وان كنت اقدر احب تاني.. اسكريبت كامل بقلم ريم خالد
المحتويات
كان مدمن من شكله وطريقته في الكلام بس قلبي أتقبض لما شوفته وكان لازم أطلع اللي في قلبي وقولتله اللي خايفه منه وآني مش هنسي أنه كان مدمن وأنه ميتأمنش عليكي ولا علي أي بنت وشدينا مع بعض وقولتله...
قاطعتها_ قولتيله أنه لو راح المكان من تاني هيرجع للمخد..رات ..
_ أيوه قولتله لأن دي الحقيقه اللي بيضعف أول مره هيضعف في كل المرات اللي جايه هو أتعصب وبدأ يتكلم بأنفعال لحد ما أنتي خرجتي ..
نزلت دموعي وأنا ببصلها بعتاب..
_راح للمكان يا ماما .
قاطعتني وهي بتقول بأنتصار_ مش قولتلك مع أي مشكله هيروح هناك أنا كنت عارفه دا مش قد كلمته.
زعقت وأنا بقولها_ راح بسبب كلامك ياماما هزيتي ثقته في نفسه راح عشان يثبت لنفسه أنه مش ضعيف وأن يقدر يروح هناك وعمره ما هيشتاق راح هناك في فتره مكنش ينفع يروح فيها عشان هو لسه بيتعافي نفسيا لاكن راح بسببك وبسبب كلامك..!
زعقت في وشي وهي بتحذرني..
_ ريم متنسيش أني أمك ولازم تكلميني بأسلوب كويس.
أتنهدت بتعب وأنا بقولها..
_ لي عملتي كدا ليه توصليه لمرحله أنه يروح هناك .
_عمر ميتأمنش عليكي يا ريم أنا مقدرش أخليكي معاه أنا ببقي خايفه لما تقوليلي أنك معاه كل اللي حواليكي وحواليه عمرهم ما هينسوا أنه كان مدمن حتي لو أتعافي هيفضل هو نفس الشخص ..!
_ دا تفكيرك لوحدك يا ماما أحنا بننصح الواحد أنه يتعالج وأول ما يتعالج ويبدأ يرجع لحياته نهزمه بكلمه أننا عمرنا ما هننسي أنك كنت مدمن كلنا مليانين عيوب لولا ستر ربنا مش هنعلق المشنقة لبعض ربنا بيغفر البشر ليه مش بيغفروا ..!
ردت عليا بحده_ ريم أنا معنديش كلامه أققوله تاني غير اللي قولته ودا تفكيري حتي لو غلط في نظرك أنا مقتنعة بيه لان دا الصح بالنسبالي .!
مشيت من غير ما أرد دخلت أوضتي وأنا برمي نفس علي السرير وخطين من الدموع نزلوا علي وشي وأنا بفتكر كلامي معاه أتعدلت علي السرير وأنا بمسك تلفوني وعماله أبص علي صورته بعدها رميت التلفوني جنبي وأنا بدفن وشي في المخده وبصرخ صرخه مكتومه..
فضلنا كدا أسبوع محدش فينا يعرف حاجه عن التاني كنت قاعده مع التيم في مكان الشغل كانوا بيتكلموا وأنا مش مركزه معاهم وسرحانه قطع سرحاني صوت جنى وهي بتقعد جنبي
_ ريم أنتي كويسه ..
أتنهدت وأنا ببصلها بحزن..
_ مش بيسأل ولا باين في أي حته ..!
ردت بهدوء _ طيب مش أنتي عارفه بيته .
_ أيوه بس مستحيل أروحله ...
_ مينفعش أنتي لازم تتكلمي معاه..
كملت كلامها وهي بتطبطب علي كتفي_ بقالكوا أسبوع أهو يمكن دلوقتي تقدروا تتكلموا وتفهموا بعض ..!
حطيت أيدي علي دماغي وانا بقولها_ مش قادره أتكلم معاه ..
_ أنا مش هضغط عليكي بس لازم تعرفي أنك كل ما تتأخري كل ما الموضوع بيكبر..
