوء وكمل
بطلي عبط مفيش شكر أحنا صحاب زي ما اتفقنا وأنا موجود لمريوم في اي وقت.. ورقمي معاك وأنت نازلة كلميني وننزل سوا متفقين
حركت راسي بإيجاب
متفقين.. تعالى بقى اطلع معايا.
خليها يوم تاني طيب..
كملت بإغراء
براحتك يا مراد ماما عامله صنية مكرونة بشاميل تحفة.
اوف على الكلام اللي يخلينا نطلع ده.. لولا إنك أصريت عليا بس.
ضحكت جامد فركن العجلة وطلع معايا.. فتحت باب الشقة ودخلت وأنا بنادي على ماما
تعالي يا حبيبتي أنا هنا وأدهم كان جايلك..
قام وقف فجأة لما لقى مراد وبصلي بعدم فهم وكمل
يعني إيه كنتوا سوا
أنا قابل..
قاطعت مراد وكملت
اتقابلنا صدفة وسوقنا عجل سوا واتماشينا ومراد طلع علشان يشوف ماما.
عجل يا مريم أنا فكرت إنك كنت بتعملي ده معايا أنا بس..
اتنهدت بهدوء
اقعدوا هدخل أحضر الاكل مع ماما.
ابتسم بسخرية وزعل بسيط ظهر على ملامحه
لا أنا مش جعان.. متشكر.
بصيت على طيفه وهو خارج وابتسمت بتعب وقلة حيلة لمراد ودخلت لماما.
متجيش تلومني إن النهارده بقى في حياتي حد تاني.. انساني لو لسه فاكرني وأنت ليك مليون طريقة.
ونتقابل وتيجي عيوننا في عيون بعض..
ونتكلم نلاقي إن أحنا نشبه بعض.. نحس بحاجة مش فاهمين تفاصيلها وأجمل لحظة في الحدوتة أولها.
يعني أنت حاسة إنك مرتاحة مع مراد
يا رحمة أنت ليه مش مصدقة إن أنا ومراد صحاب صحاب وبس.
ضحكت بهدوء
مريم أنا بقالي فترة طويلة مشوفتكيش متحمسة وأنت بتكلمي حد كده بتنزلي كتير علشان تسوقوا وتتمشوا وتاكلوا ايس كريم سوا حتى لما بتطلعي مش بتعملي حاجة غير إنك بتكلمي مراد..
سكتت وكملت بهدوء
يا رحمة أنا خايفة ومش عاوزة.. أنا مبسوطة وأحنا كده.
مراد كمان شكله متحمس..
ابتسمت بهدوء
أنا ومراد شبه بعض بنحب حاجات مشتركة ودماغنا وتفكيرنا واحد.. فعلشان كده بنرتاح وأحنا مع بعض وبنتكلم كتير بس مش أكتر.
اتنهدت بإستسلام
لو حسيت إنك بتحبي او بدأت تحسي بمشاعر ناحية مراد.. سيبي نفسك يا مريم أحنا بنخلص حكايات وبنبدأ حكايات جديدة.
مراد عارف إني كنت بحب أدهم وحاطط ده دايما في باله وبيبعد 100 خطوة كل ما يقرب علشان بيحس إنه مينفعش!
اتنهدت وكملت
يا ستي يخربيت أدهم.
أدهم مشاعري ناحيته بقت مختلفة مش بكرهه.. بس مش بحبه بطلت أدور عليه بنشوف بعض بالصدفة وبقى متعود على وجود مراد في حياتي.
هو أنت لسه بتحبيه
كنا ماشيين في الشارع بنتكلم في مواضيع عشوائية ففاجئني بالسؤال
معرفش هو أنا كنت لسه بحبه ولا متعلقة بذكرياتنا القديمة وإني بحط أي حد اشوفه أو أعرفه معاه في مقارنة أوقات كتير بحس إني ظلمت نفسي بحبي لأدهم.. بس اللي واثقة منه إني حاسة إني اتعافيت.
ابتسم بهدوء وكمل
الموضوع بقى يخوف يا مريم.. حاسس إني بقيت بحب وقتي معاك وبكون مبسوط.
ابتسمت وكملت
تعالى ناكل أيس كريم.
وبعد شوية نتجرأ ونعملها ونفتح يوم قلوبنا لبعض..
مريم أدهم برا.. عاوزك.
المرة دي محستش إني مخضوضة قلبي مكتش بيدق كان عادي.. خرجتله فقام وقف لما شافني ابتسمتله فقعد
مريم أنا عندي كلام أقوله حقك ترفضيه وحقك تقبليه.. بس أنا محتاج أقوله.
اتفضل يا أدهم.
أنا لسه بحبك زي أول يوم حبيتك فيه.. لسه شايفك مريم حبيبتي اللي اتشاركنا واتعاهدنا على كل بداية سوا حتى لما دورت على حد تاني كنت بدور عليك فيها عمري ما شفت حد غيرك وعمر قلبي ما دق لحد غيرك يا مريم.. عندي استعداد اتقدملك دلوقت نكمل سوا.. كل حاجة نقصت مننا هتكمل وأحنا مع بعض.
اتنفست بهدوء وكملت بابتسامة
وأنا لأ يا أدهم أنت مبتحبش غير نفسك.. مش بتدور غيرد على راحتك أنت مش هامك غيرك ومش بتدور عليا أنت بس حسيت إن الحاجة اللي كانت ليك بتروح لغيرك.. وأنا مكدبش عليك أنا اول مرة أحس إني مبسوطة وإني مرتاحة من فترة طويلة وأول مرة أحس إني اتعافيت من أكتر علاقة توكسيك في حياتي فمش هقدر أرجعلها تاني.
ممكن تبدأي بالحاجة اللي عاوزة تقوليها
ممكن نقول سوا..
حرك راسه بموافقة
طيب يلا واحد اتنين تلاتة..
أنا بحبك..
أدهم جالي النهارده.
سكتنا عشر ثواني فغمض عيونه بغباء وكمل
أنا آس..
قاطعته بابتسامة
وأنا قلتله لأ قلتله إني مبقتش بحبه.. ولا بقى عندي مشاعر ناحيته ولا حاسة إنه شخص مناسب..
اتنهدت بهدوء وأنا بتنفس هوا نضيف
قلتله إني بقيت مبسوطة ومرتاحة في مكان تاني.. وإني حاسة بمشاعر جديدة.
ابتسم بهدوء وكمل
يعني إيه يا مريم
ابتسمت المرة دي بإستسلام
يعني منغير ما أخد بالي لقيتني بتشد وبنسى كل حاجة قديمة.. ببدأ حكاية جديدة شبه اللي كنت عاوزة أعيشها فيها حد شبهي.. قلبه جميل زي قلبي وبيعرف يحب..
يعني إيه برضوا
يعني أنا كمان بحبك يا مراد!
يا غلب مراد!
كل وعد وعدتهولك هوفيهولك متخافيش.. كل حلم هيجي وقته وبأوانه متقلقيش.
كنت داخلة القاعة وايدي في ايده.. كان شكلنا عسول لدرجة متخيلتهاش ابتسم وهمس في وداني
بحبك من أول ما خبطت عجلتي شاركتيني المشي والرغي والحماس من أول مرة قلت فيها إني إنسان بجح.
وأنا بحبك علشان كل حاجة بدأت معاك يا مراد
في كل الحكايات كل البدايات جميلة عدا حكايتنا.. كانت البداية مجرد بداية لحياة جميلة
مريم وليد محمد
حواديت_مريم_ومراد