بصيتلها شويه وبعدها مشينا من المكان لقيت نفسي واقفه
_ ريم أتفضلي ..!
رديت بتوتر_ شكرا لحضرتك أنا كنت جايه لعمر ..!
بصتلي بتوتر_ عمر سافر يا ريم ..
_ سافر ..!
_ ايوه بقاله يومين ..!
حاولت أفوق من الصدمه وأنا بقولها بأبتسامة..
_ تمام شكرا ..
_طيب ممكن تدخلي نتكلم ..!
سكت شويه وبعدها هزيت رأسي ودخلت قعدنا وهي قعدت جنبي وهي بتطبطب علي رجلي بحنية..
_عمر حكالي اللي حصل عمر غلط يا ريم بس أنتي مفهمتيش أنه غلطه دا نتيجة كلام سمعه..!
_ مكنش ينفع يروح مكنش ينفع ..!
_أنا عارف أنه مكنش ينفع بس هو أنفعل من كلام والدتك ولحظة غضب لقى نفسه هناك وعايز يحر ق المكان باللي فيه أول ما شافك كان مستني منك كلمه تهديه وترجعله ثقته في نفسه من تاني لاكن أنتي زودتي عليه هو مقلش أنتي قولتي أي بالظبط بس نظره عينيه قالت أنه أتجرح ..!
رديت بتوتر_ أنا كمان كنت متوتره لما شوفته هناك ولما لقيته قدامي تعبان وشكله متغير حسيت للحظة أن مجهودنا أحنا الأتنين راح في الأرض بسبب لحظة غضب برده اللي حصل مني كان نابع من خوف جوايا كان هو لازم يفهمه..!
_أنتوا الاتنين مفهمتوش بعض للأسف..!
سكتت وطبطبت عليا بقلة حيلة قومت وقفت وأنا بقولها بهدوء..
_ياريت لو كلم حضرتك متقوليش أني جيت هنا ..
_ يعني مش عايزه تعرفي راح فين ..
_ مش هيفرق سواء عرفت أو لأ في النهاية هو سافر ..
نزلت وقفت قدام عربيتي وأنا ببص علي العمارة بدموع وبفتكر كلامنا أحنا الأتنين أخر مره مسحت دموعي وأنا بتحرك علي بيتي أول ما وصلت لقيت ماما مقبلاني وهي بتبصلي بحزن وبتمسك أيدي..
_ هتفضلي زعلانة مني كدا كتير ..!
أترميت في حضنها وأنا بعيط فضلت تطبطب عليا بخضه وهي بتمسح علي شعري..
_ مالك بس في أي ..!!
_ سافر يا ماما من غير ما نتكلم ولا نتعاتب حتى ..
حاوطت وشي بين أيديها وهي بتقولي بذنب..
_ أنا أسفه يمكن لو كنت فكرت شويه مكنش كل دا حصل ..
مسحت دموعي وأنا بقولها ..
_كلنا غلطنا يا ماما بأختلاف طريقة الغلط بس هو غلطه أكبر هرب وساب كله حاجه وراه ..
أبتسمت بحزن وهي بتقولي_يمكن هو هيبعد شهر يريح اعصابه ويرجع ..!
بصتلها بدموع_ تفتكري ..!
هزت رأسها بهدوء وهي بتشدني لحضنها من تاني وأنا بغمض عيني بتعب..
عدى سنة وكام شهر وعمر لسه مظهرش وأنا بحاول أشغل نفسي بأي حاجه نجحت في شغلي وبدأت أحضر ندوات بتكلم فيها عن زيادة وعي الشباب وبدأ شباب كتير يشاركوا معايا وقابلني حالات تشبه لعمر وقدرت أساعدها وبدأت الايفات بتاعتي تتعرف أكتر ..
_ ريم شوفتي القناة الجديدة اللي بتقدم نفس المحتوي بتاعنا ..
أتعدلت في قعدتي وأنا بقولها_ قناة أي..
فتحت تلفونها وشغلت فيديو من القناة كان موجود ناس بتتكلم عن تجربتها في
_ مين صاحب القناة دي ..
_ مش عارفه زي ما أنتي شايفه دي ناس بتحكي تجاربها بس مفيش حد ظاهر معاهم..!!
أنفعلت وأنا بقولها_ أنا عايزه أعرفه خلي محمد يبحث عنه..
هزت رأسها وهي بتمشي حطيت دماغي بين أيدي حاسه بالضغط من كل حاجه حواليا فتحت أخر لايف موجود علي صفحتي كانت المشاهدة بتاعته عاليه بس مش زي ما أنا متعوده قفلت التلفون وأنا ببص قدامي بغضب بعد ساعة قاعده بسمع الفيديوهات الموجودة علي القناة لقيت جنى بتقعد جنبي بتقولي بهدوء.
_ عرفنا أسمه ..
سألتها بتعب_ مين الباشا ..
سكتت شويه وبعدها قالت بترقب_ عمر الدهبي..
بصتلها بصدمه ومبقتش عارفه أرد عليها قربت مني وهي بتمسك أيدي..
_ متزعليش نفسك في ناس بتحبك أنتي ومستمرين في دعمك ..
مردتش عليها وأنا بطلع من المكان بس سامعه صوتها وهي بتنادي عليا ركبت عربيتي ووقفت قدام العمارة بتاعته فضلت واقفه شويه لحد ما شوفت حارس العمارة بيقعد علي كرسي نزلت من العربية وقربت منه ..
_ السلام عليكم..
_وعليكم السلام ورحمة الله وبركاته أي خدمات ..!
سألته بتردد_ هو بشمهندس عمر جه من السفر ولا لسه ..
رد بترقب_ لي في حاجه..
_ لا أبدا بس في بينا شغل وكنت عيزاه يعني ..!
رد بهدوء _ ايوه وصل من حوالي يومين كدا ..
بصيتله بصدمة وبعدها شكرته كنت لسه هتحرك لقيت عربيته بتركن قدامي ونازل منها هو وبنت ماسكه في أيده أول ما عينه جات عليا وقف في مكانه وهو بيبصلي بصدمه قربت منه وأنا مبتسمه ابتسامه بارده..
_ يا ألف حمد الله علي سلامتك ..
كان بيبصلي بهدوء ومش بيرد قربت منه أكتر وأنا ببص في عينيه..
_ مش تقول أنك رجعت ينفع كدا أتفاجأ بوجودك ..!
قربت البنت مني وهي بتسألني..
_ أنتي ريم مش كدا ..!
ضحكت بسخريه_أي دا أنتي تعرفيني ..!
_أيوه عمر حكالي عنك وكنت متحمسه أشوفك ..
ضحكت بهدوء _ فرصة سعيدة يا ...
_ ميرا مديره أعمال عمر ..
أبتسمت بهدوء_ فرصة سعيدة يا ميرا..
أديته ضهري وأنا بقوله قبل ما أمشي..
_حمد علي سلامتك مره تانيه يا بشمهندس..
كنت لسه هفتح باب العربية لقيته ورايا بيقفله وبيقف قدامي وأنا بسند ضهري علي العربية بخضه ..
_ممكن تستني نتكلم ..
زقيته في صدره وأنا بقوله ببرود..
_ من ناحية الكلام هنتكلم بس مش هنا ..
بعدته بأيدي وأنا بركب العربية وكملت كلامي..
_ لو حضرتك فاضي بكره نقدر نتقابل مفيش مشكلة..
رد بهدوء_ تمام نتقابل في كافيه
هزيت رأسي وكنت لسه هتحرك وقفني وهو بينزل برأسه شويه لمستوايا وبيقولي بهدوء .
_ بلاش حضرتك دي أنتي أكتر واحده شوفتيني في أسوء حالاتي
رديت بسخرية _أيوه وأنت برده اللي عضيت الأيد اللي أتمدتلك في أسوء حالاتك ..!
بصلي بأستغراب زقيت أيده وأنا بتحرك بالعربية ومشيت وأنا ببص عليه من المرايا ..
تاني يوم الصبح قاعده في الكافيه اللي أتفقنا عليه وصوت أم كلثوم شغال في المكان وهي بتغني..
وبين الليل وآلامه ... وبين الخوف وأوهامه.
بخاف عليك ..وبخاف تنساني !
والشوق إليك علي طول صحاني !
غلبني الشوق وغلبني .!
قطع سرحاني مع صوتها شدت الكرسي اللي قعد عليه عمر وهو بيقولي بهدوء..
_ قطعت عليكي أم كلثوم ..
رديت ببرود_ عادي ..
سكتنا أحنا الاتنين لحد ما هو أتكلم وهو بيسند بأيده علي الترابيزة..
_ مين من حقه يزعل ..
ضحكت بسخرية_ أنت زعلان ..!
رد بأنفعال _ريم أنني غلطتي ..!
أتكلمت بغضب_ أنا غلطت غلطه واحده لاكن أنت ماشاء الله غلطت كتير ..!
رد باستغراب_بجد وأي هو غلطي بقا .
أتعدلت في قعدتي وبصيتله وأنا برفع حاجب وبقوله بسخرية..
_ أنت مش شايف أنك غلطت في حاجه ..
_ يمكن أنا مش شايف خليني أشوف ..!
أتنهدت وأنا بقوله_ أولا روحت مكان مكنش ينفع تروحه وأنت لسه بتتعافي عشان تثبت لنفسك أنك مش ضعيف وأنا حذرتك كتير أنك تروح لهناك لأنك هتتعب مش عشان هتشتاق لا عشان حالتك هتسوء لما تشوف المكان ..
قاطعني وهو بيقول_ أنا روحت هناك بعد ما والدتك ضغطت علي أعصابي وأنا حسيت أنها شيفاني شخص ضعيف ودا خلاني أتهزيت من جوايا وكنت لازم أثبت لنفسي غير كدا ..!
كملت كلامي بهدوء_ ثانيا سافرت بدون أي خبر ورميت كل حاجه وراك وهربت بدون ما تواجهه ولا تتكلم وسيبتني ولا فكرت مره تسأل فيا ولا تسأل أنا فين ونسيت كل حاجه حصلت وغيبت كتير ..! عدت سنه وحضرتك مش ظاهر ولا حتي بتسأل من بعيد..
قاطعني_برده أنتي اللي فضلتي بالأسبوع مش بتسألي..
زعقت بعصبية_ لو هتفضل تقاطعني كل شويه يبقي بلاها كلام خالص ..
رفع أيده بأستسلام وهو بيقولي..
_خلاص أسف كملي ..
_ أنا لما غيبت أسبوع زي ما أنت بتقول كنت مستنية منك مكالمه صغيره كونا نهينا الخلاف اللي حصل لاكن أنت كنت عايزني أنا اللي أتصل وأنا اللي أتكلم أنت متتكلمش لي وأول ما ملقيتش مني فايده سافرت وهربت ولا كأني موجوده أو حتي عديت عليك في حياتك قبل كدا ..!
أنت شخص أناني مش بيفكر غير في نفسه والباقي كله يولع ولا يفرق معاك زعل حد حتي لو كان قريب منك ..!
وقفت كلام وأنا بأخد نفسي بغضب وهو بيبصلي بهدوء
_ أنا آسف يمكن أنا أتسرعت في بعدي بس صدقيني أنا بعدت عشان حسيت أنك بعدتي وأن وجودي عاملك مشاكل وقلق أنا عارف أن موضوع اني كنت مدمن هيفضل واقف في طريقنا..
رديت بحده عليه_ أنت عارف كويس أوي أن دا مكنش تفكيري لو كان تفكيري كنت حطيتك في المصحة وسيبتك لاكن لأ أنا فضلت معاك في كل خطوه وأنت
متابعة القراءة
